ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា នៅថ្ងៃទី៨ ខែសីហា ឆ្នាំ២០១៨ ខាងមុខ នឹងលើកយកសំណុំរឿងលេខ០០១ ពាក់ព័ន្ធយុទ្ធនាការម្រាមដៃស្អាត ដែលគណៈកម្មការរៀបចំការបោះឆ្នោតខេត្តបាត់ដំបង សម្រេចផាកពិន័យលើបុគ្គលចំនួន៥នាក់ ក្នុងម្នាក់ៗ១០លានរៀល មកសវនាការជំនុំជម្រះ។
នៅមុនការបោះឆ្នោតជ្រើសតាំងតំណាងរាស្ត្រ នីតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨ ក្រុមប្រឹក្សាឃុំ និងភ្នាក់ងារគណបក្សប្រជាជនកម្ពុជា នៅខេត្តបាត់ដំបង បានប្តឹងក្រុមយុទ្ធនាការម្រាមដៃស្អាត ដែលគេស្គាល់ថា ជាអតីតសកម្មជនអតីតគណបក្សសង្គ្រោះជាតិ នៅខេត្តបាត់ដំបង ចំនួន៥ បណ្តឹង បន្ទាប់ពីពួកគេបានដឹកនាំធ្វើយុទ្ធនាការម្រាមដៃស្អាត នៅក្នុងទឹកដីខេត្តបាត់ដំបង ដើម្បីប្រឆាំងចំពោះការបោះឆ្នោត នៅថ្ងៃទី២៩ ខែកក្កដា ឆ្នាំ២០១៨ ហើយក្រោយមក គណៈកម្មការរៀបចំការបោះឆ្នោតខេត្ត បានសម្រេចពិន័យបុគ្គលចំនួន៥រូប ក្នុងម្នាក់ៗ១០លានរៀល ប៉ុន្តែពួកគេមិនព្រម ទើបប្តឹងបន្តមក គ.ជ.ប។
តាមសេចក្តីសម្រេចចុះថ្ងៃទី០៤ ខែសីហា ឆ្នាំ២០១៨ របស់ គ.ជ.ប ចុះហត្ថលេខាដោយលោក ស៊ិក ប៊ុនហុក បានឲ្យដឹងថា គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចលើកយកសំណុំរឿងលេខ០០១ ពាក់ព័ន្ធយុទ្ធនាការម្រាមដៃស្អាត នៅបាត់ដំបង មកបើកសវនាការ ហើយក្នុងនោះ សមាសភាពនៅក្នុងសវនាការរួមមាន ទី១, លោក ស៊ិក ប៊ុនហុក ប្រធាន ទី២, លោក នុត សុខុម ជាសមាជិក ទី៣, លោក មាន សទិ ជាសមាជិក ទី៤, លោក ឌឹម សុវណ្ណារុំ ជាសមាជិក ទី៥, លោក ឌុច សុន ជាសមាជិក ទី៦, លោក ហ៊ីង ធីប្ញទ្ធិ ជាសមាជិក ទី៧, លោក ឯម សូផាត ជាសមាជិក ទី៨, លោក ហ៊ែល សារ៉ាត់ ជាសមាជិក និងទី៩, លោក ហង្ស ពុទ្ធា ជាសមាជិក។
ក្នុងនោះមានគណៈលេខាធិការសវនាការចំនួន៦រូប រួមមាន ទី១, លោក សោម សូរីដា ជាប្រធាន ទី២, លោក កែវ ផល្លា ជាសមាជិក ទី៣, លោក ជាអនុប្រធាន ទី៤, លោក ភាព វីរៈ ជាសមាជិក ទី៥, លោក ភាព វិចិត្រ ជាសមាជិក និងទី៦, លោក ហួត បូរិន ជាសមាជិក។
ទាក់ទងបញ្ហានេះ លោក ឌឹម សុវណ្ណារុំ សមាជិក និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានប្រាប់អ្នកសារព័ត៌មានថា នៅថ្ងៃទី៨ ខែសីហា ឆ្នាំ២០១៨ ខាងមុខ គ.ជ.ប នឹងបើកសវនាការជំនុំជម្រះលើសំណុំរឿងលេខ០០១ ពាក់ព័ន្ធយុទ្ធនាការម្រាមដៃស្អាត ដែលគណៈកម្មការរៀបចំការបោះឆ្នោត ខេត្តបាត់ដំបង សម្រេចផាកពិន័យ លើបុគ្គលចំនួន៥នាក់ ក្នុងម្នាក់ៗ១០លានរៀល។ លោកបន្តថា ការពិន័យនោះ យោងតាមមាត្រា១៤២ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ហើយភាគីចុងចម្លើយបានប្តឹងបន្តមក គ.ជ.ប ជំទាស់នឹងសេចក្តីសម្រេចលេខ០០១ ចុះថ្ងៃទី២៦ ខែកក្កដា ឆ្នាំ២០១៨ របស់គណៈកម្មការរៀបចំការបោះឆ្នោតខេត្តបាត់ដំបង។
សូមបញ្ជាក់ថា កាលពីព្រឹកថ្ងៃទី២៦ ខែកក្កដា ឆ្នាំ២០១៨ គណៈកម្មការរៀបចំការបោះឆ្នោតខេត្តបាត់ដំបង បានរៀបចំបើកសវនាការលើបណ្តឹងចំនួន៥ ទាក់ទងយុទ្ធនាការម្រាមដៃស្អាត ហើយបន្ទាប់ពីបើកសវនាការអស់រយៈពេលមួយព្រឹក គណៈកម្មាធិការជាតិរៀបចំការបោះឆ្នោតខេត្ត បានសម្រេចធ្វើការផាកពិន័យជាទឹកប្រាក់ ក្នុងម្នាក់ៗចំនួន១០លានរៀល។ សមាជិកអតីតគណបក្សសង្គ្រោះជាតិទាំង០៥រូបនោះ រួមមានទី១, ឈ្មោះ ថោង សាវឿន អាយុ៥១ឆ្នាំ រស់នៅស្រុកគាស់ក្រឡ ខេត្តបាត់ដំបង ទី២, ឈ្មោះ ម៉ាង ឈុន អាយុ៥១ឆ្នាំ រស់នៅស្រុកគាស់ក្រឡ ខេត្តបាត់ដំបង ទី៣, ឈ្មោះ ជា ជាវ អតីតតំណាងរាស្ត្រ នៃអតីតគណបក្សសង្គ្រោះជាតិ ទី៤, ឈ្មោះ ពៅ តាំង និងទី៥, ឈ្មោះ គ្រុយ គឹមសាំង។
តាមប្រភពព័ត៌មានបានឲ្យដឹងថា អតីតសមាជិកបក្សចំនួន៥រូប របស់អតីតគណបក្សសង្គ្រោះជាតិ (CNRP) នៅតាមបណ្តាស្រុកនានា ក្នុងខេត្តបាត់ដំបង ត្រូវបានគណៈកម្មការរៀបចំការបោះឆ្នោតខេត្តបាត់ដំបង ធ្វើការកោះហៅឲ្យចូលខ្លួនទៅបំភ្លឺក្នុងសវនាការ ដោយសារជនទាំង៥ រូបនេះ ត្រូវបានមន្ត្រីគណបក្សប្រជាជន ប្តឹងពាក់ព័ន្ធទៅនឹងយុទ្ធនាការម្រាមដៃស្អាតរបស់ចលនាសង្គ្រោះជាតិ។ អង្គសវនាការនោះ បានសម្រេចធ្វើការផាកពិន័យទៅលើបុគ្គលទាំង៥រូប ដែលមានចេតនាមិនឲ្យប្រជាពលរដ្ឋចូលរួមបោះឆ្នោត ក្នុងម្នាក់ៗចំនួន១០លានរៀល នេះមិនទាន់គិតពីបទល្មើសព្រហ្មទណ្ឌនៅឡើយ ហើយ គ.ជ.ប បើកសិទ្ធឲ្យប្តឹងតវ៉ាបានតាមផ្លូវច្បាប់។
ប្រភពព័ត៌មានបានឲ្យដឹងដែរថា នៅក្នុងរយៈកាលនៃយុទ្ធនាការឃោសនារកសំឡេងឆ្នោត មនុស្សទាំង៥នាក់នេះ បានធ្វើការបង្ហោះរូបភាព និងសារមួយចំនួន ដោយលើកម្រាមដៃ ក្នុងន័យបំផុសបំផុលមិនឲ្យប្រជាពលរដ្ឋទៅចូលរួមបោះឆ្នោត នាថ្ងៃទី២៩ ខែកក្កដា ដោយគេប្រើពាក្យមួយឃ្លាថា “យុទ្ធនាការម្រាមដៃស្អាត” មានន័យថា មិនចូលរួមបោះឆ្នោត។ ក្រោយពីមានយុទ្ធនាការម្រាមដៃស្អាត និងចលនាសង្គ្រោះជាតិ ក្នុងគោលបំណងរារាំងមិនឲ្យប្រជាពលរដ្ឋបានបំពេញកាតព្វកិច្ចជាពលរដ្ឋខ្មែរបែបនេះ ទើបក្រុមការងារនៃគណបក្សប្រជាជនកម្ពុជា បានដាក់ពាក្យប្តឹងទៅលើមន្ត្រីទាំង៥ រូបនោះទៅ គ.ជ.ប ថ្នាក់ខេត្ត ដើម្បីចាត់វិធានការតាមផ្លូវច្បាប់៕
Source: Kampuchea Thmey Daily
0 Comments