ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានៅតែបន្តការណែនាំទៅដល់កីឡាករ-កីឡាការិនីកម្ពុជាដាច់ខាត មិនត្រូវបំពានវិធានហាមឃាត់ក្នុងពេលប្រកួតនិងមិនត្រូវប្រើប្រាស់សារធាតុលើកកម្លាំងក្នុងពេលចូលរួមប្រកួតឡើយ។
សម្តេចតេជោនាយករដ្ឋមន្ត្រីបានក្រើនរំលឹកកីឡាករ កីឡាការិនីបែបនេះនៅក្នុងពិធីជួបសំណេះ សំណាលជាមួយអត្តពលិក កីឡាករ-កីឡាការិនី គ្រូបង្វឹក រួមនឹងប្រតិភូកីឡាចំនួន ៧១ នាក់ នៅវិមានសន្តិភាពនាថ្ងៃទី០៦ ខែសីហា ឆ្នាំ២០១៨ មុននឹងពួកគេចេញទៅចូលរួមប្រកួតកីឡា Asian Games នៅប្រទេសឥណ្ឌូនេស៊ី។
សម្តេចតេជោនាយករដ្ឋមន្ត្រីបានផ្តាំដល់កីឡាករ-កីឡាការិនីកម្ពុជាថា លទ្ធផលចាញ់-ឈ្នះយ៉ាងណានោះ គឺជារឿងធម្មតាទេសម្រាប់ការប្រកួតកីឡា។ សម្ដេចបានលើកទឹកចិត្តនិងសំណូមពរ ២ចំណុចទៅកាន់កីឡាករ-កីឡាការិនីកម្ពុជាគឺដាច់ខាតមិនត្រូវបំពានវិធានហាមឃាត់ក្នុងពេលប្រកួត និង មិនត្រូវប្រើប្រាស់សារធាតុលើកកម្លាំងក្នុងពេលចូលរួមប្រកួតឡើយ។
សម្តេចតេជោ ហ៊ុន សែន មានប្រសាសន៍ថា «បើទោះបីជាមិនបានមេដាយអ្វីក៏ដោយចុះ តែយើងនៅតែជាកីឡាករថ្លៃថ្នូរ តែបើបានមកដោយការប្រើប្រាស់សារធាតុហាមឃាត់មិនមែនជាមោទនភាពសម្រាប់ ជាតិកម្ពុជាមួយនេះទេ»។
ជាមួយគ្នានេះសម្តេចតេជោ ហ៊ុន សែន ក៏បានផ្តល់ជា អនុសាសន៍គន្លឹះដល់សហព័ន្ធកីឡាទាំងអស់កុំឲ្យព្យាយាមទម្លាក់ទម្ងន់របស់កីឡាករ ដើម្បីបានចូលរួមប្រកួត។ សម្តេចបានលើកឡើងនូវបទពិសោធន៍ផ្ទាល់របស់សម្តេចថា សម្តេចបានធ្វើការបញ្ចុះទម្ងន់អស់រយៈពេល៨ឆ្នាំមកហើយ តែមិនសូវបានផលវិជ្ជមាននោះឡើយ ដូច្នេះហើយទើបសម្ដេចបានដាស់តឿនដល់គ្រូបង្វឹក ក៏ដូចជាសហព័ន្ធកីឡាទាំងអស់ ត្រូវពិចារណាលើបញ្ហាបញ្ចុះទម្ងន់កីឡាករ-កីឡាការិនីឡើងវិញ។ មិនអាចហេតុតែចង់ឲ្យទម្ងន់កីឡាកររបស់ខ្លួនស្មើនឹងទម្ងន់កីឡាករគេ ហើយមកប្រើថ្នាំបញ្ចុះទម្ងន់កីឡាករខ្លួនឯងនោះទេ ពីព្រោះអាចធ្វើកីឡាករកម្ពុជាចាញ់កម្លាំងកីឡាករបរទេសក្នុងពេលប្រកួត ឬ ប៉ះពាល់ដល់សុខភាពថែមទៀតផង។
សម្ដេចតេជោនាយករដ្ឋមន្ត្រីបានមានប្រសាសន៍ថា «ខ្ញុំសុំដាស់តឿនទាំងគ្រូបង្ហាត់ទាំងគ្រប់សហព័ន្ធ ៖ការបញ្ចុះគីឡូកីឡាករ-កីឡាការិនី ដើម្បីឲ្យស្មើគីឡូជាមួយគេ (កីឡាករបរទេស) ដែល សន សៀវម៉ី ធ្លាប់បានបញ្ចុះគីឡូម្ដងរួចហើយទៅប្រកួត។ សូមឲ្យប្រយ័ត្នប្រយែងលើបញ្ហាការទម្លាក់គីឡូដែលធ្វើឲ្យ បាត់បង់សមត្ថភាពប្រកួតរបស់កីឡាករ-កីឡាការិនីរបស់យើង»។
ជាមួយគ្នានោះ សម្ដេចក៏បានណែនាំឲ្យគ្រូបង្វឹកក៏ដូចជាកីឡាករ-កីឡាការិនីខ្លួនឯងគប្បីរិះរកវិធីណាមួយដើម្បីឲ្យទម្ងន់របស់ខ្លួនស្មើជាមួយកីឡាករបរទេសដោយមិនធ្វើតាមការបញ្ចុះទម្ងន់ភ្លាមៗ គួរតែប្រើវិធីបញ្ចុះក្នុងរយៈពេលណាមួយ ហើយហាត់ប្រាណទប់ទល់ឡើងវិញ ទើបជាការល្អ រីឯការប្រើប្រាស់ថ្នាំបញ្ចុះទម្ងន់ គឺមិនល្អនោះឡើយ។
បើយោងតាមលោក ថោង ខុន ប្រធានគណៈកម្មាធិការជាតិអូឡាំពិកកម្ពុជាបានឲ្យដឹងថា ប្រតិភូកីឡាកម្ពុជាមានចំនួន៧១នាក់ ដែលរួមមានទាំងគ្រូបង្វឹក កីឡាករ-កីឡាការិនី ដែលត្រូវបានក្រសួងអប់រំ យុវជននិងកីឡានិងគណៈកម្មាធិការជាតិអូឡាំពិកកម្ពុជាសម្រិតសម្រាំងត្រៀមបញ្ជូនទៅប្រកួតកីឡាអាស៊ី ហ្គេម Asian Games លើកទី១៨ នៅឥណ្ឌូនេស៊ីចាប់ពីថ្ងៃទី១៨ ខែសីហា រហូតដល់ថ្ងៃទី០២ ខែកញ្ញាខាងមុខ។
ប្រភេទកីឡាដែលកម្ពុជាបញ្ជូនទៅចូលរួមប្រកួតលើកនេះមាន ១៣ ប្រភេទកីឡាមានដូចជាកីឡា អត្តពលកម្ម ហែលទឹក តេក្វាន់ដូ យូដូ ចំបាប់ គុនដាវ ម៉ូតូទឹក ជឺជិតស៊ូ សូហ្វតេន្នីស កាយសម្ព័ន្ធ ទូកកានូ ការ៉ាតេដូ និងកីឡាទូកក្ដោង។
នៅក្នុងពិធីនោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាក៏បានធ្វើការឧបត្ថម្ភថវិកាដល់ប្រតិភូកីឡាទាំង ៧១ នាក់ ដោយម្នាក់ទទួលបានថវិកា ៥០០ ដុល្លារ៕
Source: Kampuchea Thmey Daily
0 Comments