កាលពីថ្ងៃព្រហស្បតិ៍ ព្យុះសង្ឃរា Lane បានបង្កការជន់លិចនៅកោះហាវ៉ៃមុនការមកដល់របស់វានៅលើរដ្ឋកោះមួយនេះ ដែលជាហេតុជំរុញឲ្យប្រធានាធិបតីសហរដ្ឋអាមេរិកលោក Donald Trump ប្រកាសដាក់រដ្ឋក្នុងគ្រាអាសន្ននៅពេលការបាក់ដី និងទឹកជំនន់ភ្លាមៗបានបិទផ្លូវ។
សេវាអាកាសធាតុជាតិបានឲ្យដឹងថា ព្យុះសង្ឃរា Lane នៅតែជាព្យុះសង្ឃរាដ៏មានឥទ្ធិពលមួយដែលនាំមកជាមួយនឹងខ្យល់ក្នុងល្បឿនលើសពី១៣០ម៉ាយល៍ក្នុងមួយម៉ោងបើទោះបីជាវាត្រូវបានបន្ទាបទៅប្រភេទបីនៅពេលរសៀលក៏ដោយ។
យោងតាមអាជ្ញាធរសហព័ន្ធបានឲ្យដឹងថា ទឹកភ្លៀងក្នុងកម្រិតរហូតដល់១២អ៊ីញបានធ្លាក់រួចទៅហើយមុនពេលព្រឹកព្រលឹមហើយទឹកភ្លៀងកម្រិត៣០អ៊ីញត្រូវបានគេរំពឹងថានឹងធ្លាក់នៅតាមតំបន់ដែលរងគ្រោះខ្លាំងបំផុតក្នុងរយៈពេល៤ទៅ៥ថ្ងៃខាងមុខនេះ។
អាជ្ញាធរបាននិយាយថា ក្រុមសង្គ្រោះបន្ទាន់បានបង្កើតមណ្ឌលជម្លៀសចំនួន១៦កន្លែងហើយ១៩កន្លែងផ្សេងទៀតនឹងត្រូវបើកពេញមួយថ្ងៃខណៈដែលលោក Trump បានជំរុញឲ្យអ្នកកោះហាវ៉ៃត្រៀមខ្លួនសម្រាប់ការខូចខាតអាក្រក់បំផុត។
លោក Trump បានបង្ហោះ Twitter ថា “ក្រុមរបស់យើងកំពុងសម្របសម្រួលយ៉ាងជិតស្និទ្ធជាមួយអាជ្ញាធររដ្ឋនិងអាជ្ញាធរមូលដ្ឋាន។ យើងគិតពីអ្នកជានិច្ច!”។
លោក Brock Long ប្រធានទីភ្នាក់ងារគ្រប់គ្រងគ្រោះអាសន្នសហព័ន្ធ (FEMA) បាននិយាយថា “យើងព្រួយបារម្ភយ៉ាងខ្លាំងអំពីសក្តានុពលសម្រាប់ទឹកជំនន់នៅតំបន់ដីគោក ការបាក់ដីនិងការខូចខាតដល់ហេដ្ឋារចនាសម្ព័ន្ធគមនាគមន៍និងដឹកជញ្ជូន”។
យោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា ការបាក់ដីនិងទឹកជំនន់ដែលបណ្តាលមកពីព្យុះភ្លៀងពីដំបូងគឺបានរារាំងផ្លូវជាច្រើននៅលើកោះធំ។
ឆ្មាំឆ្នេរសមុទ្រអាមេរិកបាននិយាយថា យោធាអាមេរិកចំនួន៥៧,០០០នាក់ដែលបានឈរជើងរួចទៅហើយនៅកោះហាវ៉ៃគឺបានត្រៀមខ្លួនរួចជាស្រេចក្នុងការចាប់ផ្តើមបេសកកម្មស្វែងរកនិងជួយសង្គ្រោះហើយផ្តល់ការដឹកជញ្ជូននិងការគាំទ្រផ្នែកវេជ្ជសាស្ត្រ៕ AFP
Source: Kampuchea Thmey Daily
0 Comments