នៅថ្ងៃសុក្រ ព្យុះទីហ្វុងដ៏មានឥទ្ធិពលមួយបានវាយប្រហារលើផ្នែកខ្លះនៃភាគខាងលិចប្រទេសជប៉ុនដែលរងគ្រោះរួចទៅហើយ ដោយសារទឹកជំនន់កាលពីខែមុន ប៉ុន្តែខណៈដែលការដឹកជញ្ជូនត្រូវបានរំខាននោះ មានសេចក្តីរាយការណ៍ជាបន្ទាន់ខ្លះអំពីការរងរបួសឬការខូចខាត។
យោងតាមទីភ្នាក់ងារឧតុនិយមជប៉ុនបានឲ្យដឹងថា ព្យុះទីហ្វុង Cimaron បានបង្កឲ្យមានការបាក់ដីកាលពីល្ងាចថ្ងៃព្រហស្បតិ៍ហើយឆ្លងកាត់លើប្រជុំកោះរបស់ប្រទេសជប៉ុននៅពេលយប់ដោយនាំមកជាមួយនឹងកម្លាំងខ្យល់ក្នុងល្បឿនជិត២០០គីឡូម៉ែត្រក្នុងមួយម៉ោងនិងទម្លាក់ទឹកភ្លៀងក្នុងកម្រិត៦០០មីល្លីម៉ែត្រក្នុងរយៈពេល៤៨ម៉ោង។
ព្យុះនេះបានបណ្តាលឲ្យប្រជាពលរដ្ឋជិត១០០,០០០គ្រួសារគ្មានអគ្គិសនីនិងបង្ខំឲ្យក្រុមហ៊ុនអាកាសចរណ៍នានាត្រូវលុបចោលជើងហោះហើរប្រមាណ៣០០ជើងនៅថ្ងៃព្រហស្បតិ៍និងថ្ងៃសុក្រ។ សេវាកម្មរថភ្លើងល្បឿនលឿននៅក្នុងតំបន់ក៏ត្រូវបានលុបចោលជាបណ្តោះអាសន្នផងដែរបើទោះបីជាពួកគេបានបើកដំណើរការជាថ្មីម្តងទៀតនៅព្រឹកថ្ងៃសុក្រក៏ដោយ។
ក្រុមមន្ត្រីបានព្រមានប្រជាពលរដ្ឋឲ្យប្រុងប្រយ័ត្នចំពោះទឹកជំនន់ ការបាក់ដីនិងរលកខ្ពស់ដោយប្រធានទីភ្នាក់ងារឧតុនិយមលោក Ryuta Kurora បាននិយាយថា ព្យុះទីហ្វុងនេះអាចនាំមកនូវ “បាតុភូតគ្រោះថ្នាក់ជាច្រើន”។
ព្យុះទីហ្វុង Cimaron បានបន្តដំណើរឆ្ពោះទៅកោះហុកកៃដូភាគខាងជើងប្រទេសជប៉ុនដែលជាកន្លែងវាត្រូវបានគេរំពឹងថានឹងបង្កឲ្យមានការបាក់ដីនៅថ្ងៃសុក្របើទោះបីជាល្បឿនខ្យល់បានថយចុះក៏ដោយ។
គួរបញ្ជាក់ថា ព្យុះ Cimaron បានកើតឡើងក្រោយព្យុះទីហ្វុង Soulik ដែលបានឆ្លងកាត់ភាគខាងត្បូងប្រទេសជប៉ុនកាលពីដើមសប្តាហ៍នេះដោយនាំមកនូវភ្លៀងធ្លាក់ខ្លាំងដល់ផ្នែកខ្លះនៃកោះ Kyushu ភាគខាងត្បូង។
ព្យុះទីហ្វុងនេះគឺជាបញ្ហាអាកាសធាតុចុងក្រោយបំផុតដែលបានវាយប្រហារប្រទេសជប៉ុន។ វាបានកើតឡើងក្រោយការធ្លាក់ភ្លៀងយ៉ាងធ្ងន់ធ្ងរនៅភាគកណ្តាលនិងភាគខាងលិចនៃប្រទេសនេះកាលពីខែកក្កដាដែលបានសម្លាប់មនុស្សជាង២០០នាក់៕ AFP
Source: Kampuchea Thmey Daily
0 Comments