អ្នកប្រដាល់ជើងខ្លាំងកម្ពុជាផល សោភ័ណ្ឌ ក្លិបតាឡីដំរីមានរិទ្ធ ត្រូវគេផ្គូផ្គងអោយជួបប្រកួតជាមួយអ្នកប្រដាល់ថៃ Bukjoh Sor.Anucha នាយប់ថ្ងៃអាទិត្យទី២៦ ខែសីហា ឆ្នាំ២០១៨នេះ នៅក្នុងកម្មវិធីប្រដាល់ខារ៉ាបាវរបស់បាយ័ននៅសង្វៀនស្ទឹងមានជ័យ។
Bukjoh កាលពីពេលកន្លងមក ធ្លាប់មកប្រកួតនៅស្រុកខ្មែរម្តងហើយ ដោយវាយឈ្នះឈឿន ឆៃដែន ក្លិបថ្មគោលពោធិសែនជ័យ ក្នុងទឹកទី២ ។ អ្នកប្រដាល់ថៃរូបនេះ មានកំនត់ត្រាប្រកួតចំនួន៧៩លើក ឈ្នះ៦១លើក ចាញ់១៨លើក មិនដែលស្មើ ហើយធ្លាប់ផ្តួលដៃគូប្រកួតអោយសន្លប់បានចំនួន១៥លើក ។ អ្នកប្រដាល់ថៃម្នាក់នេះ មានកាយសម្បទារឹងមាំ មានកម្ពស់ប្រហាក់ប្រហែលសោភ័ណ្ឌដែរ គឺ១,៧០ម៉ែត្រ ហើយសោភ័ណ្ឌ១,៦៨ម៉ែត្រ ។ តែយ៉ាងណា Bukjoh មិនដឹងថា អាចវាយឈ្នះអ្នកប្រដាល់ជើងខ្លាំងកម្ពុជាផលសោភ័ណ្ឌ បានឬអត់នោះទេ ? ។
ផលសោភ័ណ្ឌ ជាអ្នកប្រដាល់ជើងខ្លាំង ដែលធ្លាប់ប្រកួតជាមួយអ្នកប្រដាល់ថៃច្រើននាក់មកហើយនាពេលកន្លងមក ដោយវាយចាញ់តិចតួចបំផុត ដែលការជួបថៃចុងក្រោយគេនោះ ផល សោភ័ណ្ឌ វាយឈ្នះ Famechhai ក្នុងទឹកទី២ កាលពីថ្ងៃទី១២សីហា២០១៨កន្លងទៅនេះ ។
និយាយជារួម ក្នុងការប្រកួតចំនួន១៣០លើក ផល សោភ័ណ្ឌវាយឈ្នះ១១៤លើកហើយ ដោយចាញ់តែ១៤លើកនិងស្មើ០២លើក ហើយធ្លាប់ផ្តួលគូប្រកួតអោយសន្លប់លើរេញចំនួន៤១លើក ។ យ៉ាងណា សម្រាប់ការជួបBukjohលើកនេះ គេនៅតែមានជំនឿទុកចិត្តលើផលសោភ័ណ្ឌ ថា នឹងអាចយកឈ្នះអ្នកប្រដាល់ថៃនេះបានមិនខាន ព្រោះថាអ្នកប្រដាល់ថៃរូបនេះប្រកួតជាមួយឈឿន ឆៃដែនកន្លងមក គឺមិនជាខ្លាំងជាងសោភ័ណ្ឌនោះទេ ។
ចំពោះ អ្នកប្រដាល់ចាន់ ចំរើន ក្លិបនិរោធមានជ័យ នឹងត្រូវស្វាគមន៍អ្នកប្រដាល់ថៃឈ្មោះ Nuth Kor Sor.Kesanon ដែលសុំមកសងសឹករូបគេវិញនោះ ។ ពួកគេទាំងពីរ ជួបប្រកួតគ្នាក្នុងទម្ងន់៦០គីឡូក្រាម ។
គូនេះ គឺផ្ទុយគ្នាស្រឡះតែម្តង ដោយចាន់ ចំរើន ជាអ្នកប្រដាល់ដែលចាត់ទុកថាជាជើងថ្មី ព្រោះគេទើបតែជួបប្រកួតជាមួយអ្នកប្រដាល់បរទេសជាលើកទី៧ប៉ុណ្ណោះ ហើយក៏ជាអ្នកប្រដាល់ដែលមានបទពិសោធន៍ខ្ចីនៅឡើយដែរ ។ ប៉ុន្តែចាន់ ចំរើន បែរជាអាចផ្តួល Nuth Kor បានទៅវិញ ។
ចាន់ ចំរើន មានប្រវត្តិប្រកួតប្រមាណជិត៥១លើកប៉ុណ្ណោះ ក្នុងនោះវាយឈ្នះ៣៤ ចាញ់១៧ តែធ្លាប់ផ្តួលដៃគូអោយសន្លប់ចំនួន១២ ។ គេជាអ្នកប្រដាល់ជើងខ្លាំងស្រករក្រោយ ដោយមានចិត្តធំ កម្លាំងខ្លាំង វាយមិនសំចៃដៃឡើយ ។ ប៉ុន្តែយ៉ាងណាការប្រកួតលើកនេះ មិនដឹងថាចំរើនអាចយកឈ្នះ Nuth Kor បានទៀតដែរឬអត់នោះទេ ? ។ ចំរើន ប្រកួតជាមួយថៃលើកចុងក្រោយនេះ វាយចាញ់Kamlai Yuok ក្នុងទឹកទី៣ ដោយសារតែគេវាយថែមខុសលក្ខណះបច្ចេកទេស គេអោយចាញ់នោះ ។
Nuth Kor ជាអ្នកប្រដាល់ជើងចាស់ មានស្នៀតទាត់និងកណ្តាប់ដៃល្អ។គេធ្លាប់មកប្រកួតនៅស្រុកខ្មែរម្តងហើយកន្លងមក ដោយវាយចាញ់ចាន់ ចំរើននេះឯង ។ ទោះជាយ៉ាងណា ចាន់ ចំរើន មិនអាចមើលស្រាលចំពោះ Nuth Kor នេះឡើយ ។ចាំមើល Nuth Kor អាចសងសឹកចាន់ ចំរើន បានសម្រេចឬអត់ ?។
ចំពោះ អ្នកប្រដាល់អ៊ូច ធារិទ្ធ ក្លិបអាណាចក្រគុនខ្មែរ ត្រូវគេផ្គូផ្គងអោយជួបប្រកួតជាមួយអ្នកប្រដាល់ នីម នន ក្លិបកងពលតូចទ័ពឆ័ត្រយោង៩១១ ដោយជួបប្រកួតក្នុងទម្ងន់ ៦០ គីឡូក្រាម ។
អ៊ូច ធារិទ្ធ គេមានផ្លែល្អ ពិសេសគឺផ្លែកែង និងជង្គង់ ប៉ុន្តែអ្វីដែលគេបារម្ភជំនួសធារិទ្ធ នោះ គឺខ្លាចតែចាញ់កម្លាំងស៊ុហ្វនីម នន និងចាញ់កណ្តាប់ដៃ និងជើងទាត់របស់នីម នន ។ ចាំមើល សម្រាប់ការជួបគ្នាលើកទី១នេះ តើអ៊ូច ធារិទ្ធ អាចយកឈ្នះនីម នន បានឬអត់ ?៕
Source: Kampuchea Thmey Daily
0 Comments