ភ្នំពេញ ៖ ភាពភ្ញាក់ផ្អើលមួយបានកើតឡើង ខណៈដែលគេបានឃើញផ្សែងយ៉ាងខ្មួលខ្មាញ់ហុយចេញពីបង្គោលភ្លើង ផ្តើមពីឆ្លងចរន្តអគ្គិសនីកាលពីវេលាម៉ោង ៥និង៣០នាទីល្ងាច ថ្ងៃទី២៣ ខែសីហា ឆ្នាំ២០១៨ នៅតាមបណ្តោយផ្លូវលេខ២៨៧ កែងផ្លូវ៥៦៤ សង្កាត់បឹងកក់១ ខណ្ឌទួលគោក រាជធានីភ្នំពេញ។
ប្រភពព័ត៌មានពីនៅកន្លែងកើតហេតុបានប្រាប់ឲ្យដឹងថា មុនពេលកើតហេតុ គេបានឃើញមានផ្សែងហុយៗចេញពីបង្គោលភ្លើង បានឆាបឆេះយ៉ាងសន្ធោសន្ធៅនៅបង្គោលភ្លើងខាងលើនេះ។ ភ្លាមៗនោះ បងប្អូនប្រជាពលរដ្ឋនៅក្បែរនោះ បាននាំគ្នា យកបំពុងពន្លត់អគ្គិភ័យមកបាញ់ពន្លត់តែមិនរលត់ ក៏បាននាំគ្នា យកទុយោទឹកបាញ់បន្ថែមទៀតតែនៅតែមិនរលត់ ទើបរាយការណ៍ទៅសមត្ថកិច្ចមូលដ្ឋានឲ្យជួយអន្តរាគមន៍ ដោយហៅរថយន្តពន្លត់អគ្គីភ័យមកបាញ់ពន្លត់បន្ថែមទៀត។
ក្រោយពីសមត្ថកិច្ចជំនាញផ្នែកពន្លត់អគ្គិភ័យចុះមកអន្តរាគមន៍បាញ់ទឹកពន្លត់អស់ទឹកមួយស៊ីទែន នៅវេលាម៉ោង ៦និង០០នាទីល្ងាចថ្ងៃដដែរ ភ្លើងក៏បានរលត់ជាស្ថាពរ។
សមត្ថកិច្ចបានប្រាប់ឲ្យដឹងទៀតថា ករណីអគ្គិភ័យខាងលើបានឆាប់ឆេះអស់បង្គោលភ្លើង មួយដើម តែសំណាងល្អមិនបង្កឲ្យមានមនុស្សរងគ្រោះថ្នាក់នោះទេ៕
Source: Kampuchea Thmey Daily
0 Comments