ឥណ្ឌូនេស៊ី​ស្វែងរក​កិច្ចសហការ​ជាមួយ​អាជ្ញាធរ​ជាតិ​អប្សរា​ដើម្បី​ចុះ​អនុស្សារណៈ​រវាង​រមណីយដ្ឋាន​អង្គរ និង​រមណីយដ្ឋាន Borobudur

​សៀមរាប​ ៖​ នៅព្រឹក​ថ្ងៃទី​២៤ ខែសីហា ឆ្នាំ​២០១៨ នៅ​ស្នាក់​ការ​អាជ្ញាធរ​ជាតិ​អប្សរា លោក ហង់ ពៅ អគ្គនាយករង​តំណាង​ឯកឧត្តម ស៊ុំ ម៉ាប់ អគ្គនាយក​អាជ្ញាធរ​ជាតិ​អប្សរា អនុញ្ញាត​ឲ្យ​លោក Ricky SP Siahaan ប្រធាន​ផ្នែក​ទីផ្សារ​និង​សេវាកម្ម​នៃ​PT Taman Wisata Candi ដែល​គ្រប់គ្រង​រមណីយដ្ឋាន Borobudur ប្រទេស​ឥណ្ឌូនេស៊ី ចូលជួប​សំណេះសំណាល ផ្លាស់ប្តូរ​យោបល់​គ្នា​ទៅវិញទៅមក​ដើម្បី​ពង្រីក​កិច្ច​សហប្រតិបត្តិការ​ទៅវិញទៅមក​រវាង​តំបន់​បេតិកភណ្ឌ​ពិភពលោក​របស់​ប្រទេស​ទាំងពីរ គឺ​រមណីយដ្ឋាន​អង្គរ និង​រមណីយដ្ឋាន Borobudur​។



លោក Ricky SP Siahaan មានប្រសាសន៍ថា លោក​ពិត​ជា​មាន​ក្តី​រំភើប​ដែល​បាន​មក​កាន់​ទីនេះ ស្រប​ពេល​ពេល​ថ្មីៗ​នេះ ប្រាសាទអង្គរវត្ត​រប​ស់​កម្ពុជា ជាប់​ចំណាត់ថ្នាក់​ជា​សំណង់​ប្រវត្តិសាស្ត្រ​ដ៏​អស្ចារ្យ​បំផុត ធ្វើឡើង​តាមរយៈ​ការ​ស្រង់​មតិ លើ​ចំណាប់អារម្មណ៍ និង​ទស្សនៈ​របស់​អ្នកទេសចរ​រាប់​លាន​នាក់​ជុំវិញ​ពិភពលោក ជា​ចំណុច​ដែល​ប្រទេស​ឥណ្ឌូណេស៊ី​ចាប់អារម្មណ៍ មានបំណង​ចង់​ធ្វើ​កិច្ច​សហប្រតិបត្តិការ​រវាង​រមណីយដ្ឋាន​អង្គរ របស់​កម្ពុជា​និង​រមណីយដ្ឋាន Borobudur របស់​ឥណ្ឌូណេស៊ី ដើម្បី​ផ្លាស់​ប្តូរ​បទពិសោធន៍ ចំណេះដឹង​ល្អៗ ដូចជា​ការ​អភិរក្ស​ការគ្រប់គ្រង ការ​អភិវឌ្ឍន៍ សេវាកម្ម​ផ្សេងៗ​។ ក្នុង​នោះ តាមរយៈ​កម្មវិធី Twin World Heritage Program ខាង​ភាគី​ឥណ្ឌូណេស៊ី​មានបំណង​បង្កើត​កិច្ចព្រមព្រៀង​រវាង​ស្ថាប័ន​ទាំងពីរ​ដើម្បី​ជំរុញ​ការ​ផ្សព្វផ្សាយ​អំពី​គ្នា​ទៅវិញទៅមក និង​ទាក់ទាញ​ភ្ញៀវទេសចរ​ឲ្យ​កាន់​តែ​ច្រើន​។



ថ្លែង​ក្នុង​ជំនួប​នោះ លោក ហង់ ពៅ បាន​សម្តែង​នូវ​អំណរ​សាទរ​យ៉ាង​ជ្រាលជ្រៅ​ចំពោះ​គណៈប្រតិភូ​ឥណ្ឌណេ​ស៊ីថា នេះ​មិនមែន​ជា​លើកទីមួយ​ទេ​ដែល​អាជ្ញាធរ​ជាតិ​អប្សរា​ចែករំលែក​បទពិសោធន៍​ល្អៗ លើ​ការ​អភិរក្ស ការ​ជួសជុល ការគ្រប់គ្រង​រមណីយដ្ឋាន​អង្គរ​ដល់​បណ្តា​ប្រទេស​ផ្សេងៗ​ដែល​មានបំណង​ស្វែងយល់​អំពី​បទពិសោធន៍​ក្នុង​ការ​គ្រប់គ្រង អភិរក្ស និង​អភិវឌ្ឍន៍​ដោយ​ចីរភាព​នៃ​រមណីយដ្ឋាន​អង្គរ​។



លោក សង្កត់ធ្ងន់ថា អាជ្ញាធរ​ជាតិ​អប្សរា​ពេញចិត្ត​នឹង​ស្វាគមន៍​រាល់​កិច្ច​សហប្រតិបត្តិការ​ដែល​បម្រើ​ដល់​ប្រយោជន៍​បេតិកភណ្ឌ​ទាំងមូល​។ ម្យ៉ាងទៀត​ទស្សនវិស័យ​ក្នុងការ​អភិរក្ស និង​ការ​អភិវឌ្ឍ​បេតិកភណ្ឌ​ពិភពលោក​រវាង​ប្រទេស​ទាំងពីរ គឺ​មាន​ទស្សនវិស័យ​ប្រហាក់ប្រហែល​គ្នា ងាយ​សហការ​គ្នា​រីកចម្រើន​ទៅមុខ និង​មាន​ចំណុច​ពិសេស​សម្រាប់​ការ​ផ្លាស់ប្តូរ​បទ​ពិសោធ​ន៍​រវាង​កម្ពុជា និង​ឥណ្ឌូណេស៊ី​ក្នុង​ការ​អភិរក្ស​ប្រាសាទ ការ​អភិវឌ្ឍ​វិស័យ​ទេសចរណ៍​។ លោក​បន្ថែម​ថា ​ជោគជ័យ​រមណីយដ្ឋាន​អង្គរ​មកដល់ពេលនេះ គឺ​ដោយមាន​ការ​ខិតខំ និង​សហ​ការណ៍​ពី​ស្ថាប័ន​ជាតិ និង​អន្តរជាតិ​ផ្សេងៗ​ដែល​ធ្វើការ​ពាក់ព័ន្ធ​នឹង​វិស័យ​បេតិកភណ្ឌ​៕

   

Source: Kampuchea Thmey Daily