ក្រុមបាល់ទាត់អង្គរថាយហ្គឺរ បានប្រកាសថា ត្រៀមបញ្ជូនយុវជនចំនួន៣នាក់ ទៅហ្វឹកហាត់នៅប្រទេសជប៉ុន រយៈពេល២សប្ដាហ៍ ពោលគឺនៅចុងខែសីហានេះ ខណៈក្រុមដែលមានក្បាលម៉ាស៊ីនជាជនជាតិជប៉ុនមួយនេះធ្លាប់បានបញ្ជូនយុវជនម្នាក់ទៅកាន់ប្រទេសមហាអំណាចបាល់ទាត់ខាងលើដោយជោគជ័យម្តងរួចហើយកាលពីឆ្នាំ២០១៧កន្លងទៅ។
យោងតាមសេចក្តីជូនដំណឹងរបស់ក្លិបកាលពីពេលថ្មីៗបានបញ្ជាក់ថា ក្លិបនឹងបញ្ជូនកីឡាករវ័យក្មេង៣នាក់ ឲ្យទៅហ្វឹកហាត់នៅប្រទេសជប៉ុនចំនួន២ សប្តាហ៍។ កីឡាករវ័យក្មេង៣នាក់រួមមាន កីឡាករ ភាព ចាន់ដេវីត, ចិន ណារក្ស និងសុវណ្ណ ដូណា នឹងធ្វើដំណើរទៅកាន់ប្រទេសជប៉ុនចាប់ពីថ្ងៃទី១៦ ខែសីហានេះ រហូតដល់ ថ្ងៃទី៣០ ខែសីហា ឆ្នាំ២០១៨ ដើម្បីចូលរួមហ្វឹកហាត់ជាមួយសាលាបាល់ទាត់Vivaio Funabashi S.C ដែលសិ្ថតនៅទីក្រុង Funabashi ក្នុងខេត្ត Chiba និងទៅទស្សនាការប្រកួតបាល់ទាត់ J-League ផងដែរ។
នេះជាលើកទី២ ហើយដែលក្លិបបាល់ទាត់អង្គរថាយហ្គឺរ បានបញ្ជូនកីឡាកររបស់ខ្លួន ទៅហ្វឹកហាត់នៅប្រទេសជប៉ុន ដែលកាលពីឆ្នាំ២០១៧ ក្លឹបបានបញ្ជូនកីឡាករ ភាព ចាន់ដេវីត អោយទៅហ្វឹកហាត់នៅប្រទេសជប៉ុន រយៈពេល១ សប្តាហ៍ និងបានទៅជួបកីឡាករ ចាន់ វឌ្ឍនាកា ថែមទៀតផង ដែលកាលនោះកីឡាករ ចាន់ វឌ្ឍនាកា កំពុងប្រកបអាជីពជាមួយ ក្លឹប Fujieda MYFC។
ក្រុមអង្គរថាយហ្គឺរ បានប្តូរឈ្មោះមកពីក្រុមត្រាយអាស៊ីភ្នំពេញ កាលពីចុងរដូវកាល២០១៤ ហើយនៅរដូវកាល២០១៥ គឺជាកំណត់ត្រាល្អរបស់ក្លិបពោលគឺ អាចឡើងដល់វគ្គ៤ក្រុមចុងក្រោយទាំងពានរង្វាន់សម្តេច ហ៊ុន សែន និងពានរង្វាន់មិត្តហ្វូនខេមបូឌានលីក ក្រោយឈរចំណាត់ថ្នាក់លេខ៣ដូចគ្នា។ ក្រុមនេះ ទទួលបានសិទ្ធិប្រើប្រាស់កីឡដ្ឋានខេត្តសៀមរាប ពីក្រសួងអប់រំយុវជននិងកីឡា កាលពីរដូវកាលឆ្នាំ២០១៧ កន្លងធ្វើជាទឹកដីរបស់ខ្លួនរាល់ការប្រកួតនានា។
លោក Akihiro Kato ប្រធានក្លិបអង្គរថាយហ្គឺរ ធ្លាប់បានបញ្ជាក់ជុំអនាគតរបស់ក្លិបនៅទឹកដីខេត្តសៀមរាបថា «ខ្ញុំមានហេតុផលពីរយ៉ាង ដោយទី១ គឺចង់ផ្ដល់ទំនុកចិត្តទៅលើសក្តានុពលនិងទេពកោសល្យរបស់ពួកគេព្រោះខ្ញុំគិតថា ពួកគេនឹងអាចក្លាយទៅជានិមិត្តរូបបាល់ទាត់កម្ពុជា។ ចំណែកទី២ វាជាផ្នែកមួយនៃផែនការរបស់ខ្ញុំ ដែលចង់បង្កើតយុគមាសសម្រាប់អង្គរថាយហ្គឺរ ក្នុងពេល៥ទៅ១០ឆ្នាំខាងមុខ។ ខ្ញុំដាក់គោលដៅឲ្យអង្គរថាយហ្គឺរ ក្លាយជាក្លិបលេខ១ក្នុងតំបន់អាស៊ាន ហើយខ្ញុំរំពឹងថា កីឡាករទាំងអស់នឹងលះបង់ខ្ពស់ ដើម្បីសម្រេចទស្សនវិស័យរបស់យើង។ អង្គរថាយហ្គឺរ ចង់ក្លាយជានិមិត្តរូបនៃក្ដីសុបិន្ត ក្ដីសង្ឃឹមនិងកម្លាំងចិត្ត សម្រាប់ប្រជាពលរដ្ឋខេត្តសៀមរាប ក៏ដូចជាកម្ពុជាទាំងមូល៕
Source: Kampuchea Thmey Daily
0 Comments