ភ្នំពេញ ៖ នៅថ្ងៃសុក្រទី២៤ ខែសីហា ឆ្នាំ២០១៨ ក្រសួង ធនធានទឹក និងឧតុនិយមជូនដំណឹងពីការធ្លាក់ភ្លៀង និង ការជន់ ឡើងជាថ្មីម្តងទៀតនៃទឹកទន្លេមេគង្គ ដោយសារប្រព័ន្ធសម្ពាធទាបបានកើតឡើងនៅលើតំបន់អាងទន្លេមេគង្គ ក្នុងប្រទេសថៃ និង ប្រទេសឡាវ។
ក្នុងសេចក្តីជូនដំណឹងបញ្ជាក់ថា យោងតាមឥទ្ធិពលខ្យល់មូសុងនីរតីខ្សោយខាងលើនេះនឹងធ្វើឲ្យអាកាស ធាតុនៅក្នុងប្រទេសកម្ពុជា និងនៅតំបន់អាងទន្លេមេគង្គមានស្ថានភាពដូចខាងក្រោម ៖ ១-សម្រាប់ប្រទេសកម្ពុជា ៖ បណ្តាខេត្តដែលស្ថិតនៅតាមបណ្តោយព្រំដែនកម្ពុជា-វៀតណាម អាចនឹងមាន ភ្លៀងធ្លាក់ ក្នុងកម្រិតពីបង្គួរទៅច្រើន និងបណ្តារាជធានីខេត្តដទៃទៀត អាចនឹងមានភ្លៀងធ្លាក់ពីតិចទៅបង្គួរ។
២-តំបន់អាងទន្លេមេគង្គ ៖ ចាប់ពីតំបន់ស្ថានីយតម្រងទឹកភ្លៀង-ជលសាស្ត្រ នគរភ្នំ(ខ្សែវ័ណ្ឌទី១៧ នៃរយៈ ទទឹងខាងជើង) ទៅទិសខាងលិច អាចនឹងមានភ្លៀងធ្លាក់រាយប៉ាយពីបង្គួរទៅច្រើន ។ ការធ្លាក់នេះ អាចនឹង បង្កឲ្យទឹកទន្លេមេគង្គហក់ឡើងជាថ្មីម្តងទៀត ។
ក្រសួងធនធានទឹកក៏បានបញ្ជាក់ផងដែរថា ករណីនេះមន្ត្រីជំនាញនឹងកំពុងបន្តតាមដានលើបាតុភូតធម្មជាតិ នេះយ៉ាងយកចិត្តទុកដាក់ ហើយនឹងជម្រាបជូនព័ត៌មានជាបន្តបន្ទាប់បន្ថែមទៀត៕
Source: Kampuchea Thmey Daily
0 Comments