តុលាការឧទ្ធរណ៍កូរ៉េខាងត្បូងបានកាត់ទោសអតីតប្រធានាធិបតីកូរ៉េខាងត្បូងលោកស្រី Park Geun-hye ឲ្យជាប់ពន្ធនាគាររយៈពេល២៥ឆ្នាំកាលពីថ្ងៃសុក្រនៅក្នុងករណីមួយដែលកើតចេញពីរឿងអាស្រូវពុករលួយដ៏ធំមួយ ដែលបានទម្លាក់លោកស្រីពីអំណាចនៅក្នុងឆ្នាំ២០១៧។
លោកស្រី Park បានក្លាយជាមេដឹកនាំជាប់ឆ្នោតតាមបែបលទ្ធិប្រជាធិបតេយ្យដំបូងគេបង្អស់របស់កូរ៉េខាងត្បូងដែលត្រូវបានគេបង្ខំឲ្យចុះចេញពីតំណែងនៅពេលដែលតុលាការធម្មនុញ្ញបានទម្លាក់លោកស្រីដោយសាររឿងអាស្រូវមួយដែលនាំឲ្យអ្នកសាជីវកម្មពីរនាក់ជាប់ពន្ធនាគារ។
យោងតាមឯកសាររបស់តុលាការបានឲ្យដឹងថា “តុលាការកំពូលក្រុងសេអ៊ូលបានរកឃើញថា លោកស្រី Park បានឃុបឃិតជាមួយមិត្តរបស់លោកស្រីគឺនាង Choi Soon-sil ក្នុងការទទួលយកប្រាក់រាប់ពាន់លានវ៉ុនពីក្រុមហ៊ុនធំៗដើម្បីជួយដល់គ្រួសាររបស់នាង Choi និងផ្តល់ឲ្យមូលនិធិមិនរកប្រាក់ចំណេញដែលជាកម្មសិទ្ធិរបស់នាង”។
ចៅក្រម Kim Mun-suk បាននិយាយនៅក្នុងសេចក្តីសម្រេចថា “ការដោះស្រាយបែបគ្មានសីលធម៌រវាងអំណាចនយោបាយនិងអំណាចហិរញ្ញវត្ថុគឺបានប៉ះពាល់ដល់ខ្លឹមសារនៃលទ្ធិប្រជាធិបតេយ្យនិងធ្វើឲ្យខូចទ្រង់ទ្រាយនៅក្នុងសេដ្ឋកិច្ចទីផ្សារដែលជាហេតុធ្វើឲ្យប្រជាជនបាត់បង់ជំនឿទុកចិត្តយ៉ាងជ្រាលជ្រៅនៅក្នុងសង្គមរបស់យើង”។
លោក Kim បាននិយាយថា “ការពិន័យយ៉ាងតឹងរ៉ឹងគឺមិនអាចចៀសបានទេ”។
តុលាការក៏បានពិន័យលោកស្រី Park ជាទឹកប្រាក់ចំនួន២០ពាន់លានវ៉ុន (១៧.៨៦លានដុល្លារអាមេរិក) ផងដែរបន្ទាប់ពីបានរកឃើញថា លោកស្រីមានពិរុទ្ធពីបទចោទប្រកាន់នានាដូចជាការរំលោភអំណាច ស៊ីសំណូកនិងការបង្ខិតបង្ខំជាដើម។
តុលាការជាន់ទាបមួយបានដាក់ពន្ធនាគារលោកស្រី Park រយៈពេល២៤ឆ្នាំនៅក្នុងខែមេសា។ រដ្ឋអាជ្ញាបានប្តឹងជំទាស់នឹងការសម្រេចចិត្តនោះដោយស្វែងរកការកាត់ទោសកាន់តែតឹងរ៉ឹងជាងនេះ។ លោកស្រី Park បានបោះបង់បណ្តឹងឧទ្ធរណ៍។
តុលាការកូរ៉េខាងត្បូងមួយទៀតបានផ្តន្ទាទោសលោកស្រី Park កាលពីខែកក្កដាឲ្យជាប់ពន្ធនាគារ៨ឆ្នាំបន្ថែមទៀតក្នុងករណីដាច់ដោយឡែកមួយដោយលើកឡើងពីរឿងអាស្រូវដូចគ្នាដែលបានរកឃើញថា លោកស្រីមានពិរុទ្ធពីបទបណ្តាលឲ្យបាត់បង់មូលនិធិរដ្ឋាភិបាលនិងជ្រៀតជ្រែកក្នុងការបោះឆ្នោតសភាឆ្នាំ២០១៦៕ REUTERS
Source: Kampuchea Thmey Daily
0 Comments