ភ្នំពេញ ៖ ម្ចាស់ជ័យលាភីមេដាយមាសយុវសិស្ស អៀង ហ៊ុយឃាងមកពីវិទ្យាល័យព្រះមុនីវង្ស ខេត្តបាត់ដំបង បានសំណូមពរឲ្យសិស្សានុសិស្ស ដែលត្រៀមទៅចូលរួមប្រកួតប្រជែងថ្នាក់អន្តរជាតិនៅឆ្នាំក្រោយៗ ត្រូវខិតខំព្យាយាមរៀនភាសាអង់គ្លេសឲ្យបានខ្លាំងក្លាបន្ថែមទៀតដើម្បីងាយស្រួលក្នុងការដោះស្រាយកិច្ចការប្រឡងព្រោះថាវិញ្ញាសាប្រឡងគេប្រើប្រាស់ពាក្យបច្ចេកទេសផ្នែកភាសាអង់គ្លេសខ្ពស់ៗ។
យុវសិស្ស អៀង ហ៊ុយឃាងទទួលបានមេដាយមាស ១គ្រឿងពីការប្រកួតប្រជែងអ្នកវិទ្យាសាស្ត្រវ័យក្មេង អាស៊ានបូក៣ លើកទី៧ នៅទីក្រុងកូឡាឡាំពួរ ប្រទេសម៉ាឡេស៊ីនេះធ្វើឡើងក្រោម ប្រធានបទ "វិទ្យាសាស្ត្រ និងការបង្កើតថ្មីដើម្បីសុខភាព និងសុខុមាលភាពសង្គម" ដែលមានបេ ក្ខជនចូលរួម ចំនួន៥៧នាក់ មកពីបណ្ដាប្រទេសអាស៊ាន រួមជាមួយប្រទេសកូរ៉េ ដែលបានប្រព្រឹត្តទៅចាប់ពីថ្ងៃទី២៩ ខែកក្កដា ដល់ថ្ងៃទី០៤ ខែសីហា ឆ្នាំ២០១៨។
ក្រៅពីនេះយុវសិស្ស ឡី ឡាយអាន ភេទប្រុស សាលាអន្តរជាតិឌូវី ខេត្តបាត់ដំបងទទួលបាន មេដាយប្រាក់ ១គ្រឿង និងមេដាយសំរឹទ្ធ២គ្រឿង យុវសិស្ស ស្រ៊ុន រដ្ឋា ភេទប្រុស វិទ្យាល័យហ៊ុនសែន១មិថុនា ខេត្តតាកែវ មេដាយសំរឹទ្ធ៣គ្រឿងយុវសិស្ស ពេជ្ច ពុធស្រីនាថ ភេទស្រី វិទ្យាល័យព្រះបាទសុរាម្រិត ខេត្តកំពង់ឆ្នាំង មេដាយសំរឹទ្ធ២គ្រឿងនៅក្នុងកម្មវិធីប្រឡងដូចគ្នា។
យុវសិស្ស អៀង ហ៊ុយឃាងនិយាយបន្តថា «តាមពិតសមត្ថភាពរបស់សិស្សខ្មែរយើងគឺមិនចាញ់សិស្សបរទេសនោះទេ ទាំងទ្រឹស្ដី និងការអនុវត្តជាក់ស្តែង ប៉ុន្តែអ្វីដែលសិស្សខ្មែរយើងនៅមានការខ្វះខាតនោះគឺភាសាអង់គ្លេសនៅមានកម្រិតនៅឡើយបើសិនជាខ្លាំងទៅលើភាសានេះនោះនឹងទទួលបានមេដាយច្រើនជាងនេះ»។
ជាក់ស្តែងសម្រាប់យុវសិស្ស អៀង ហ៊ុយឃាងការចូលរួមប្រឡងនៅប្រទេសម៉ាឡេស៊ីហើយទទួលបានមេដាយមាសនេះគឺដោយសារសមត្ថភាពផ្ទាល់ខ្លួនរបស់ប្អូនតែម្តងដោយប្អូនបានធ្វើការជាក្រុមជាមួយសិស្ស៥នាក់ទៀតមកពីតាមបណ្តាប្រទេសផ្សេងៗគ្នាដោយគេឲ្យវិញ្ញាសាដាច់ដោយឡែកៗពីគ្នា។
សម្រាប់ប្អូនគេបានដាក់វិញ្ញាសាទាក់ទងនឹងដំណោះស្រាយទាក់ទងជំងឺគ្រុនចាញ់ដោយប្អូនបានបង្កើតឧបករណ៍ថ្មីមួយដែលអាចការពារមូសមិនឲ្យចូលជិតបានដោយចំណាយថវិកាតិចហើយអាចកាត់បន្ថយការចំលងជំងឺគ្រុនចាញ់បានទៀតផង។
ប្អូនបានបញ្ជាក់ថា តាមរយៈការបង្កើតឧបករណ៍នេះហើយ ទើបប្អូនទទួលបានមេដាយមាសពីកម្មវិធីការប្រកួតប្រជែងអ្នកវិទ្យាសាស្ត្រវ័យក្មេង អាស៊ានបូក៣ លើកទី៧ នៅទីក្រុងកូឡាឡាំពួរ ប្រទេសម៉ាឡេស៊ីនេះធ្វើឡើងក្រោម ប្រធានបទ "វិទ្យាសាស្ត្រ និងការបង្កើតថ្មីដើម្បីសុខភាព និងសុខុមាលភាពសង្គម"។
លោកគ្រូដឹកនាំសិស្សទោចូលរួមប្រឡងលើកនេះបានមានប្រសាសន៍ថាក្រៅពីនេះសិស្សកម្ពុជាក៏ទទួលបានពានពិសេសមួយដែលមានភាពរាក់ទាក់ជាងគេនៅក្នុងតំបន់អាស៊ាននិងជាប់លេខ១ជាកញ្ញាឯកអ្នកវិទ្យាសស្ត្រវ័យក្មេងប្រចាំអាស៊ានបូកបីឆ្នាំ២០១៨ផងដែរ។
ចំណែកលោកអ៊ឹង ង៉ោហុក ប្រធាននាយកដ្ឋានមធ្យមសិក្សាចំណេះទូទៅនៃក្រសួងអប់រំយុវជននិងកីឡាបានមានប្រសាសន៍ថានេះគឺជាកិត្តិយសមួយដ៏ធំធេងណាស់ដែលសិស្សកម្ពុជាចំនួន៤រូបបាននាំយកមេដាយមាសប្រាក់និងសំរឹទ្ធសរុបចំនួន៩គ្រឿងមកជួនជាតិមាតុភូមិហើយលទ្ធផលនេះធ្វើឲ្យប្រទេសកម្ពុជាអាចស្មើមុខស្មើមាត់ជាមួយបណ្តាប្រទេសនានានៅក្នុងតំបន់អាស៊ានក៏ដូចជានៅលើពិភពលោក។
លោកអ៊ឹង ង៉ោហុក បានណែនាំដល់សិស្សខិតខំសិក្សារៀនសូត្រនិងពង្រឹងសមត្ថភាពបន្ថែមទៀតដើម្បីដណ្តើមយកមេដាយឲ្យបានកាន់តែច្រើនជួនជាតិមាតុភូមិនៅពេលទៅចូលរួមប្រឡងថ្នាក់អន្តរជាតិនៅលើកក្រោយៗទៀត៕
Source: Kampuchea Thmey Daily
0 Comments