ខ្សែការពារវ័យក្មេង យ៊ើ សាហ្វី របស់ក្រុមបាល់ទាត់ភ្នំពេញក្រោន បានបង្ហាញការខកចិត្តចំពោះលទ្ធផលដែលធ្វើមិនបានល្អរបស់ក្រុមរបស់ខ្លួននាមពេលកន្លងមកក្នុងរដូវកាលនេះទាំងក្នុងពានរង្វាន់សម្តេចតេជោ ហ៊ុន សែន និងពានរង្វានលីគកំពូលកម្ពុជា (Metfone Cambodian League 2018) ខណៈរូបគេក៏បានចេញមុខសុំទោសដល់អ្នកគាំទ្រផងដែរ។
កីឡាករខ្មែរ-អ៊ីស្លាម រូបនេះបានលើកឡើងថា «ខ្ញុំពិតជាសុំទោសទៅកាន់អ្នកគាំទ្រទាំងអស់ចំពោះលទ្ធផលដែលក្រុមរបស់យើងធ្វើមិនបានល្អក្នុងការប្រកួតនាពេលកន្លងមក។ រូបខ្ញុំផ្ទាល់ក៏ខកចិត្តខ្លាំងណាស់ដែរ ចំពោះលទ្ធផលមិនគាប់ប្រសើរនេះ។ ប៉ុន្តែខ្ញុំសូមឲ្យអ្នកទាំងអស់គ្នាបន្តគាំទ្រពួកយើងតទៅទៀត ខ្ញុំពិតជាស្រលាញ់ក៏ដូចជាគោរពអ្នកគាំទ្ររបស់យើងទាំងអស់ខ្លាំងណាស់»។
កីឡាករដែលបណ្តុះចេញពីក្រុមយុវជនថ្នាលក្លិបភ្នំពេញក្រោន រូបនេះបានប្តេជ្ញាថានឹងខំប្រឹងព្យាយាមធ្វើឲ្យបានល្អសម្រាប់ប្រកួតដែលនៅសេសសល់ ក៏ដូចជាប្រឹងប្រែងហ្វឹកហាត់ សហការក្នុងក្រុម ព្រមទាំងផ្តោតអារម្មណ៍ខ្ពស់ទៅលើការប្រកួតទាំងនេះ ដើម្បីលទ្ធផលល្អមួយសម្រាប់ក្រុមទាំងមូល ថ្នាក់ដឹកនាំក្រុមនិងអ្នកគាំទ្រផងដែរ។
ចំពោះពានរង្វាន់លីគកំពូលកម្ពុជា ក្រុមភ្នំពេញក្រោន អស់ឱកាសប្រជែងជើងឯកហើយ ក្រោយប្រកួតបាន១៨លើក ឈ្នះបាន៨លើក ស្មើគ្នា៣លើកនិងចាញ់៧លើកមាន២៧ពិន្ទុ ពោលគឺចាញ់ក្រុមកំពូលតារាងណាហ្គាវើល រហូតដល់១៧ពិន្ទុ ទោះបីជានៅដល់៤ប្រកួតក្នុងដៃទៀតក៏ដោយ។ ចំពោះប្រកួតដែលនៅសល់ក្រុមភ្នំពេញក្រោន ត្រូវប៉ះក្រុមអគ្គស្នងការដ្ឋាននគរបាលជាតិ,អាស៊ីអឺរ៉ុប,វេស្ទើនភ្នំពេញ និងបឹងកេតអែហ្វស៊ី។
ចំណែកនៅក្នុងពានរង្វាន់សម្តេចតេជោ ហ៊ុន សែន វិញក្រុមក្រុមភ្នំពេញក្រោន បានធ្លាក់ចេញត្រឹមវគ្គ៨ក្រុមចុងក្រោយ បន្ទាប់ពីចាញ់ក្រុមអង្គរថាយហ្គឺរ ដោយបាល់ប៉េណាំងទីកាត់សេចក្តី៤ទល់៣ ក្រោយប្រកួតស្មើគ្នាទាំង២ជើង៤ទល់៤។ លោក Sean Sainsbury ដែលជាគ្រូបង្វឹកនៅតែមានឆន្ទៈដាក់កីឡាករក្មេងៗឲ្យប្រកួតនៅក្នុងប្រកួតដែលនៅសល់ដើម្បីពង្រឹងបច្ចេកទេសនិងសមត្ថភាពត្រៀមទៅថ្ងៃអនាគត៕
Source: Kampuchea Thmey Daily
0 Comments