ព្រៃវែង ៖ បច្ចុប្បន្ននេះខេត្តព្រៃវែង បានទទួលរងគ្រោះទឹកជំនន់ទន្លេមេគង្គ ដោយបានបង្កឲ្យមានការខូចខាតផ្ទះសម្បែង ទ្រព្យសម្បត្តិ និងផលដំណាំ របស់ប្រពលរដ្ឋរួមទាំងហេដ្ឋារចនាសម្ព័ន្ធសាធារណៈ ដែលតម្រូវឲ្យមានការឆ្លើយតប ជាបន្ទាន់ទៅនឹងគ្រោះមហន្តរាយនេះ រួមទាំងការស្តារឡើងវិញនៅក្រោយពេលគ្រោះទឹកជំនន់ នេះផងដែរ។
លោក ឌុច គន្ធា អភិបាលរងខេត្តព្រៃវែង ក្នុងកិច្ចប្រជុំត្រួតពិនិត្យការងារគ្រោះមហន្តរាយ៧ខែ ដើមឆ្នាំ២០១៨ នៅសាលាខេត្តព្រៃវែង ក្រោមការអញ្ជើញចូលរួមពីឯកឧត្តមបណ្ឌិតទេសរដ្ឋមន្ត្រី ញឹម វណ្ណដា អនុប្រធានប្រចាំការគណៈកម្មាធិការជាតិគ្រប់គ្រងគ្រោះមហន្តរាយ នាព្រឹកថ្ងៃទី២៤ សីហានេះថា គិតត្រឹមថ្ងៃទី២៣ សីហា ទឹកមានកម្ពស់ អតិបរមា ៦,៨៤ ម៉ែត្រ ខណៈកំរិតប្រកាសអាសន្នមានកម្ពស់ ៧,៥០ ម៉ែត្រ បើធៀបនឹង ឆ្នាំ២០១៧ គឺខ្ពស់ជាង ១,២៤ ម៉ែត្រ។ ចំណែកស្ថានភាពទឹកភ្លៀងវិញ គ្រប់ក្រុង ស្រុក ឃុំ សង្កាត់ ក្នុងខេត្តទទួលរងទឹកភ្លៀងគ្របដណ្តប់គ្រប់ទីកន្លែង ប៉ុន្តែមានឃុំមួយចំនួនជួប គ្រោះរាំងស្ងួតផងដែរ។ លោកថា ស្ថានភាពកម្ពស់ទឹកខាងលើនេះបណ្តាលឲ្យមានផល ប៉ះពាល់ក្រុង ស្រុក ចំនួន ១១ លើ ១៣ ឃុំ សង្កាត់ ដោយមានចំនួនគ្រួសាររងគ្រោះ ២ម៉ឺន ៩ពាន់ ២២៥គ្រួសារ ជម្លៀសទៅកាន់ទីសុវត្ថិភាពចំនួន ៣៧០គ្រួសារ និងមានមនុស្សស្លាប់ ដោយសារលង់ទឹកចំនួន ៦នាក់ រួមនិងការលិចលង់ផ្ទះសម្បែង ផលដំណាំស្រូវ ដំណាំរួមផ្សំ មណ្ឌលសុខភាព ផ្លូវលំ អណ្តូងទឹក ទំនប់ ប្រឡាយ។ល។ ដែលត្រូវស្តារឡើងវិញនៅក្រោយគ្រោះទឹកជំនន់។
ឯកឧត្តមទេសរដ្ឋមន្ត្រី ញឹម វណ្ណដា មានប្រសាសន៍ថា មិនថាតែកម្ពុជាទេ គឺនៅបណ្តាប្រទេសជាច្រើនទៀត គឺបាន និងកំពុងទទួលរងនូវគ្រោះធម្មជាតិ មានគ្រោះទឹកជំនន់ ខ្យល់ ព្យុះជាដើម ដែលបានបង្កនូវមហន្តរាយយ៉ាងធ្ងន់ធ្ងរដល់ប្រជាពលរដ្ឋ តួយ៉ាងដូចជានៅប្រទេសឥណ្ឌាកំពុងមានគ្រោះទឹកជំនន់ នៅរដ្ឋហាវ៉ៃសហរដ្ឋអាមេរិកបានជួបនូវគ្រោះកាចនៃ ខ្យល់ព្យុះ។ល។ ឯកឧត្តមថា ពិភពផែនដីកំពុងតែមានការប្រែប្រួលនៃអាកាសធាតុដ៏គួរព្រួយបារម្ភ ដែលវាបង្កនូវគ្រោះថ្នាក់កាន់តែខ្លាំងទៅៗ ដែលពិបាកនឹងទប់ទល់។ ឯកឧត្តមរដ្ឋមន្ត្រី ញឹម វណ្ណដា ក៏បានណែនាំដល់គណៈកម្មាធិការគ្រប់គ្រងគ្រោះមហន្តរាយខេត្តព្រៃវែង ឲ្យបន្តតាមដានជាប់ជាប្រចាំនូវស្ថានភាពគ្រោះមហន្តរាយពីធម្មជាតិ និងត្រូវមានវិធានការណ៍ក្នុងការឆ្លើយតបជាបន្ទាន់ទៅនឹងគ្រោះមហន្តរាយនេះ៕
Source: Kampuchea Thmey Daily
0 Comments