អង់គ្លេស ប្រកាស​គាំទ្រ​ចំពោះ​គំរោង​បង្កើត “​ឧ​ត្ត​ម​ក្រុមប្រឹក្សា​ពិគ្រោះ​យោបល់​ថ្នាក់ជាតិ​” របស់​សម្តេច​តេ​ជោ ហ៊ុន សែន

ភ្នំពេញ​ ៖ ការប្រកាស​គាំទ្រ​នេះ បានធ្វើ​ឡើង​នៅក្នុង​ជំនួប​រវាង​លោក​ទេសរដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ​កម្ពុជា ជាមួយ លោក​ម៉ាក ហ្វៀលដ៍ (Mark Field) អនុរដ្ឋមន្ត្រី​ការបរទេស​ទទួលបន្ទុក​តំបន់​អាស៊ី និង​ប៉ាស៊ីហ្វិក នៃ​ប្រទេស​អង់គ្លេស កាលពី​រសៀល​ថ្ងៃទី​២២ ខែសីហា ឆ្នាំ​២០១៨​។



លោក កេ​ត សោ​ផាន់ អ្នកនាំពាក្យ​ក្រសួងការបរទេស​បាន​ថ្លែង​ប្រាប់​អ្នកសារព័ត៌មាន​បន្ទាប់​ពី​ចប់​កិច្ចពិភាក្សា​នោះ​ថា នៅក្នុង​ជំនួប​នោះ​ដែរ ​លោក​ទេសរដ្ឋមន្ត្រី ប្រាក់ សុខុន បាន​ស្វាគមន៍​ដំណើរ​ទស្សនកិច្ច​របស់​លោក Mark Field មក​ទស្សនកិច្ច​ផ្លូវការ​នៅ​កម្ពុជា ហើយ​លោក Mark Field អះអាងថា រដ្ឋាភិបាល​អង់គ្លេស​ត្រូវ​ការ​គាំទ្រ​ពី​កម្ពុជា ដើម្បី​ធ្វើជា​ដៃគូ​ពិគ្រោះ​យោបល់​គ្រប់​ជ្រុងជ្រោយ​របស់​អាស៊ាន បន្ទាប់ពី​អង់គ្លេស​ចេញពី​អឺរ៉ុប ហើយ​អង់គ្លេស​កម្មវិធី​មួយចំនួន ដែល​ត្រូវ​សហការ​ជាមួយ​អាស៊ាន លើ​វិស័យសេដ្ឋកិច្ច ក៏ដូចជា​នយោបាយ ជាពិសេសបញ្ហា​សន្តិសុខ ការពារជាតិ ភេរវកម្ម និង​ការជួញដូរ​គ្រឿងញៀន​ជាដើម​។ ក្រៅពីនេះ ក៏មាន​ទំនាក់ទំនង​រវាង​ប្រជាជន​របស់​អាស៊ាន និង​ប្រជាជន​របស់​អង់គ្លេស ជាពិសេស​ផ្តោតទៅលើ​វិស័យ​អប់រំ ការ​បោស​សំអាត​មីន ហើយ​លោក Mark Field អះអាងថា លើ​ទំនាក់ទំនង​រវាង​ប្រជាជន និង​ប្រជា​ជននេះ មាន​សារសំខាន់​ណាស់ ដោយសារ​នៅ​កម្ពុ​ជាមាន​ប្រជាជន​អង់គ្លេស​រស់នៅ​ប្រហែល​៥០០០​នាក់​។



លើ​បញ្ហា​អប់រំ លោក Mark Field អះអាងថា អង់គ្លេស​សន្យា​ផ្តល់​អាហារូបករណ៍​ដល់​និស្សិត​កម្ពុជា ក្រោយ​ឧ​ត្ត​មសិ​ក្សា មានលទ្ធភាព​បន្ត​ការសិក្សា​នៅ​អង់គ្លេស​ឲ្យ​បាន​ច្រើន​ថែមទៀត​។



ជាមួយគ្នា​នោះ លោក​ទេសរដ្ឋមន្ត្រី ប្រាក់ សុខុន សម្តែង​ការស្វាគមន៍​អង់គ្លេស​ចូល​ជា​ដៃគូ​សន្ទនា​ជាមួយ​អាស៊ាន និង​ទទួល​បាន​ការ​គាំទ្រ​អង់គ្លេស​។ លោក​ក៏​អរគុណ​អង់គ្លេស ដែល​បន្ត​ផ្តល់​ភាពអនុគ្រោះ​ពន្ធ​ដល់​ប្រទេស​អភិវឌ្ឍ​ន៏​តិចតួច​រួមទាំង​កម្ពុជា​ផងដែរ​។



ទាក់ទង​ទិដ្ឋភាព​នយោបាយ​នៅ​ប្រទេស​កម្ពុជា លោក Mark Field បាន​លើកឡើង​ថា កម្ពុជា​បាន​ឆ្លងកាត់​នូវ​ប្រវត្តិ​មួយ​ដ៏​ជូ​ចត់ តាំងពី​របប​ផ្សេងៗ​រហូតដល់​របប​ប្រល័យ​ពូជ​សាស​ន៍ ដែលមាន​បញ្ហា​ជាច្រើន​ដែល​ត្រូវ​ប្រឈម​ដោះស្រាយ ហើយ​អង់គ្លេស​តែងតែ​ត្រៀមខ្លួន​ជានិច្ច ដើម្បី​ជួយ​កម្ពុជា នូវ​អ្វី​ដែល​អាចធ្វើ​បាន ដើម្បី​ឲ្យ​កម្ពុជា​នេះ មាន​អនាគត​ភ្លឺស្វាង ហើយ​លោក​ក៏បាន​គាំទ្រ​នូវ​ស្មារតី​នៃ​ការ​ផ្សះផ្សា​ជាតិ តាម​អ្វី​ដែល​បាន​កើតឡើង​ដោយ​សម្តេច​តេ​ជោ ហ៊ុន សែន គឺ​“​ឧ​ត្ត​ម​ក្រុមប្រឹក្សា​ពិគ្រោះ​យោបល់​ថ្នាក់​ជាតិ​” ដែល​ប្រមូល​មក​ចូល​គ្រប់​គណបក្ស​ទាំងអស់ ដើម្បី​ផ្លាស់​ប្តូរ​យោបល់​គ្នា ហើយ​លោក​សង្ឃឹម និង​អះអាងថា ដំណើរការ​នេះ ជា​ដំណើរការ​ជា​វិជ្ជមាន នៃ​ស្មារតី​នៃ​ការបង្រួបបង្រួម​ជាតិ និង​បន្ត​ទៅ​មុខ​ទៀត​៕

      

Source: Kampuchea Thmey Daily