ភ្នំពេញ ៖ ការទាមទារនេះ បានធ្វើឡើងនៅសន្និសីទសារព័ត៌មានមួយស្តីពីការបញ្ចប់សមាជិកភាពមន្ត្រីជាន់ខ្ពស់គណបក្សហ៊្វុនស៊ិនប៉ិចចំនួន៤រូប កាលពីថ្ងៃទី០៨ ខែសីហា ឆ្នាំ២០១៨ គឺលោក យូរ ហុកគ្រី, លោក ញ៉េប ប៊ុនជិន, លោក ប៉ោ ប៊ុនស្រឺ និងលោក វ៉ាន់ សុផាន់ណា កាលពីព្រឹកថ្ងៃទី២៣ ខែសីហា ឆ្នាំ២០១៨ ដែលសន្និសីទនេះធ្វើឡើងនៅសណ្ឋាគារសាន់វេ។
ថ្លែងនៅក្នុងសន្និសីទនោះ លោក យូរ ហុកគ្រី បានលើកឡើងថា រហូតមកដល់ពេលនេះ ពួកលោកទាំងអស់គ្នាមិនដឹងពីកំហុសរបស់ខ្លួនដែលនាំឲ្យឈានដល់ការបណ្តេញចេញពីគណបក្សនោះទេ។ ពួកគាត់គឺព្រឹទ្ធាចារ្យ ជាមនុស្សចាស់នៅក្នុងគណបក្សនេះ និយាយទៅចូលរួមហ៊្វុនស៊ិនប៉ិចតាំងពីព្រះអង្គម្ចាស់នរោត្តម ចក្រាវុឌ្ឍ មិនទាន់ចាប់កំណើតម្ល៉េះ។
លោកបញ្ជាក់ថា “សន្និសីទនៅថ្ងៃនេះ មិនមែនជាការធ្វើឡើងដើម្បីតតាំងនៅក្នុងហ៊្វុនស៊ិនប៉ិចនោះទេ ពីព្រោះហ៊្វុនស៊ិនប៉ិច ជាគណបក្សដែលយើងជ្រកកោនមកមានរយៈពេលជាង៤០ឆ្នាំមកហើយ តែគ្រាន់ដើម្បីជម្រាបមហាជនឲ្យបានជ្រាប ថាតើពួកយើងទាំងអស់នេះ បានធ្វើអីខុស រហូតដល់មានការបណ្តេញចេញពីសមាជិក ក្រោយការដកពីអនុប្រធាន និងតួនាទីផ្សេងៗទាំងអស់ យើងបានរក្សាការស្ងាត់ស្ងៀម”។
លោក យូរ ហុកគ្រី បញ្ជាក់ថា លោកបានចូលហ៊្វុនស៊ិនប៉ិចតាំងពី២សប្តាហ៍ក្រោយហ៊្វុនស៊ិនប៉ិច កើតឡើងម្ល៉េះ ដែលកាលនោះសម្តេចឪបានផ្ញើព្រះរាជសារទទួលខ្ញុំជាសមាជិកស្ថាបនិក នៅថ្ងៃទី០៨ ខែមេសា ឆ្នាំ១៩៨១ (ហ៊្វុនស៊ិនប៉ិចកើតថ្ងៃ២១ ខែមីនា ឆ្នាំ១៩៨១) ហើយបានខិតខំធ្វើរហូតដល់សហរដ្ឋអាមេរិកទៀត។ លោកបន្តថា ...ហើយហេតុអីបានជាខ្ញុំជាប់ជំពាក់វាក់វិនជាមួយសម្តេចក្រុមព្រះ ខ្ញុំស្គាល់សម្តេចក្រុមព្រះតាំងពីឆ្នាំ១៩៦៧-១៩៦៨ ម្លេះ...មុនថ្ងៃដែលព្រះអង្គរៀបអាពាហ៍ពិពាហ៍ទៅទៀត អីចឹងខ្ញុំស្គាល់សម្តេចក្រុមព្រះមុនកំណើតរបស់ព្រះអង្គម្ចាស់នរោត្តម ចក្រាវុឌ្ឍ ទៅទៀត... ហើយកាដែលចុះហត្ថលេខាដកយើងហ្នឹងប្រធានស្តីទី។
ប្រធានស្តីទីមានបុព្វសិទ្ធិអីទូលំទូលាយដេញសមាជិក នៅ៤០ឆ្នាំក្នុងគណបក្ស មិនបានប្រាប់ខុសចេះៗមួយអត់ប្រាប់ទាំងអស់.....ដូច្នេះប្រាប់យើងខ្ញុំផង យើងចង់ដឹង”។
ជាមួយគ្នានោះ លោក យូរ ហុកគ្រី បានបញ្ជាក់ថា នៅពេលសម្តេចក្រុមព្រះសំរាកព្យាបាលនៅថៃ ព្រះអង្គផ្ញើសាមកឲ្យរកលុយ៨ម៉ឺនដុល្លារ តែលោកបានប្រមូលភ្លាមៗពីអ្នកតំណាងរាស្ត្រចំនួន៤០នាក់ នៅរដ្ឋសភាបានចំនួន៤ម៉ឺនដុល្លារ។
ចំណែកបញ្ហាត្រា ដែលមានការចោទថា លោកបានធ្វើត្រាក្លែងក្លាយនោះ លោក យូរ ហុកគ្រី អះអាងថា ត្រានេះមានការអនុញ្ញាតិត្រឹមត្រូវពីគណៈកម្មការគណបក្ស ដែលមានឯកសារត្រឹមត្រូវ ដើម្បីប្រើប្រាស់ជាប្រយោជន៍គណបក្ស។
ចំណែកលោក ប៉ោ ប៊ុនស្រឺ ដែលថ្លែងក្នុងសំឡេងខ្លាំងៗបានលើកឡើងថា “ខ្ញុំសុំតែមួយគត់ គាល់ព្រះអង្គ... ខ្ញុំមានអារម្មណ៍ចឹង ខ្ញុំចង់គាល់លោក...ជួបមិនជួបហីទៅ តែខ្ញុំគ្រាន់តែចង់ជួប បើមិនឲ្យខ្ញុំជួបហីទៅ មិនឲ្យជួប ប៉ុន្តែគ្រាន់តែមានលាយលក្ខណ៍អក្សរពីលោកថា ណែលោកសឺ ខ្ញុំមិនឲ្យលោកជួបទេ លោកឈប់ហើយ ខ្ញុំស្គាល់អក្សរលោកតើ។ ខ្ញុំបម្រើលោក ហើយនិយាយភាសាសាមញ្ញ អ្នកដែលបម្រើស្តេច មានតែខ្ញុំទេ នៅក្នុងហ៊្វុនស៊ិនប៉ិច រហូតដល់សព្វថ្ងៃហ្នឹង រហូតដល់ដេញចេញហ្នឹង”។
ទាក់ទងបញ្ហានេះ កម្ពុជាថ្មីមិនអាចស្វែងរកការបញ្ជាក់ពីគណបក្សហ៊្វុនស៊ិនប៉ិចបានទេ ទាក់ទងការលើកឡើងនេះបានទេ ប៉ុន្តែលោក ណុប សុធារិទ្ធ ជាអ្នកនាំពាក្យថ្មីរបស់គណបក្សហ៊្វុនស៊ិនប៉ិច ធ្លាប់បានថ្លែងប្រាប់កម្ពុជាថ្មីថា ការចំរេចបញ្ចប់សមាជិកភាពមន្ត្រីជាន់ជាន់ខ្ពស់ចំនួន៤រូបនេះ ដោយសាតេឌឺជាមួយព្រះអង្គ។ លោកបញ្ជាក់យ៉ាងនេះថា ទីមួយលោកសព្វព្រះទ័យថា មិនគោរពនូវការឡាយព្រះហស្ថលេខារបស់បីតាលោក ទីពីរទម្រង់លិខិតស្នើនោះខុស ពីព្រោះសម្តេចក្រុមព្រះបានឡាយព្រះហស្ថលេខាមកឲ្យបុត្ររបស់លោកតាំងពីថ្ងៃទី០៨ ដូចភាសាមួយគេថា “ឌឺ” ការឡាយព្រះហស្ថលេខា គឺត្រូវធ្វើតាម ដូច្នេះព្រះអង្គរុញទូកបណ្តោយទឹកតែម្តងទៅ”។
ជាការកត់សម្គាល់ ក្នុងរយៈពេលចុងក្រោយនេះ ផ្ទៃក្នុងរបស់គណបក្សរាជានិយមហ៊្វុនស៊ិនប៉ិច ហាក់មានការរង្គោះរង្គើរផ្ទៃក្នុងយ៉ាងខ្លាំង បន្ទាប់ពីព្រះអង្គម្ចាស់ នរោត្តម ចក្រាវុឌ្ឍ ដែលជាបុត្រាច្បងរបស់សម្តេចក្រុមព្រះ ត្រូវបានតែងតាំងជាប្រធានស្ដីទីគណបក្ស ខណៈដែលសម្ដេចក្រុមព្រះ នរោត្តម រណឫទ្ធិ កំពុងសម្រាកព្យាបាលព្រះរាជសុខភាពនៅប្រទេសថៃ៕
Source: Kampuchea Thmey Daily
0 Comments