ពានរង្វាន់លីគកំពូលកម្ពុជា (Metfone Cambodian League 2018) ក្រោមការរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា នឹងបន្តប្រកួតសប្ដាហ៍ទី១៩ របស់ខ្លួននៅចុងសប្ដាហ៍នេះដែលមាន៦គូព្រមទាំងមានផ្សាយផ្ទាល់គ្រប់ការប្រកួតទាំងអស់ក្រោមការចាប់ដៃគ្នារវាងទូរទស្សន៍ BTV Newគណៈកម្មការប្រកួតបាល់ទាត់ជាតិ(CNCC) និងសារព័ត៌មានកម្ពុជាថ្មី។
សរុបការប្រកួតក្នុងសប្ដាហ៍ទី១៩ នេះមាននៅថ្ងៃសៅរ៍ ទី២៥ ខែសីហា ក្រុមអគ្គស្នងការដ្ឋាននគរបាលជាតិ ប៉ះក្រុមភ្នំពេញក្រោន នៅវេលាម៉ោង៦ល្ងាចលើទីលានពហុកីឡដ្ឋានជាតិ ព្រមទាំងមានផ្សាយផ្ទាល់តាមទំព័រហ្វេសប៊ុក CNCC ហើយក្រុមក្រសួងការពារជាតិ ជួបក្រុមវិសាខា នៅវេលាម៉ោង៦ល្ងាចដូចគ្នា តែមានផ្សាយផ្ទាល់តាមប៉ុស្តិ៍ BTV News ខណៈក្រុមសូលទីឡូអង្គរ ទទួលក្រុមណាហ្គាវើល នៅវេលាម៉ោង៣និង៣០នាទីរសៀលលើទីលានកីឡដ្ឋានខេត្តសៀមរាប ព្រមទាំងមានផ្សាយផ្ទាល់តាមទំព័រហ្វេសប៊ុកកម្ពុជាថ្មី។
ចំណែក៣ប្រកួតផ្សេងទៀតបន្តប្រកួតនៅថ្ងៃអាទិត្យ ទី២៦ ខែសីហា ឆ្នាំ២០១៨ ដោយក្រុមអង្គរថាយហ្គឺរ ប៉ះក្រុមអាស៊ីអឺរ៉ុប នៅវេលាម៉ោង៣និង៣០នាទីរសៀលលើទីលានកីឡដ្ឋានខេត្តសៀមរាប ហើយមានផ្សាយផ្ទាល់តាមទំព័រហ្វេសប៊ុករបស់រស្មីកម្ពុជា ខណៈក្រុមអគ្គីសនីកម្ពុជា ប៉ះក្រុមវេស្ទើនភ្នំពេញ នៅម៉ោង៣រសៀល លើទីលានកីឡដ្ឋានអគ្គីសនីកម្ពុជា ព្រមទាំងមានផ្សាយផ្ទាល់តាមហ្វេសប៊ុក CNCC និងក្រុមព្រះខ័នរាជស្វាយរៀង ជួបក្រុមបឹងកេត នៅម៉ោង៦ល្ងាចលើទីលានកីឡដ្ឋានខេត្តស្វាយរៀង ដែលមានផ្សាយផ្ទាល់តាមប៉ុស្តិ៍ BTV News។
ងាកមកមើលចំណាត់ថ្នាក់បណ្តោះអាសន្នប្រចាំសប្ដាហ៍ទី១៨ នេះវិញឃើញថា ក្រុមណាហ្គាវើល ឡើងឈរកំពូលតារាង មាន៤៤ពិន្ទុ តាមពីក្រោយដោយក្រុមលេខ២ បឹងកេតអែហ្វស៊ី មាន៤២ពិន្ទុ ហើយក្រុមវិសាខា ឈរលេខ៣ មាន៤១ពិន្ទុ។ ក្រុមលេខ៤ក្រសួងការពារជាតិ មាន៣៨ពិន្ទុ ខណៈក្រុមលេខ៥ ភ្នំពេញក្រោន មាន២៧ពិន្ទុ ក្រុមលេខ៦ ក្រុមអគ្គស្នងការដ្ឋាននគរបាលជាតិ និងក្រុមលេខ៧ ព្រះខ័នរាជស្វាយរៀង មាន២៤ពិន្ទុដួចគ្នា។ ក្រុមលេខ៨ អង្គរថាយហ្គឺរ មាន២២ពិន្ទុ ស្មើគ្នាជាមួយក្រុមលេខ៩ អាស៊ីអឺរ៉ុប ហើយក្រុមលេខ១០ សូលទីឡូអង្គរ មាន១៦ពិន្ទុ ស្របពេលក្រុមអគ្គីសនីកម្ពុជា ឈរលេខ១១មាន៦ពិន្ទុ និងក្រុមវេស្ទើនភ្នំពេញ ឈរលេខ១២ មាន១ពិន្ទុ។
ពានរង្វាន់លីគកំពូលកម្ពុជា រដូវកាលនេះប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship ជាដើម៕
Source: Kampuchea Thmey Daily
0 Comments