ប្រទេសថៃ ៖ ពលករខ្មែរម្នាក់ ដែលត្រូវជាអតីតស្វាមី និងជាមនុស្សចូលចិត្តសេពគ្រឿងស្រវឹង និងតែងតែវាយធ្វើបាបស្ត្រីជាភរិយា កាលពីមិនទាន់មានការលែងលះ ត្រូវបានស្លាប់នៅក្នុងថ្លុកឈាម ដែកគេសង្ស័យថា ឃាតកអាចជាភរិយារបស់គេនោះតែម្តង បន្ទាប់ពីគេបានធ្វើដំណើរទៅរកប្រពន្ធវិញទាំងកណ្តាលអធ្រាត្រ។
ហេតុការណ៍នៃអំពើឃាតកម្មដែលកម្ពុជាថ្មីទទួលបាននេះគឺ អាចកើតឡើងនៅពេលរំលងអធ្រាត្រ យប់ថ្ងៃទី ៣ ខែសីហា ឆ្នាំ២០១៨ នៅខាងមុខអគារស្នាក់របស់កម្មករលេខ ៥២ ស្ថិតនៅប៉ែកខាងក្រោយ រោងចក្រ ចែអាសំបូរ ផារ៉ាវូត ក្នុងភូមិ១ ឃុំឆាកដូនស្រុកខ្លែង ខេត្តរៈយ៉ង ប្រទេសថៃ។
សាក្សីដ៏សំខាន់ម្នាក់ គឺលោក វិទូ ជាម្ចាស់ហាងលក់ទំនិញនៅខាងមុខរោងចក្រ បាននិយាយថា នៅកណ្តាលអធ្រាត្រ លោកបានឮឈ្មោះ ឡាច មកគោះទ្វារដើម្បីទិញស្រា តែលោកមិនបានបើកលក់អោយនោះទេ ហើយគេក៏បានជិះម៉ូតូចូលទៅក្នុងរោងចក្របាត់ទៅ ដែលទំនងជាទៅរកប្រពន្ធរបស់គេវិញ ព្រោះពួកគេទាំង២នាក់ ជាពលករខ្មែរនិងជាប្តី ប្រពន្ធ ព្រមទាំងបានលែងលះគ្នាជាយូរមកហើយ ដោយសារតែបុរសជាប្តីនេះតែងតែវាយធ្វើបាបប្រពន្ធជាញឹកញាប់ ក្រោយពីបានផឹកស៊ីស្រវឹងម្តងៗ។
ចំណែកសាក្សីដែលនៅជាប់នឹងបន្ទប់ នាងម៉ៃ ( បន្ទប់កើតហេតុ ) បានអោយដឹងថា នៅយប់នោះ គេក៏បានដឹងដែរថា បុរសដែលជាអតីត ប្តី បានជិះម៉ូតូមករកភរិយាវិញដល់ក្នុងបន្ទប់ ដោយគេមិនបានចាប់អារម្មណ៍ថា អាចនឹងមានរឿងអ្វីកើតឡើងនោះឡើយ ដោយសារតែយប់ជ្រៅពេក លុះព្រឹកឡើងក៏មានការភ្ញាក់ផ្អើល ដោយពួកគេបើកបន្ទប់ចេញមក ឃើញបុរសជាប្តីដេកស្លាប់នៅខាងមុខបន្ទប់ រីឯប្រពន្ធ និងកូនតូចៗ បានចេញបាត់ពីបន្ទប់ស្ងាត់អស់ទៅហើយ។
សមត្ថកិច្ចបានចុះត្រួតពិនិត្យគឺបានសង្កេតឃើញថា សពមានស្លាកស្នាមចាក់នឹងកាំបិតចំលើដើមទ្រូង មួយកាំបិត ប្រវែង ប្រមាណ ៥ សង្ទីម៉ែត្រ ដោយមានឈាមហូរពេញដី និងមានកាំបិតចុងស្រួច ដែលប្រឡាក់ដោយឈាម បន្សល់ទុកនៅក្នុងបន្ទប់ផងដែរ ហើយសមត្ថកិច្ចបានសន្និដ្ឋានថា ឃាតករអាចជាភរិយា ហើយនាងមិនអាចគេចទៅណាឆ្ងាយទេ ព្រោះមិនមានស្គាល់អ្នកណាឡើយ ឬក៏អាចវិលត្រឡប់ទៅប្រទេសកម្ពុជាវិញ ដោយសមត្ថកិច្ចបានទាក់ទងទៅតាមបណ្តាច្រកនានា អស់ហើយដើម្បីធ្វើការឃាត់ខ្លួនស្ត្រីដែលជាឃាតកររូបនេះ យកមកផ្តន្ទាទោសតាមផ្លូវច្បាប់៕
Source: Kampuchea Thmey Daily
0 Comments