សៀមរាប ៖ កម្លាំងនគរបាលខេត្តសៀមរាបសហការជាមួយកម្លាំងនគរបាលខេត្តបន្ទាយមានជ័យ និងដោយមានការសម្របសម្រួលពីតំណាងអយ្យការខេត្តទាំង២ ទើបអាចចាប់ឃាតកដៃឆៅ ដែលបានយកកាំបិតបុ័ងតោអារ.កសម្លាប់បុរសវ័យចំណាស់នៅស្រុកសូទ្រនិគម។
ហេតុការណ៍ឃាត់ខ្លួនជនសង្ស័យនេះ ធ្វើឡើងនៅវេលាម៉ោង១៦និង៣០នាទី ថ្ងៃទី០៦ខែសីហា ឆ្នាំ២០១៨ ស្ថិតក្នុងភូមិគុតតាសត ឃុំគុតតាសត ស្រុកអូរជ្រៅ ខេត្តបន្ទាយមានជ័យ។
លោកឧត្តមសេនីយ៍ត្រី ភឹង ចន្តារ៉េត ស្នងការរង ទទួលផែនកណ្តាលព្រហ្មទណ្ឌនៃស្នងការដ្ឋានខេត្តសៀមរាប បានឲ្យដឹងថា បន្ទាប់ពីកើតហេតុលោកបានប្រជុំកម្លាំងនគរបាលជំនាញចេញប្រតិបត្តិការភ្លាមៗ។ ក្នុងនោះមានកម្លាំងសហការរួមមានកម្លាំងនគរបាលស្រុកសូទ្រនិគម, នគរបាលព្រហ្មទណ្ឌកម្រិតធ្ងន់ នគរបាលសន្តិសុខផ្ទៃក្នុង,នគរបាលខេត្តបន្ទាយមានជ័យនិងដោយមានការសម្របសម្រួលពីតំណាងអយ្យការខេត្តទាំង២ ទើបអាចចាប់ឃាតកដៃឆៅ ដែលបានយកកាំបិតបុ័ងតោអារ.កសម្លាប់បុរសវ័យចំណាស់នៅស្រុកសូទ្រនិគម នេះបានដោយជោគជ័យ។
លោកបន្តថា ជនសង្ស័យយើងចាប់បាននៅវេលាម៉ោង១៦និង៣០នាទី ថ្ងៃទី០៦ ខែសីហា ឆ្នាំ២០១៨ ស្ថិតក្នុងភូមិគុតតាសត ឃុំគុតតាសតស្រុកអូរជ្រៅ ខេត្តបន្ទាយមានជ័យ។
លោកបន្តថា ជនសង្ស័យ ឈ្មោះអ៊ុច ចាន់ណា ភេទប្រុស អាយុ២៤ឆ្នាំ មានទីលំនៅភូមិឃុំជាមួយ ជនរងគ្រោះ។
សូមរម្លឹកថា កាលពីវេលាម៉ោង២០និង២០នាទីយប់ ថ្ងៃអាទិត្យទី០៥ ខែសីហា ឆ្នាំ២០១៨ ស្ថិតនៅភូមិថ្នល់ចែក ឃុំកៀនសង្កែ ស្រុកសូទ្រនិគម មានករណីបុរសម្នាក់ ត្រូវបានគេ អារ.កសម្លាប់ ដោយប្រើកាំបិតប៉័ងតោ។ ជនរងគ្រោះ ឈ្មោះឈិត ខ្វាន់ ភេទប្រុស អាយុ៥៥ឆ្នាំ មានទីលំនៅភូមិឃុំ កើតហេតុខាងលើ។
បច្ចុប្បន្នជនសង្ស័យត្រូវបានកម្លាំងនគរបាលជំនាញខេត្តសៀមរាបនាំខ្លួនយកមកសួរនាំនៅស្នងការដ្ឋានខេត្តសៀមរាប ដើម្បីរៀបចំសំណុំរឿងបញ្ជូនទៅតុលាការចាត់ការបន្ត៕
Source: Kampuchea Thmey Daily
0 Comments