អ្នកជំនាញ​៖ Honda ដឹកនាំ​ជម្រើសជាតិ​កម្ពុជា គឺ​មិន​ប៉ះពាល់​ដល់​កម្មវិធី​ប្រកួត​លី​គ​និង​ពាន​សម្តេច​តេ​ជោ ហ៊ុន សែន នោះទេ​

លោក ឆាំង ពិសិដ្ឋ លេខាធិការ​ប្រតិបត្តិ​នៃ​គណៈកម្មការ​ប្រកួត​បាល់​ទាត់​ជាតិ​កម្ពុជា (CNCC) បានលើកឡើងថា ​កម្មវិធី​ប្រកួត​របស់​ជម្រើសជាតិ​កម្ពុ​ជា​ដឹកនាំ​ដោយ​អ្នកចាត់ការ​ថ្មី Keisuke Honda និង​កម្មវិធី​ប្រកួត​ក្នុង​ពានរង្វាន់ Metfone Cambodian League ព្រមទាំង​ពានរង្វាន់​សម្ដេច​អគ្គមហាសេនាបតី​តេ​ជោ ហ៊ុន សែន មិនមាន​អ្វី​ប៉ះពាល់​ដល់​គ្នា​ឡើយ​។

ក្រុម​ជម្រើសជាតិ​កម្ពុជា ត្រូវ​ប្រកួត​មិត្តភាព​អន្តរជាតិ​ជាមួយ​ម៉ាឡេស៊ី​នៅ​ថ្ងៃទី​១០ ខែកញ្ញា ដែល​ជា​ថ្ងៃ FIFA Day (​គ្រប់​សកម្មភាព​លី​គ​កំពូល​ប្រទេស​ជា​សមាជិក FIFA ត្រូវ​ប្រកួត​សម្រាក​ដើម្បី​ឲ្យ​ក្រុម​ជម្រើសជាតិ​របស់​ខ្លួន​នីមួយៗ ប្រកួត​មិត្តភាព​ឬ​ប្រកួត​ពានរង្វាន់​ណាមួយ​ជា​អន្តរជាតិ​) ខណៈ​ព្រឹត្តិការណ៍​ប្រកួត​ជើងឯក​ពានរង្វាន់​ប្រចាំ​តំបន់​អាស៊ាន AFF Suzuki Cup 2018 នឹង​ចាប់ផ្ដើម​នៅ​អំឡុង​ខែវិច្ឆិកា ដែល​ផុត​យុទ្ធនាការ​ពានរង្វាន់​សម្ដេច​អគ្គមហាសេនាបតី​តេ​ជោ ហ៊ុន សែន និង Metfone Cambodian League​។



លោក ឆាំង ពិសិដ្ឋ បាន​លើក​ឡើង​ថា «​កម្មវិធី​ប្រកួត​លី​គ​កំពូល​កម្ពុជា នឹង​មិន​មាន​អ្វី​ប៉ះពាល់​ដល់​បេសកកម្ម​ប្រកួត​របស់​ជម្រើសជាតិ​ទេ ពីព្រោះ​ថា ការប្រកួត​នេះ​នឹង​បញ្ចប់​នៅ​ខែកញ្ញា។ អីចឹង​មានន័យថា កម្មវិធី​ប្រកួត​លី​គ​និង ជម្រើសជាតិ​មិន​មាន​អី​ជា​បញ្ហា​ទេ​។ សម្រាប់​ឆ្នាំក្រោយ​វិញ គណៈកម្មការ​រៀបចំ​កា​រ​ប្រកួត​នឹង​ថ្លឹងថ្លែង​យក​កម្មវិធី​រវល់​រប​ស់​ជម្រើសជាតិ និង លី​គ​ទាំងអស់​បូក​បញ្ចូល​នឹង​ពាន​សម្ដេច​។ ដូច្នេះ​នៅពេល​មាន​កាតព្វកិច្ច​ជម្រើសជាតិ យើង​នឹងដាក់​ចន្លោះ​ដើម្បី​មាន​ពេល​គ្រប់គ្រាន់​សម្រាប់​ជម្រើសជាតិ​ផងដែរ​»​។



បើ​តាម​កាលវិភាគ​ក្នុង​កម្មវិធី​ប្រកួត Metfone Cambodian League នឹង​បញ្ចប់​នៅ​ថ្ងៃទី​៣០ ខែកញ្ញា ហើយ​ពានរង្វាន់​សម្ដេច​អគ្គមហាសេនាបតី​តេ​ជោ ហ៊ុន សែន ថ្នាក់ជាតិ វគ្គ​ផ្ដាច់ព្រ័ត្រ នឹង​ប្រព្រឹត្តទៅ​នៅ​ថ្ងៃទី​០៦ ខែតុលា​។ ចំណែក​សកម្មភាព​ប្រកួត​មិត្តភាព​អន្តរជាតិ​របស់​របស់​ក្រុម​ជម្រើសជាតិ​កម្ពុជា មាន​ចំនួន​៤​លើក​គឺ​នៅ​ថ្ងៃទី១០ ខែកញ្ញា ត្រូវ​ប្រកួត​ជាមួយ ក្រុម​ជម្រើសជាតិ​ម៉ាឡេស៊ី ហើយ​នៅ​ថ្ងៃទី​១២ ខែតុលា ត្រូវ​បន្ត​ប្រកួត​ជាមួយ​ក្រុម​ជម្រើសជាតិ​ទី​ម័​រ​ខាងកើត និង​នៅ​ថ្ងៃទី​១៦ ខែតុលា ប្រកួត​ជាមួយ​ក្រុម​ជម្រើសជាតិ​សិង្ហ​បុរី​។ ចុងក្រោយ​នៅ​ថ្ងៃទី​២ ខែវិច្ឆិកា កម្ពុជា ត្រូវ​បន្ត​ប្រកួត​ជាមួយ ក្រុម​បរទេស (​មិនទាន់​ប្រាកដ​ថា ​ក្រុម​ណា​)​។ ចំណែក​ប្រកួត​បន្ត​គឺ​ក្នុង​ពានរង្វាន់ AFF Suzuki Cup ដែល​កម្ពុជា ស្ថិតនៅក្នុង​ពូ​ល A ជាមួយ​ក្រុម​វៀតណាម ម៉ាឡេស៊ី មី​យ៉ាន់​ម៉ា និង​ឡាវ ខណៈ​ពូ​ល B មាន​ថៃ ឥណ្ឌូណេស៊ី ហ្វីលីពីន សិង្ហ​បុរី និង​ក្រុម​ឈ្នះ​នៅ​វគ្គ​ជម្រុះ​អាចជា​ប្រ៊ុយណេ ឬ​ទី​ម័​រ​ខាងកើត​។ តាម​គម្រោងការ​វគ្គ​ជម្រុះ​តាម​ពូ​ល​នេះ​នឹងធ្វើ​ឡើ​ងចាប់ពី​ថ្ងៃទី​៨ ខែវិច្ឆិកា ដល់​ថ្ងៃទី​១៥​ខែធ្នូ ឆ្នាំ​២០១៨៕

 

Source: Kampuchea Thmey Daily