សៀមរាប ៖ ជួបជាមួយអ្នកកាសែតនៅមុខតុលាការខេត្តសៀមរាប កាលពីពេលថ្មីៗនេះ ស្ត្រីជាម្តាយរបស់សព បានស្នើសុំឲ្យស្ថាប័នតុលាការ ជួយស៊ើបអង្កេតករណីកូនស្រីដួលម៉ូតូរហូតដល់ស្លាប់នោះ ឲ្យបានឆាប់ បន្ទាប់ពីសង្ស័យថា ជាអំពើឃាតកម្ម។
ស្ត្រីជាម្តាយរបស់សពមានឈ្មោះឈុំ ង៉ិ អាយុ ៥២ឆ្នាំ មានទីលំនៅភូមិគោមន ឃុំដំដែក ស្រុកសូទ្រនិគម ខេត្តសៀមរាបបានឲ្យដឹងថា កូនស្រីរបស់គាត់ និង គូដណ្តឹងបានជិះម៉ូតូឌុបគ្នាដើរលេង ហើយបានដួលម៉ូតូបណ្តាលឲ្យកូនស្រីរបស់គាត់ស្លាប់ នៅលើផ្លូវ ក្នុងភូមិគោលថ្មី ឃុំពពេល ស្រុកសូទ្រនិគម។ នៅក្នុងហេតុការណ៍នោះខាងប្រុសមិនមានរបួសធំដុំសោះ ឯម៉ូតូក៏មិនខូចខាតដែរ។ ចំណែកសាកសព មិនមានដាច់មុខ ដាច់មាត់ឬបាក់ដៃបាក់ជើងអ្វីទេ ហើយបែរជាផុងលលាក្បាលផ្នែកខាងក្រោយ។
ចំណុចនេះហើយ ដែលគាត់មិនអស់ចិត្តហើយសង្ស័យថា ជាអំពើឃាតកម្ម។ ស្ត្រីដដែលឲ្យដឹងទៀតថា ដោយសារហេតុផលនេះ រូបគាត់បានប្តឹងឲ្យសមត្ថកិច្ចជួយស្រាវជ្រាវឡើងវិញ។ តែបណ្តឹងដាក់តាំងពីថ្ងៃទី ១៦ខែមេសា ឆ្នាំ២០១៨ រហូតមកទល់ពេលនេះ សំណុំរឿងដល់តុលាការ តែនៅមិនទាន់ឃើញមានចំណាត់ការនៅឡើយ។
ក្នុងករណីនេះ កំណត់ហេតុចុះថ្ងៃទី២០ ខែ មេសានិងដីកាបញ្ជូនរបស់នគរបាល ស្រុកសូទ្រនិគមចុះថ្ងៃទី៩ ខែឧសភាឆ្នាំ២០១៨ បង្ហាញថា ជាករណីគ្រោះ ថ្នាក់ចរាចរណ៍។
ស្ត្រីដដែលបន្ថែមថា កូនស្រីគាត់ឈ្មោះតាន់ឌី ស៊ីយ៉ា អាយុ២៤ឆ្នាំ មុនពេលស្លាប់រស់នៅឃុំដំដែក ស្រុកសូទ្រគម។ កូនគាត់បានភ្ជាប់ពាក្យ និងគ្រោងរៀបការជាមួយគូដណ្តឹងឈ្មោះសេង ពិសិទ្ធ ដែលបង្កឲ្យកូនគាត់ស្លាប់នេះ នៅថ្ងៃទី១៥ ខែ មេសាឆ្នាំ២០១៨។ តែពួកគេបានរួមរស់ជាមួយ គ្នា៤ទៅ៥ខែមុនមកហើយ ហើយក៏មានជម្លោះជាប្រចាំផងដែរ។
ឈុំ ង៉ិ បញ្ជាក់ថា នៅក្នុងរឿងនេះ រូបគាត់ក៏បានប្តឹងពីឈ្មោះសេង ពិសិទ្ធ ពីបទបើកបរបង្កគ្រោះថ្នាក់ចរាចរណ៍ បណ្តាលឲ្យអ្នករួមដំណើរស្លាប់ និងទាមទារសំណងចំនួនប្រាំពីរពាន់ដុល្លារអាមេរិក(៧០០០$)។ ចំណែកករណីឃាតកម្មលើរូបកូនស្រី ក៏សុំឲ្យតុលាការពន្លឿនក្នុងការស៊ើបអង្កេត ដើម្បីចាប់ជនដៃដល់មកផ្តន្ទាទោសតាមផ្លូវច្បាប់ផងដែរ។
អ្នកនាំពាក្យសាលាដំបូងខេត្តសៀមរាបលោកយិន ស្រាង បានឲ្យដឹងតាមទូរស័ព្ទថា សំណុំរឿងនេះលោកនិងឆែកមើល ថាតើកំពុងស្ថិតនៅក្នុងដៃចៅក្រមរូបណា។ ដំណើរការយ៉ាងណាហើយ។ ក្រោយពេលឆែក លោកនឹងផ្តល់ចម្លើយតាមក្រោយដល់អ្នកព័ត៌មានបន្ថែមទៀត៕
Source: Kampuchea Thmey Daily
0 Comments