ក្លិប​ភ្នំពេញ​ក្រោ​ន ប្រកាស​ចែកផ្លូវ​ជាមួយ​កីឡាករ​បរទេស​ម្នាក់​ជា​ជម្រើសជាតិ​ប្រទេស​ឡេ​សូ​តូ​ក្នុង​ទ្វីបអាហ្វ្រិក

​នៅសល់​៤​ប្រកួត​ទៀត​ប៉ុណ្ណោះ​ទើប​ពានរង្វាន់​លី​គ​កំពូល​កម្ពុជា Metfone Cambodian League 2018 នឹង​បញ្ចប់​រដូវ​កាល​របស់​ខ្លួន ខណៈ​ក្លិប​បាល់ទាត់​ភ្នំពេញ​ក្រោ​ន បាន​ប្រកាស​ចែកផ្លូវ​ជាមួយ​កីឡាករ​មួយ​រូប​ជា​ខ្សែប្រយុទ្ធ​នៅក្នុង​ក្រុម​ជម្រើសជាតិ​នៃ​ប្រទេស​ឡេ​សូ​តូ ក្នុង​ភាគ​ខាងត្បូង​ទ្វីបអាហ្វ្រិក​។

​យោង​តាម​សេចក្តី​ជូនដំណឹង​របស់​ក្រុម​ជើងឯក​លី​គ​កំពូល​កម្ពុជា​៦​សម័យកាល​បាន​បញ្ជាក់​ថា ​កីឡាករ​ដែល​បញ្ចប់​កិច្ចសន្យា​នេះ​មាន​ឈ្មោះថា​ Tsotleho JANE ហៅ​ក្រៅ​ថា​Sunny។ កីឡាករ Sunny បាន​ចូលរួម​ជាមួយ​ភ្នំពេញ​ក្រោ​ន​កាលពី​ដើមខែ​កុ​ម្ភៈ ដែល​គេ​គឺជា​ចំណែក​មួយ​ដ៏​សំខាន់​របស់​ក្រុម​ក្នុង​ការប្រកួត​ពានរង្វាន់​លី​គ​កំពូល​កម្ពុជា​នា​ពេល​កន្លងមក​។ ក្លឹប​បាល់ទាត់​ភ្នំពេញ​ក្រោ​ន បាន​ជូនពរ​កីឡាករ​សញ្ជាតិ​ឡេ​សូ​តូ​រូបនេះ​ទទួល​បាន​ជោគជ័យ​ក្នុងការ​ប្រកួត​ជាមួយ​ក្រុម​ជម្រើសជាតិ ក៏ដូចជា​ជោគជ័យ​ក្នុង​អាជីព​របស់ខ្លួន​នាពេលខាងមុខ​។



កីឡាករ​វ័យ ២៦​ឆ្នាំ​រូប​នេះ​បាន​ចាប់​កំណើត​នៅ​រាជធានី Maseru នៃ​ប្រទេស​របស់​ខ្លួន​។ រូបគេ បានចាប់ផ្តើម​ចូល​ហ្វា​ត់បាល់​ទាត់​តាំងពី​អាយុ​៤​ឆ្នាំ បន្ទាប់មក​បាន​ចូល​លេង​នៅ​ក្លិប Ranger FC (​ពី​ឆ្នាំ​១៩៩៥-១៩៩៨) រួច​បាន​ប្តូរ​ទៅលេង​នៅ​ក្លិប Emmanuel FC ពី​ឆ្នាំ​១៩៩៨-២០០៣ ។ កីឡាករ Sunny បាន​ផ្លាស់​ទៅ​រស់នៅ​ទីក្រុង Louisville Kentucky របស់​សហរដ្ឋអាមេរិក​ក្នុង​ឆ្នាំ​២០០៤ ហើយ​នៅលើ​ទឹកដី​ថ្មី​រូបគេ​បាន​ចូលរួម​លេង​ឱ្យ​ក្រុម​ប្រចាំ​មហាវិទ្យាល័យ Maryland Terrapin ពី​ឆ្នាំ​២០១០-២០១៣ ក៏ដូចជា​ក្លឹប United FC ក្នុង​ឆ្នាំ​២០១៣ ទើប​ប្តូរ​ទៅលេង​នៅ​លី​គ​ទី​២ អាមេរិក​ជាមួយ​ក្លិប Wilmington Hammerheads ពី​ឆ្នាំ​២០១៤-២០១៥ ព្រមទាំង​ក្លិប Richmond Kickers ក្នុង​ឆ្នាំ​២០១៦ កន្លងមក​។

កីឡាករ​រូប​នេះ​បាន​ជាប់​ជម្រើសជាតិ​នៃ​ប្រទេស​ឡេ​សូ​តូ តាំងតែ​ពី​ឆ្នាំ​២០១៤ រហូតដល់​បច្ចុប្បន្ន​ថែ​ម​ទៀតផង​។

យោង​តាម​គោល​ការ​របស់​សហព័ន្ធ​កីឡាបាល់ទាត់​កម្ពុជា ស្របតាម​សហព័ន្ធ​កីឡាបាល់ទាត់​អាស៊ី កំណត់​ថា ​ក្លិប​ជា​សមាជិក​លី​គ​របស់​ខ្លួន​អាច​ចុះបញ្ជី​កីឡាករ​បរទេស​បាន​៥​នាក់ ប៉ុន្តែ​ក្នុង​នោះ​ត្រូវមាន​កីឡាករ​អាស៊ី​១​រូប (​រូបមន្ត ៤+១)​។ ដូច្នេះ​នេះ​ជាការ​ចាកចេញ​របស់​កីឡាករ​បរទេស​ទី​២​នៅក្នុង​ក្លិប​ភ្នំពេញ​ក្រោ​ន បន្ទាប់ពី​ការចាកចេញ​របស់​ខ្សែប្រយុទ្ធ Pouya Hossein ជនជាតិ​អ៊ីរ៉ង់ កាលពីដើម​ខែសីហា នេះ​។ ភ្នំពេញ​ក្រោ​ន នៅ​កីឡាករ​បរទេស​៣​នាក់​ប៉ុណ្ណោះ ក្នុង​បញ្ជី​ដោយ​ក្នុងនោះ​មាន​ខ្សែការពារ Jonny Campbell ជនជាតិ​អាមេរិក ខ្សែប្រយុទ្ធ​ប្រេ​ស៊ី​ល Valci Júnior និង​កីឡាករ Atsushi Shirot ជនជាតិជប៉ុន៕

 

Source: Kampuchea Thmey Daily