កណ្តាល ៖ នៅថ្ងៃទី២៤ ខែសីហា ឆ្នាំ២០១៨ នេះ ប្រធានយុវជនកិច្ចការសង្គមរបស់គណបក្សប្រជាជនកម្ពុជា និងជាអនុប្រធានទី១ នៃគណៈពង្រឹងមូលដ្ឋានឃុំត្រើយស្លា ស្រុកស្អាង ខេត្តកណ្ដាល បានសហការជាមួយអាជ្ញាធរ និងប្រជាពលរដ្ឋផ្តើមចាក់ផ្លូវបេតុងប្រវែង៦៣៨ម៉ែត្រ នៅភូមិទួលក្តី២ ស្ថិតនៅឃុំត្រើយស្លា ស្រុកស្អាង ដែលជាគម្រោងទី៥៦ នេះបើតាមការបញ្ជាក់របស់កញ្ញា ធី សុវណ្ណថា។
កញ្ញា ធី សុវណ្ណថា បានបញ្ជាក់នៅលើបណ្តាញសង្គមហ្វេសប៊ុកផ្លូវការរបស់ខ្លួន កាលពីព្រឹកថ្ងៃទី២៤ ខែសីហា ថា “ថ្ងៃនេះ ចាក់ផ្លូវបេតុង 638m/1km (គម្រោងទី៥៦) ភូមិទួលក្តី(២) ឃុំត្រើយស្លា ស្រុកស្អាង... ថវិកានាងខ្ញុំ សហការណ៍ជាមួយប្រជាជន”។
សូមបញ្ជាក់ថា កញ្ញា ធី សុវណ្ណថា ត្រូវបានសម្តេចអគ្គមហាសេនាបតីតេជោ ហ៊ុន សែន ប្រធានគណបក្ស សម្រេចតែងតាំងជាអនុប្រធានទី១ នៃគណៈពង្រឹងមូលដ្ឋានឃុំត្រើយស្លា ខេត្តកណ្តាល កាលពីថ្ងៃទី០៩ ខែមីនា ឆ្នាំ២០១៨ ហើយក្រោយពីបានក្លាយជាអនុប្រធានទី១ នៃគណៈពង្រឹងមូលដ្ឋានឃុំត្រើយស្លា ខេត្តកណ្តាលរួចមក កញ្ញា ធី សុវណ្ណថា បានជួយឲ្យប្រជាពលរដ្ឋនៅឃុំត្រើយស្លា ស្រុកស្អាងទាំងអស់ ទទួលបានសេវាពិនិត្យ ព្យាបាលជំងឺទូទៅ និងសម្រាលកូននៅមណ្ឌលសុខភាពឃុំ ដោយមិនគិតថ្លៃ១០០ភាគរយ ហើយគំរោងមួយចំនួនទៀត ដូចជាការដាក់ភ្លើងបំភ្លឺផ្លូវ បន្ថែមបង្គោលភ្លើងទូទាំង៩ភូមិ គម្រោងសាងសង់ផ្លូវ ស្ពាន និងសេវាជាច្រើនទៀត ត្រូវបានផ្តល់ដល់ប្រជាពលរដ្ឋនៅទីនោះ។
ដោយសារតែការខិតខំជួយប្រជាពលរដ្ឋនៅទីនោះ ដែលពីមុនមុនជាអ្នកប្រឆាំងរាជរដ្ឋាភិបាល និងជាអ្នកចេញមុខធ្វើបាតុកម្មយ៉ាងខ្លាំងផងដែរនោះ តែអាណត្តិនេះ បានងាកមកគាំទ្ររាជរដ្ឋាភិបាល យ៉ាងគគ្រឹកគគ្រេង ដែលអាចនិយាយបានថា ជាការបំបែកឯកត្តកម្មប្រវត្តិសាស្ត្រ៕
Source: Kampuchea Thmey Daily
0 Comments