ស្ទឹងត្រែង ៖ ប្រជាពលរដ្ឋមានរបរលក់ចង្ក្រាន ក្អម ឆ្នាំង មកពីភូមិឃ្លៃឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ស្មើសុំប៉ូលិសចរាចរណ៍តាមដងផ្លូវឈប់ទារលុយពីពួកគាត់ ព្រោះរដូវវស្សានេះ លក់របស់មិនដាច់ គ្មានប្រាក់ចំណេញសម្រាប់ចិញ្ចឹមប្រពន្ធកូន និងបង់ជូនអស់លោកទេ។
ប្រជាពលរដ្ឋលក់ក្អមឆ្នាំងមិនបញ្ចេញឈ្មោះបានត្អូញត្អែរពីភាពលំបាកធំៗជាកត្តារាំងស្ទះធ្វើឱ្យពួកគាត់ ខាតបង់ដើមទុន និងបាត់បង់ប្រាក់ចំណេញ។
ពួកគាត់លើកឡើងថា ៖ កត្តាទី១ មុខរបររបស់គាត់ ត្រូវប៉ូលិសចរាចរណ៍តាមផ្លូវក្នុងខេត្តនីមួយៗដែលគាត់បើកបរលក់ដូរ បានទារប្រាក់មួយកន្លែងៗខ្លះទារចាប់ពី៥ម៉ឺនចុះ-ខ្លះ២ម៉ឺន -១ម៉ឺនឬតិចបំផុត៥ពាន់រៀល ត្រូវតែបង់ឱ្យនេះជាទម្លាប់របស់ពូកគាត់ ហើយចោទប្រកាន់គាត់ទៅលើការដឹកសំពីងសំពោងនឹងគ្មានប័ណ្ណបើកបរ។
កត្តាទី២ ការធ្វើដំណើរឆ្ងាយចំណាយច្រើនលក់មិនដាច់ព្រោះសម្ភារៈប្រើប្រាស់ដែលផលិតដោយដៃ ខ្វះការគាំទ្រពីអតិថិជន ដោយសារ មានរបស់នាំចូលពីក្រៅប្រទេសទំនើបជាងយើង ហើយខែវស្សាជួបបញ្ហាលំបាកច្រើន។
កត្តាទី៣ ពួកគាត់ត្រូវប្រឈមនឹងការជំពាក់ប្រាក់ម្ចាស់ដើមដែលលើកយកមកលក់ ព្រោះទំនិញលក់មិនអស់ ខ្លះខូចបាក់បែក បាត់បង់ប្រាក់ទាំងដើមទាំងចុង។
ពួកគាត់លើកឡើងថាៈ ទោះជាយ៉ាងណា នេះជាមុខរបរសុចរិតមួយដែលមិនបង្កអ្វីឱ្យប៉ះពាល់ដល់សន្តិសុខសង្គមឡើយ តែសូមឱ្យអតិថិជនជួយគាំទ្រដល់មុខរបរពួកគាត់ផង ហើយចំណែកសមត្ថកិច្ចគួរតែយោគយល់ ដល់កសិករក្រីក្រផងទានម្ចាស់ បើថាសំពីងសំពោងយ៉ាងណាក៏វាមិនខូចផ្លូវដូចរថយន្តយីឌុបដឹកលើសទម្ងន់ដែរ៕
Source: Kampuchea Thmey Daily
0 Comments