Ad Code

ភារកិច្ច​ដំបូង​នៃ​“​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់​យោបល់ ”​គឺ​ការចូលរួម​ផ្តល់យោបល់​ទៅលើ​សេចក្តីព្រាងច្បាប់​ថវិកាជាតិ



កណ្តាល ៖ សម្តេច​តេ​ជោ ហ៊ុន សែន បាន​ថ្លែង​ថា សេចក្តី​ព្រាងច្បាប់​ទីមួយ​ដែល​ត្រូវ​ដាក់​ឆ្លង​យោបល់ “​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់​យោបល់​” គឺ​ច្បាប់​ថវិកា​ជាតិ​សម្រាប់​ការ​គ្រប់​គ្រង់ ឆ្នាំ២០១៩។ សម្តេច​តេ​ជោ​នាយករដ្ឋមន្ត្រី​បាន​បន្តថា ​បើ​ទោះបី​ព្រះរាជក្រឹត្យ​ចេញ​ទាន់​ ឬ​ មិនទាន់​ក្តី តែ​យើង​នឹង​អញ្ជើញ​មេដឹកនាំ​គណបក្ស​មក​ចូលរួម​មតិ​ក្នុង​សេចក្តី​ព្រាងច្បាប់​នេះ។



សម្តេច​តេ​ជោ​នាយករដ្ឋមន្ត្រី​បាន​ផ្តល់​តម្លៃ​នេះ​ទៅដល់​“​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់​យោបល់​” ក្នុង​ការ​ចូលរួម​ផ្តល់​មតិ​ចំពោះ​សេចក្តីព្រាងច្បាប់​ថវិកាជាតិ​សម្រាប់​ការគ្រប់គ្រង​ឆ្នាំ២០១៩ ដែល​ជា​ច្បាប់​ដ៏​សំខាន់​មួយ​របស់​ជាតិ​។



សម្តេច​បាន​លើក​ឡើង​បែបនេះ​នៅ​ព្រឹក​ថ្ងៃទី ២៣ ខែ សីហា ក្នុង​ឱកាស​អញ្ជើញ​ចុះ​ជួប​សំណេះសំណាល​ជាមួយ​កម្មករ​កម្មការិនី​ចំនួន​១៧.៥០៣​នាក់ ​មកពី​រោងចក្រ សហ​គ្រា​ចំនួន​១២ នៅក្នុង​ខេត្តកណ្តាល​ដែល​ធ្វើឡើង​នៅ​ភូមិ​ព្រែក​ត្រែង​២ ឃុំ​សំរោង​ធំ​ ស្រុក​គៀនស្វាយ ខេត្តកណ្តាល។

សម្តេច​តេ​ជោ​នាយករដ្ឋមន្ត្រី​បាន​មានប្រសាសន៍ថា «​បើ​ទោះបី​“​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់​យោបល់​” កើត​ទាន់​ ឬ​ មិនទាន់​ក្តី ក៏ប៉ុន្តែ​ច្បាប់​មួយ​ដែល​ក្រុមប្រឹក្សា​នេះ​ត្រូវធ្វើ​មុនគេ​គឺ​សេចក្តី​ព្រាងច្បាប់​ថវិកាជាតិ​សម្រាប់​ការគ្រប់គ្រង​ឆ្នាំ ២០១៩។ ដែល​នេះ​វា​ជា​តួនាទី​អី​? បាន​សេចក្តី​ថា ​យើង​បាន​អញ្ជើញ បណ្តា​ប្រធាន​គណបក្ស​មក​ផ្តល់​យោបល់ ទៅលើ​សេចក្តី​ព្រាងច្បាប់​នេះ ដែល​សង្ឃឹមថា​ បើ​ទោះបី​ព្រះរាជក្រឹត្យ​រៀបចំ​ទាន់​ឬ​មិនទាន់​ក្តី យើង​អញ្ជើញ​ប្រធាន​គណបក្ស​នយោបាយ​ដែល​បាន​ចូលរួម​នៅក្នុង “​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់យោបល់​” មក​ធ្វើការ​ផ្តល់​មតិ​មុន​សេចក្តីព្រាងច្បាប់​នេះ​ដាក់​ចូល​កិច្ចប្រជុំ​គណៈរដ្ឋមន្ត្រី។ អញ្ចឹង​ទេតើ​តម្លៃ​របស់​វា​ថ្លៃ​ឬទេ ? ច្បាប់​ថវិកាជាតិ​ជា​ច្បាប់​សំខាន់​មួយ​មិនមែន​អ្នកណា​ក៏​ចេះតែ ដឹង​បាន​នោះ​ទេ វា​ជា​គំនាស់​សេដ្ឋកិច្ច​ធំ​ណាស់ តែ​យើង​អញ្ជើញ​បណ្តា​ប្រធាន​បក្ស​មក​ចូលរួម ...»។



បើ​យោង​តាម​សម្តេច​សេចក្តី​ព្រាងច្បាប់​នេះ​នឹងត្រូវ​ដាក់​ចូល​កិច្ចប្រជុំ​គណៈរដ្ឋមន្ត្រី​នៅ​ចុងខែ​តុលា ដូចនេះ​តម្រូវ​ឲ្យ​ដាក់​ជូន​“​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់​យោបល់​”​ពិនិត្យ​ផ្តល់យោបល់​នៅ​ពាក់កណ្តាល ខែតុលា​។

សម្ដេច​បាន​លើក​ឡើង​ទៀត​ថា ច្បាប់​ថវិកាជាតិ​មាន​ភាព​សាំ​ញាំ​បន្តិច ក៏ប៉ុន្តែ​វា​តម្រូវ​ឲ្យ​រដ្ឋមន្ត្រីក្រសួង​សេដ្ឋកិច្ច​និង ហិរញ្ញវត្ថុ ធ្វើការ​ពន្យល់​ដើម្បី​ប្រមូល​ផ្តុំ​មតិ ហើយ​អាច​ប្រធាន​គណបក្ស​ផ្សេងៗ លោក​អាច​មើលឃើញ​ចំណុច​ដែល​យើង​នៅ​ខ្វះចន្លោះ​ដើម្បី​បំពេញបន្ថែម​ឲ្យ​សេចក្តី​ព្រាងច្បាប់​នោះ​កាន់ តែ​ប្រសើរឡើង។



ជា​មួយ​គ្នា​នេះ​ ប្រមុខ​រាជរដ្ឋាភិបាល​ក៏បាន​សុំ​ការ​អធ្យាស្រ័យ​ពី​សមាជិក​គណបក្ស​ប្រជាជន​កម្ពុជា ដែល​ជា​សមាជិក សមាជិកា រដ្ឋសភា ព្រឹទ្ធសភា និង រាជរដ្ឋាភិបាល កុំ​មានការ​យល់​ច្រឡំ​ថា ហេតុអ្វី​ចាំបាច់​ទៅ​ហៅ​បក្ស​ផ្សេង​ធ្វើជា​ទីប្រឹក្សា​ធ្វើ​អី បើ​គណបក្ស​ប្រជាជន​កម្ពុ​ជាមាន​ធនធានមនុស្ស​ច្រើន​រាប់មិនអស់ គ្រាន់តែ​បណ្ឌិត​នោះ​គឺ​សំបូរ​បែប គ្រាន់តែ​ក្នុងផ្ទះ​សម្តេច​មួយ​មាន​បណ្ឌិត​ចំនួន ២ នាក់​ទៅ​ហើយ​។ ប៉ុន្តែ​អ្នក​ទាំងអស់គ្នា​ត្រូវ​យល់​កុំ​ភ័ន្តច្រឡំ​ថា​ ហេតុ​អី​មិន​ប្រើ​មនុស្ស​នៅក្នុង​បក្ស ចាំបាច់​ទៅប្រើ​បក្ស​ផ្សេង។

សម្តេច​តេ​ជោ​នាយករដ្ឋមន្ត្រី​បាន​បន្ត​ថា នេះ​គោលបំណង​របស់​សម្តេច​ក្នុង​ការ​បង្ហាញ​នូវ​សុច្ឆន្ទៈ ដែល​គោលបំណង​ដើរ​របស់​សម្តេច​គឺ​ក្រៅពី​ការ​ផ្តួលរំលំ​របប​ប៉ុលពត ,​ការទប់ស្កាត់​កុំ​ឲ្យ​របប​ប៉ុលពត​ត្រឡប់មកវិញ​។ សម្តេច​មើលឃើញ​គេ​មិនអាច​យក​សង្គ្រាម​បញ្ចប់សង្គ្រាម​នោះ​ទេ ហេតុ​នេះ​ហើយ​បានជា​សម្តេច ត្រូវធ្វើ​ដំណើរ​ទៅ​គ្រប់​ទីកន្លែង​ដើម្បី​ស្វែងរក​ដំណោះស្រាយ​បង្រួបបង្រួម​ជាតិ​។ យើង​មានតែ​អនុវត្ត​នយោបាយ​ឈ្នះ​ឈ្នះ ដែល​បាន​ដាក់ចេញ​នូវ​នយោបាយ​មួយ​ដែល​ធានា​ថា ខ្មែរ​ទាំងអស់​បញ្ចប់​ជម្លោះ​ដោយ​ការ​ឈ្នះ​ទាំងអស់គ្នា នេះ​មិនមែន​ជា​ការ​ចុះចាញ់ មិនមែន​ជា​ការ​សារភាព​ទេ តែ​ជា​កាតព្វកិច្ច​យើង​ជា​ខ្មែរ​ត្រូវ​ដោះ ស្រាយ ...។

សម្តេច​តេ​ជោ​នាយករដ្ឋមន្ត្រី​បាន​បន្ត​ថា ​ដោយសារ​ធ្លាប់​មានគំនិត​បង្កើត​នូវ​នយោបាយ​ឈ្នះ​ឈ្នះ បើ​ទោះបី​ថា ​ប្រជាជន​កម្ពុជា​បាន​ផ្តល់​អំណាច​ទាំងស្រុង​មក​ឲ្យ​គណបក្ស​ប្រជាជន​កម្ពុជា​ក៏ដោយ ទាំង​ក្នុង សភា និង ក្នុង​រាជរដ្ឋាភិបាល តែ​សម្តេច​នៅតែ​ត្រូវ​ការ​ប្រមូល​នូវ​ធនធានមនុស្ស​ដើម្បី​កសាង​និង​អភិវឌ្ឍន៍ ប្រទេស​។

ជា​មួយ​គ្នា​នេះ​ សម្តេច​តេ​ជោ ហ៊ុន សែន នាយករដ្ឋមន្ត្រី​លើកឡើង​ដោយ​សម្តែង​ការ​សោកស្តាយ​ចំពោះ​គណបក្ស​មួយចំនួន​ដែល​មិនបាន​ចូលរួម​ជាមួយ​«​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់យោបល់​» ដែល​ផ្តល់​ឱកាស​ដើម្បី​ឲ្យ​គណបក្ស​នយោបាយ​ក្រៅ​រដ្ឋសភា​ចូលរួមចំណែក​កសាង​ប្រទេសជាតិ​។



​សម្តេច​តេ​ជោ ហ៊ុន សែន បាន​មានប្រសាសន៍ថា​ ការបង្កើត “​ឧ​ត្ត​ម​ក្រុមប្រឹក្សា​ពិគ្រោះ និងផ្តល់យោបល់​” គឺ​ដើម្បី​ទុក​ឱកាស​ឲ្យ​គណបក្ស​ក្រៅ​រដ្ឋសភា​បាន​ចូល​រួម​ចំណែក​បម្រើ​ជាតិ និង​នាំមក​នូវ​ការ​បង្រួបបង្រួម​ជាតិ​ដែល​គណបក្ស​ទាំងនោះ​សុទ្ធ​តែ​មាន​ធនធាន ធនធាន​បញ្ញា ដូច​គណបក្ស​ប្រជាជន​កម្ពុជា​ដែរ​ប៉ុន្តែ​គណបក្ស​មួយចំនួន​បែរជា​មិន​ចូលរួម​។

សម្តេច​តេ​ជោ​បាន​បន្ត​ថា «​ក្រៅពី​គណបក្ស​ប្រជាជន​កម្ពុជា គណបក្ស ១៩ ផ្សេងទៀត​ក៏​មាន​ធនធានមនុស្ស ធនធាន​បញ្ញា​របស់​គេ ដូច្នេះ​យើង​មិនត្រូវ​មើលរំលង​នូវ​បញ្ហា​ទាំងអស់​នេះ​ទេ ឲ្យ​តែ​អ្វី​ដែល​នាំមក​នូវ​ការ​បង្រួបបង្រួម​ជាតិ​។ ខ្ញុំ​ក៏​មាន​ការសោកស្តាយ​ដែរ​ដែល​សុំ​យក​ឱកាស​នេះ​ផ្តាំផ្ញើ​ទៅ​គណបក្ស នយោបាយ​ខ្លះ​នៅ​ពេល​ដែល​ខ្ញុំ​ទុក​លទ្ធភាព​ដើម្បី​ឲ្យ​អស់លោក​ធ្វើ អស់លោក​បែរជា​តម្រូវ​ឲ្យ​ខ្ញុំ​ធ្វើ​ទៅវិញ​»​។

សម្តេច​បាន​បន្ត​ថា គណបក្ស​ខ្លះ​ដែល​មិន​ចូលរួម​បាន​ធ្វើ​សេចក្តីថ្លែងការណ៍​ថា​ គាំទ្រ​គំនិត​បង្កើត​នេះ​ហើយ ​ប៉ុន្តែ​ពួកគេ​នៅ​រង់ចាំ​ឲ្យ​រដ្ឋសភា និង រដ្ឋាភិបាល​ដំណើរការ​សិន​ព្រមទាំង​ទាមទារ​ឲ្យ​រដ្ឋាភិបាល​បង្ហាញ​អំពី​យន្តការ​ជាក់លាក់​ផង​ដែរ​។

សម្តេច​បញ្ជាក់​ថា ​គ្រាន់តែ​ព្រះរាជក្រឹត្យ​មួយ​មិន​ពិបាក​ទេ ក៏ប៉ុន្តែ​យើង​ទុក​ឱកាស​ឲ្យ​ពួកគេ​សរសេរ​។ សម្តេច​បាន​ចាត់ទុកថា​ការបង្កើត​ឧ​ត្ត​ម​ក្រុម​ប្រឹក្សា​នេះ គឺ​ដើម្បី​ផ្តល់​ឱកាស​ដល់​គណបក្ស​នយោបាយ​ទាំងនោះ​ទៅវិញ​ទេ​។

កាលពី​ថ្ងៃទី​២១ ខែសីហា ឆ្នាំ​២០១៨ តំណាង​ពី​គណបក្ស​១៦ បាន​ទៅ​ជួប​សម្តេច ហ៊ុន សែន ដែលជា​ម្ចាស់​គំនិត​ក្នុង​ការបង្កើត “​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់យោបល់​”​។ ក្នុងជំនួប​នោះ​មាន​តំណាង​ពី​គណបក្ស ១៥ បាន​ឯកភាព​បង្កើត​និង​ចូល​ជា​សមាជិក​នៃ​ឧ​ត្ត​ម​ប្រឹក្សា​ពិគ្រោះ​និង​ផ្តល់យោបល់​។ ឯ​តំណាង​ពី​គណបក្ស​១​ទៀត​បាន​បង្ហាញ​ការ​ស្ទាក់ស្ទើរ​ដោយ​មិនទាន់​សម្រេចចិត្ត​ចូល​ជា​សមាជិក​នៃ​ក្រុមប្រឹក្សា​នេះឡើយ​។ ដោយឡែក​គណបក្ស​៤​ទៀត បាន​បដិសេធ​មិន​ចូលរួម​ប្រជុំ​។

ការបង្កើត «​ឧ​ត្ត​ម​ក្រុមប្រឹក្សា​ពិគ្រោះ​និង​ផ្តល់​យោបល់​» នៅក្នុង​ទីស្តីការ​នាយករដ្ឋមន្ត្រី​ដែល​ចូលរួម​ដោយ​ថ្នាក់ដឹកនាំ​នៃ​គណបក្ស​នយោបាយ​នានា​នឹង​បង្កើត​ឲ្យ​មាន​រូបភាព​ពហុបក្ស នៅក្នុង​រដ្ឋាភិបាល​អាណ​ត្តិ​ទី​៦​នេះ​។

សម្តេច​តេ​ជោ ហ៊ុន សែន បាន​បញ្ជាក់ថា បំណង​របស់​សម្តេច​គឺ​ចង់​ឲ្យ​ប្រមូល​ធនធានមនុស្ស​ពី​បណ្តា​គណបក្ស​នានា​ដើម្បី​យក​ទៅ​អភិវឌ្ឍ​ប្រទេសជាតិ​៕

    



Source: Kampuchea Thmey Daily

Post a Comment

0 Comments

Close Menu