លោក​សាស្ត្រាចារ្យ ដា​វីដ ឡែ​ម​តុ​ន​ធ្វើ​បាឋកថា​ស្តី​«​គោលនយោបាយ​ការបរទេស​សហរដ្ឋអាមេរិក​ក្រោម​រដ្ឋបាល​របស់លោក Donald Trump និង​អត្ថន័យ​ចំពោះ​អាស៊ី​»

ភ្នំពេញ ៖ តប​តាម​ការ​អញ្ជើញ​របស់​វិទ្យាស្ថាន​ទំនាក់ទំនង​អន្តរជាតិ​នៃ​រាជបណ្ឌិត្យសភាកម្ពុជា​លោក​សាស្ត្រាចារ្យ ដា​វីដ ឡែ​ម​តុ​ន (David M. Lampton) អ្នកស្រាវជ្រាវ​ជាន់ខ្ពស់​នៃ​សាកលវិទ្យាល័យ Johns Hopkins សហរដ្ឋអាមេរិក​បាន​អញ្ជើញ​មក​ធ្វើ​បាឋកថា​ស្តី​«​គោលនយោបាយ​ការបរទេស​សហរដ្ឋ​អាម៉េរិក​ក្រោម​រដ្ឋបាល​របស់លោក Donald Trump និង​អត្ថន័យ​ចំពោះ​អាស៊ី​»​នា​ព្រឹក​ថ្ងៃទី​២៣ ​ខែសីហា​ ឆ្នាំ​២០១៨ ​នៅ​រាជបណ្ឌិត្យសភាកម្ពុជា​ក្រោម​កិច្ចសម្របសម្រួល​កម្មវិធី​ផ្ទាល់​ដោយ​លោក​បណ្ឌិតសភា​ចា​រ្យ សុខ ទូច ប្រធាន​រាជបណ្ឌិត្យសភាកម្ពុជា​។



លោក​សាស្ត្រាចារ្យ ដា​វីដ ឡែ​ម​តុ​ន (David M. Lampton) គឺជា​បញ្ញវន្ត​ជាន់ខ្ពស់​មួយរូប​របស់​សហរដ្ឋ​អាម៉េរិក ដែលមាន​បទពិសោធន៍​ការងារ​ដ៏​ទូលំទូលាយ និង​មាន​ស្នាដៃ​វិទ្យាសាស្ត្រ​កម្រិត​ខ្ពស់ ដែល​ផ្តោត​ជាពិសេស​លើ​គោលនយោបាយ​ការបរទេស​សហរដ្ឋអាមេរិក ហើយ​រូបលោក​សាស្ត្រាចារ្យ​ក៏​ជា​អ្នកឯកទេស​សិក្សា​អំពី​ចិន​ផងដែរ​។



លោក​បណ្ឌិតសភា​ចា​រ្យ សុខ ទូច ប្រធាន​រាជបណ្ឌិត្យសភាកម្ពុជា​បាន​សំដែង​នូវ​ការស្វាគមន៍​យ៉ាង​កក់ក្តៅ​ចំពោះ​លោក​សាស្ត្រាចារ្យ​បណ្ឌិត ដា​វីដ ឡែ​ម​តុ​ន និង​សាស្ត្រាចារ្យ​ពីររូប​ទៀត​គឺ​លោក​សាស្ត្រាចារ្យ​បណ្ឌិត គួ​ក ឆេង​វី (Kuik Cheng Chwee) មកពី​សាកលវិទ្យាល័យ​ជាតិ​ម៉ាឡេស៊ី និង​លោកស្រី​សាស្ត្រាចារ្យ​បណ្ឌិត សេ​លី​ណា ហូ​(Selina Ho) មកពី​សាកលវិទ្យាល័យ​ជាតិ​សិង្ហ​បុរី ដែល​បាន​អមដំណើរ​ជាមួយ​លោក​សាស្ត្រាចារ្យ ដា​វីដ ឡែ​ម​តុ​ន មកកាន់​រាជបណ្ឌិត្យសភាកម្ពុជា​នា​ពេលនេះ​។



លោក​បណ្ឌិតសភា​ចា​រ្យ សុខ ទូច បាន​លើកឡើងថា ​”​សំរាប់​ទស្សនៈ​ផ្ទាល់​របស់ខ្ញុំ នៅពេលដែល​គេ​និយាយ​ពី​គោលនយោបាយ​ការបរទេស​សហរដ្ឋអាមេរិក វា​ហាក់ដូច​ជាមាន​ចំណុច​ខុសគ្នា​ខ្លះ រវាង​គោលនយោបាយ​របស់លោក អូ​បា​ម៉ា​និង​គោលនយោបាយ​របស់លោក ដូ​ណា​ល់​ត្រាំ​។​ ក្នុង​ទំនាក់ទំនង​ជាមួយ​អាស៊ី​លោក ដូ​ណា​ល់​ត្រាំ មាន​វិធីសាស្ត្រ​ផ្សេង ដោយ​លោក​គិតគូរ​ពី​ពាណិជ្ជ​ឆ្លាត មិនមែន​ពាណិជ្ជកម្ម​សេរី​ឡើយ​។ ម្យ៉ាងទៀត​រដ្ឋបាល​លោក ដូ​ណា​ល់​ត្រាំ ក៏​មិន​យកចិត្តទុកដាក់​និង​គាំទ្រ សម្ព័ន្ធ​មិត្ត​អាមេរិក​ខ្លាំង​ដែរ ហើយ​រដ្ឋបាល​នេះ​ក៏​មិនសូវ​មាន​ចំណាប់អារម្មណ៍​លើ​ការលើកស្ទួយ​ពហុ​ស្ថាប័ន​ដូច​របប​ដឹកនាំ​របស់​លោក អូ​បា​ម៉ា​ដែរ​។​ តែ​យ៉ាងណាក៏ដោយ សហរដ្ឋអាមេរិក​នៅតែ​មិន​បោះបង់​អាស៊ី​។​”



នៅពេល​គេ​គិត​ពី​អាស៊ី គេ​ពិតជា​គិត​អំពី​អាស៊ី​បូព៌ា។ ​ការ​នេះ​មានន័យថា ប្រទេស​ចិន​គឺជា​ក្តីបារម្ភ​ជា​ដៃគូ​ប្រជែង​ផ្នែក​ពាណិជ្ជកម្ម ជា​អ្នក​ប្រកួតប្រជែង​ខាង​វិស័យ​យោធា​ផង​ដែរ​។​ប៉ុន្តែ​ជា​មួយ​គ្នា​នេះ រដ្ឋ​បាល​លោក ដូ​ណា​ល់​ត្រាំ កំពុង​ផ្តោត​ការយកចិត្តទុកដាក់​ប្រទេស​មហាអំណាច​អាស៊ី​ដូចជា ជប៉ុន​និង​កូរ៉េខាងត្បូង​ផង​ដែរ​។

សហរដ្ឋអាមេរិក​មើល​ឃើញ​ថា ប្រទេស​កូរ៉េខាងជើង​គឺជា​ការ​គំរាមកំហែង​ដ៏​ធំ​មួយ​។​ពិភពលោក​ហាក់​ស្ថិត​នៅក្បែរ​មាត់ជ្រោះ​នៃ​សង្គ្រាម​ខណៈ​សង្គ្រាម​ពាណិជ្ជកម្ម រវាង​សហរដ្ឋអាមេរិក​ជាមួយ​សហភាព​អឺរ៉ុប ជាមួយ​កាណាដា ជាពិសេស​ជាមួយ​ចិន​និង​ឥណ្ឌា ដែល​សុទ្ធ​តែ​ជា​មហា​យក្ស​អាស៊ី កំពុង​ឆាបឆេះ​ទៅ​ហើយ​។ បាតុភូត​នេះ​គឺ​ពិតជា​ហានិភ័យ​ធំ​ណាស់​ ចំពោះ​សេដ្ឋកិច្ច​ពិភពលោក​។ ដូច្នេះ សហរដ្ឋអាមេរិក និង​បណ្តា​ប្រទេស​ទាំងនោះ​គួរតែ​រក​ដំណោះស្រាយ​សមស្រប​ដោយ​សន្តិវិធី​ក្នុងស្ថានភាព​ឈ្នះ ឈ្នះ ដើម្បី​បញ្ចៀស​ឲ្យ​បាន​នូវ​ហានិភ័យ​ទាំងនេះ​និង​ដើម្បី​វិបុលភាព​ពិភពលោក​។

គួរ​បញ្ជាក់ថា​នៅក្នុង​ពិធី​បាឋកថា​ស្តី​«​គោលនយោបាយ​ការបរទេស​សហរដ្ឋ​អាម៉េរិក​ក្រោម​រដ្ឋបាល​របស់លោក Donald Trump និង​អត្ថន័យ​ចំពោះ​អាស៊ី​»​ទទួលបាន​ការចាប់​អារម្មណ៍​ខ្លាំង​ពី​សំណាក់​អ្នកចូលរួម​ដែល​ជា​មន្ត្រីរាជការ​នៃ​រាជបណ្ឌិត្យសភាកម្ពុជា និស្សិត​មកពី​សកលវិទ្យា​ល័យ សិស្ស និង​កម្មសិក្សាការី​មកពី​សាលា​ភូមិន្ទ​រដ្ឋបាល​និង​ស្ថាប័ន​ដែល​ពាក់​ព័ន្ធ​មួយចំនួន​ថែមទៀត​៕

    

Source: Kampuchea Thmey Daily