កណ្តាល ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ឲ្យដឹងថា សម្តេចមានបំណងនឹងទូលថ្វាយទៅព្រះមហាក្សត្រដើម្បីធ្វើការលើកលែងទោសមនុស្សចំនួន ១២ នាក់ទៀត ដែលការស្នើលើកលែងទោសនេះគឺជាការសន្តោសប្រណីរបស់សម្តេចមិនមែនជាសម្ពាធបរទេសនោះទេ។
សម្តេចតេជោ ហ៊ុន សែន បានធ្វើការបញ្ជាក់បែបនេះនៅក្នុងពិធីជួបសំណេះសំណាលជាមួយ កម្មករនិយោជិតប្រមាណជិត២ម៉ឺននាក់នៅក្នុងខេត្តកណ្តាលនាព្រឹកថ្ងៃទី២៣ខែសីហានៅក្នុងស្រុកកៀនស្វាយ។
សម្តេចបានមានប្រសាសន៍ថា «ប្រសិនបើការសន្តោសប្រណីណាមួយរបស់នាយករដ្ឋមន្ត្រី ហ៊ុន សែន ជូនទៅចំពោះអ្នកជាប់ទោសទណ្ឌ សូមកុំនិយាយថា នេះបណ្តាលមកពីការគាបសង្កត់របស់បរទេសឲ្យសោះ សូមប្រយ័ត្នប្រយែងចំពោះការប្រើពាក្យសម្តីលើបញ្ហានេះ។ ខ្ញុំចង់ធ្វើការលើកលែងទោសទ្រង់ទ្រាយធំនៅពេលខាងមុខមិនមែនគ្រាន់តែមនុស្សប៉ុន្មាននាក់ទេ។ ក៏ប៉ុន្តែខ្ញុំមានគោលដៅថា នៅរដូវបុណ្យភ្ជុំបិណ្ឌ ឬរដូវបុណ្យអុំទូក ឬបុណ្យឯករាជ្យនៅឆ្នាំនេះ។ ឥឡូវឯកឧត្តម អង្គ វង្សវឌ្ឍនា ជារដ្ឋមន្ត្រីក្រសួងយុត្តិធម៌នៅទីនេះស្រាប់ ឆ្នាំនេះយើងអាចដំណើរការលើកលែងទោសទ្រង់ទ្រាយធំ ដើម្បីឲ្យពលរដ្ឋរបស់យើងដែលជាប់ពន្ធនាគារមានឱកាសចេញមកមានឱកាសកែប្រែខ្លួនជាថ្មី។ ប៉ុន្ដែសូមកុំនិយាយនេះបានមកដោយសារតែការគាបសង្កត់របស់បរទេសឲ្យសោះ ខ្ញុំស្អប់ណាស់»។
សម្តេចតេជោ ហ៊ុន សែន បានធ្វើការបញ្ជាក់ទៀតថា “អញ្ចឹងសូមបងប្អូនដែលកំពុងជាប់ពន្ធនាគារ ដែល មានគ្នាប្រមាណ១២នាក់ផ្សេងទៀត ត្រូវចាំថា បើសិនខ្ញុំបានតម្រូវឲ្យអ្នកធ្វើការសុំទោស ហើយអ្នកបានធ្វើលិខិតរួច។ ក៏ប៉ុន្តែប្រសិនជាអ្នកណាមួយធ្វើអត្ថាធិប្បាយអំពីការគាបសង្កត់អន្តរជាតិ ខ្ញុំនឹងរក្សាទុកសិន ទុករហូតដល់អ្នកដែលត្រូវធ្វើលិខិតស្នើសុំលើកលែងទោសធ្វើលិខិតថ្កោលទោសចំពោះអ្នកធ្វើអត្ថាធិប្បាយបានទើបខ្ញុំព្រម។ ខ្ញុំមានលក្ខខណ្ឌចំពោះអ្នកដែលធ្វើលិខិតសុំលើកលែងទោស។ អ្នកនៅក្រៅគុកខ្ញុំយល់ពីបំណងរបស់អ្នក ចង់ឲ្យអ្នកនៅក្នុងគុកនេះបន្តជាប់គុតតទៅទៀត។ តែអ្នកមិនសោកស្តាយថា អ្នកទាំងនេះ ធ្លាប់រួមដំណើរជាមួយអ្នកក្នុងការប្រព្រឹត្តបទល្មើសនោះទេ។ អំពើសន្តោសប្រណីដែលចេញពីចិត្តធម៌របស់ខ្ញុំក្នុងឋានៈជានាយករដ្ឋមន្ត្រីហើយត្រូវអនុវត្តន៍នូវច្បាប់ពន្ធនាគារដែលចែងថានាយករដ្ឋមន្ត្រីមានសិទ្ធិនឹងសុំលើកលែងទោសថ្វាយព្រះមហាក្សត្រនៅពេលណាក៏បានច្បាប់ពន្ធនាគារអនុញ្ញាតឲ្យនាយករដ្ឋមន្ត្រីធ្វើបែបនេះ។ ប៉ុន្តែក៏ត្រូវអនុវត្តន៍ទោស ២ភាគ៣ ផងដែរ”។
បើទោះបីសម្តេចតេជោនាយករដ្ឋមន្ត្រីមិននិយាយចំឈ្មោះមនុស្សទាំង ១២ នាក់ថា ជាអ្នកណាក៏ដោយ។ ក៏ប៉ុន្តែមនុស្សទាំង១២នោះទំនងជាសម្ដេចចង់សំដៅទៅលើក្រុមមន្ត្រីនយោបាយអតីតគណបក្សសង្គ្រោះជាតិដែលរួមមានលោក មាជ សុវណ្ណារ៉ា និងសកម្មជនគណបក្សប្រឆាំងចំនួន ១០នាក់ផ្សេងទៀត ដែលបានប្រព្រឹត្តបទល្មើសកុបកម្មដោយហិង្សាកាលពីខែកក្កដា ឆ្នាំ២០១៤ នៅម្តុំស្ពាននាគក្បែរទីលានប្រជាធិបតេយ្យ ដោយដែលត្រូវបានចៅក្រមនៃតុលាការក្រុងភ្នំពេញចោទប្រកាន់និងផ្ដន្ទាទោសដាក់ពន្ធនាគារចន្លោះពី ៧ឆ្នាំទៅ ២០ឆ្នាំ និង ម្នាក់ទៀតនោះគឺអាចជាលោក អ៊ុំ សំអាង ដែលត្រូវបានអយ្យការអមសាលាដំបូងរាជធានីភ្នំពេញចោទប្រកាន់ពីបទញុះញង់នាំឲ្យមានការរើសអើង និងប្រព្រឹត្តបទឧក្រិដ្ឋជាអាទិ៍នៃក្រមព្រហ្មទណ្ឌ។ ការចោទប្រកាន់នេះក្រោយពីលោកបានរិះគន់រឿងបញ្ហាព្រំដែនកម្ពុជា-វៀតណាម ទាក់ទងនឹងការប្រើប្រាស់ផែនទីក្លែងក្លាយ។
ជាមួយការបង្ហាញនៃក្តីសន្តោសចំពោះអ្នកកំពុងជាប់ទោសទណ្ឌ តែសម្តេចតេជោនាយករដ្ឋមន្ត្រីក៏បានព្រមានទុកជាមុនផងដែរថា កុំព្រហើនទោះជាធ្លាប់ជាប់ពន្ធនាគារប៉ុន្មានដងក៏ដោយ ក៏នៅតែត្រូវជាប់ពន្ធនាគារសាជាថ្មីដែរឲ្យតែប្រព្រឹត្តល្មើសនឹងច្បាប់។
សម្តេចតេជោនាយករដ្ឋមន្ត្រីបានលើកឡើងថា អ្នកដែលទើបនឹងចេញពីពន្ធនាគារទេតែពួកគេនៅតែប្រើឥរិយាបថបែបឈ្លើយ។ ជាពិសេសការបញ្ចេញមតិរបស់ពួកគេដូចជាហួសព្រំដែន។ សម្តេចបានផ្តាំផ្ញើទៅកាន់អ្នកដែលទើបនឹងរួចផុតពីពន្ធនាគារយ៉ាងដូច្នេះថា «កុំព្រហើនពេក កុំស្មានថា គេមិនហ៊ានចាប់បញ្ចូលគុកវិញ។ បើប៉ះពាល់ដល់ច្បាប់ ច្បាប់ចាប់ទៀត កាត់ទោសទៀត ជាប់គុកទៀត វាតែប៉ុណ្ណឹង»។
សម្តេចតេជោនាយករដ្ឋមន្ត្រីបានធ្វើការពន្យល់ហេតុផលថា ការលើកឡើងបែបនេះមិនមែនរឹតត្បិត ឬបិទមាត់ពួកគេមិនឲ្យបញ្ចេញមតិនោះទេ តែពួកគេក៏ត្រូវគិតពីសិទ្ធិរបស់អ្នកដទៃផងដែរ។ សម្តេចបន្ថែមទៀតថា ការបញ្ចេញមតិមិនត្រូវប៉ះពាល់ដល់អ្នកណាម្នាក់ឡើយ។
ការព្រលយឲ្យដឹងបែបនេះធ្វើឡើងអំពីការស្នើលើកលែងទោសទ្រង់ទ្រាយធំរបស់សម្តេចតេជោ ហ៊ុន សែន បានធ្វើឡើងបន្ទាប់ពីមានការដោះលែង លោក គឹម សុខ អ្នកវិភាគនយោបាយ និងសង្គមដែល ត្រូវបានតុលាការដោះលែងកាលពីថ្ងៃទី១៧ ខែសីហា ឆ្នាំ២០១៨ បន្ទាប់ពីអនុវត្តទោសបានគ្រប់ចំនួន១៨ខែ។ ជាមួយគ្នានេះសកម្មជនដីធ្លីសហគមន៍បឹងកក់អ្នកស្រី ទេព វន្នី ក៏ត្រូវបានដោះលែងចេញពីពន្ធនាគារ «ម២» កាលពីថ្ងៃទី២០ ខែសីហា ឆ្នាំ២០១៨ បន្ទាប់ពីព្រះមហាក្សត្រចេញព្រះរាជក្រឹត្យតាមសំណើរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។ ដោយឡែកអតីតអ្នកយកព័ត៌មានរបស់វិទ្យុអាស៊ីសេរី២រូប គឺលោក អ៊ួន ឈិន និងលោក យាង សុធារិន ហៅ យាង សុជាមេត្តា ក៏ត្រូវបានសាលាដំបូងរាជធានីភ្នំពេញចេញដីកាដោះលែងឲ្យនៅក្រៅឃុំជាបណ្ដោះអាសន្ននៅថ្ងៃទី២១ ខែសីហា ឆ្នាំ២០១៨នេះផងដែរ។
ក្នុងចំណោមអ្នកចេញពីពន្ធនាគារទាំងនោះមានតែលោក គឹម សុខ ប៉ុណ្ណោះដែលនៅតែហ៊ាននិយាយខ្លាំងៗជាពិសេសពាក់ព័ន្ធនឹងរឿងនយោបាយ។ លោក គឹម សុខ ហាក់ដូចជាមិនរាងចាលឬក៏បាក់ស្បាតឡើយទោះជាធ្លាប់ជាប់ពន្ធនាគារដោយសារតែការវិភាគនេះក៏ដោយ។ លោកគឹម សុខ បានប្រកាស ថាខ្លួននឹងបន្តអត្ថាធិប្បាយរឿងនយោបាយនិងធ្វើកិច្ចការសង្គម៕
Source: Kampuchea Thmey Daily
0 Comments