ភ្នំពេញ ៖ កម្មករសិប្បកម្មកាត់ដេរសំលៀកបំពាក់ជាង២០០នាក់ ដែលថៅកែទើបធ្វើអត្តឃាត ដោយចង.កសម្លាប់ខ្លួន កាលពីពេលថ្មីៗកន្លងមកនេះ បានប្រមូលផ្ដុំគ្នាធ្វើកូដកម្មតវ៉ាបិទផ្លូវបេតុងមុខរោងចក្រដើម្បីទាមទារប្រាក់ឈ្នួល និង ប្រាក់បំណាច់ផ្សេងៗតាមច្បាប់ការងារ ក្រោយពីសិប្បកម្មមួយនេះត្រូវបានបិទទ្វារលែងដំណើរការជាច្រើនថ្ងៃមកនោះ។
ក្រុមកម្មករបាននាំគ្នាប្រមូលផ្ដុំ កាលពីវេលាម៉ោង៩និង៣០នាទីព្រឹក ថ្ងៃទី៦ ខែសីហា ឆ្នាំ២០១៨ នៅចំណុចមុខសិប្បកម្ម«JU LI» ស្ថិតនៅក្នុងភូមិចំការឪឡឹកសង្កាត់កាកាប២ ខណ្ឌពោធិ៍សែនជ័យ។
ក្រុមកម្មករបាននិយាយថា សិប្បកម្មមួយនេះ ត្រូវបានបិទទ្វារមួយរយៈមកហើយដោយសារតែគ្មានអ្នកគ្រប់គ្រង ព្រោះថៅកែបានស្លាប់ទាំងប្ដីនិងប្រពន្ធទៅហើយ ដោយប្រពន្ធឈ្មោះLI FUZIជនជាតិចិន អាយុ៣៨ឆ្នាំ បានស្លាប់ដោយសារជំងឺនៅឯប្រទេសចិន កាលពីអំឡុងខែមិថុនា ឆ្នាំ២០១៨។
ចំណែកប្ដីឈ្មោះ KOR JU អាយុ៤៩ឆ្នាំ ជាជនជាតិកូរ៉េ ក្រោយពេលប្រពន្ធស្លាប់ចោលគាត់ ខូចចិត្តយ៉ាងខ្លាំង និង បានផឹកស្រាស្រវឹងរាល់ថ្ងៃ រហូតដល់វេលាម៉ោង៦និង៣០នាទីព្រឹកថ្ងៃទី៣០ ខែកក្កដា ឆ្នាំ២០១៨ ត្រូវបានកម្មករប្រទះឃើញគាត់ចង.កស្លាប់ មានសភាពហើមស្អុយនៅលើជាន់ទី២ផ្ទះជួលលេខ៦០៧អា ផ្លូវលេខ៦៨កាភូមិ ចំការឪឡឹក សង្កាត់កាកាប១ ខណ្ឌពោធិ៍សែនជ័យ។
កម្មករបានបន្តទៀតថា បន្ទាប់មកសិប្បកម្មខាងលើត្រូវបានបិទទ្វារ ចំណែកកម្មករជាង២០០នាក់បានស្វែងរកអ្នកទទួលខុសត្រូវលើប្រាក់ឈ្នួល និង ប្រាក់អតីតភាពការងារផ្សេងៗ ប៉ុន្តែអត់មានដំណោះស្រាយឡើយ ដោយគ្មានអ្នកចេញមុខដោះស្រាយបែបនេះទើបឈានដល់ធ្វើកូដកម្មនាំគ្នាបិទផ្លូវមុខសិប្បកម្មតែម្ដង ដើម្បីពន្លឿនការដោះស្រាយ។
ជាការឆ្លើយតបលោកវង្ស សុវណ្ណ អគ្គលេខាធិការរងនៃគណៈកម្មាធិការសម្រាប់ដោះស្រាយបាតុកម្មនិងកូដកម្មនៃក្រសួងការងារបានសំណូមពរសុំឲ្យកម្មករស្ងៀមស្ងាត់ ដោយលោកបានបញ្ជាក់ថា ក្រុមការងាររបស់លោកបានខិតខំឲ្យអស់លទ្ធភាពដើម្បីធ្វើការជូនហើយ។ ដោយពេលនេះកំពុងរៀបចំឯកសារដាក់ជូនរាជរដ្ឋាភិបាលនិងសម្ដេចអគ្គមហាសេនាបតីតេជោហ៊ុនសែន ដើម្បីស្នើសុំថវិកាបុរេប្បទាននេះហើយ។
ទន្ទឹមនឹងនោះដែរ លោកអគ្គលេខាធិការរងបាន សំណូមពរដល់បងប្អូនកម្មករទាំងអស់ធ្វើយ៉ាងណាជួយសហការជាមួយក្រុមការងារនិងអនុញ្ញាតឲ្យខាងរដ្ឋបាលនិងគណនេយ្យបានចូលប្រមូលយកឯកសារពាក់ព័ន្ធផ្សេងៗយកទៅ សហការជាមួយក្រុមការងារធ្វើការឲ្យបានលឿន៕
Source: Kampuchea Thmey Daily
0 Comments