ខេមរៈ សិរីមន្ត បោះទុនជាង១០លានដុល្លារជាមួយ ឡេង ណាវ៉ាត្រា លើជំនួញអចលនទ្រព្យ

ភ្នំពេញ ៖ បន្ទាប់ពីកំពូលតារាចម្រៀងល្បីឈ្មោះប្រចាំផលិតកម្មហង្សមាសលោកព្រាប សុវត្ថិ និងឧកញ៉ាវ័យក្មេងលោក ឡេង ណាវ៉ាតត្រា បានដាក់ទុនរួមគ្នារហូតដល់៥លានដុល្លារធ្វើជំនួញអចលនទ្រព្យលើទំហំដីជាង១៣ហិកតារនៅតាមបណ្តោយផ្លូវជាតិលេខ៣កាលពីថ្មីៗនោះ ស្រាប់តែនាព្រឹកថ្ងៃទី៦ ខែសីហាឆ្នាំ២០១៨ ក៏លេចវត្តមានលោក ខេមរៈ សិរីមន្ត ប្រកាសបោះទុនលើជំនួញដីធ្លីជាមួយលោក ឡេង ណាវ៉ាត់ត្រាដូចគ្នាផងដែរ ដោយចាយទុនរបស់លោកគឺមានទំហំរហូតដល់ជាង១០លានដុល្លារឯណោះ។

កាន់តែពិសេសជាងនេះទៅទៀតនោះ លោកក៏បានប្រកាសផ្ដល់កាដូជូនអតិថិជនដែលទិញដីក្នុងមួយឡូត៍គឺនូវសំបុត្រដំណើរកម្សាន្តទៅលេងនៅប្រទេសសិង្ហបុរី២យប់៣ថ្ងៃដោយក្រុមហ៊ុនចំណាយលើការស្នាក់នៅនិងធ្វើដំណើររួមទាំងអាហារទាំងអស់។ លោក ខេមរៈ សិរីមន្តបានបញ្ជាក់នៅក្នុងសន្និសីទកាសែតនោះថា កត្តាដែលធ្វើឲ្យលោកសម្រេចចិត្តបោះទុនហ៊ុនជាមួយលោកឧកញ៉ា ឡេង ណាវ៉ាត្រា ម្ចាស់បុរី និងជាម្ចាស់អចលនទ្រព្យវ័យក្មេង ដោយសារតែលោកចាប់ផ្ដើមចង់ធ្វើជំនួញដីធ្លីនិងដោយសារថា លោកក៏មានដើមទុនគ្រប់គ្រាន់ក្នុងគម្រោងវិនិយោគមួយនេះ ដែលលោកយល់ថាគួរដល់ពេលហើយ ដែលលោកត្រូវងាកមកធ្វើជំនួញបន្ថែមលើអាជីពសិល្បៈ។

តារាចម្រៀងម្ចាស់បទ ស្ទឹងត្រែងបងអើយ លោក ខេមរៈ សិរីមន្ត បានបន្តថា អំឡុងពេលមុនចាប់ដៃគូជាមួយលោក ឡេង ណាវ៉ាត្រា ខ្លួនលោកផ្ទាល់ក៏មានជំនួញដីជាលក្ខណៈឯកជនតូចៗផងដែរ ហើយដោយសារតែលោកយល់ថាខ្លួនមានដើមទុនសមល្មមនឹងធ្វើការវិនិយោគលើគម្រោងនេះហើយ ទើបលោកសិក្សាស្វែងរកដៃគូ ហើយលទ្ធផលចុងក្រោយក៏បានចាប់ដៃជាមួយលោកឡេង ណាវ៉ាត្រា ដែលលោកបញ្ជាក់ថា គឺជាអ្នកជំនួញដីធ្លីវ័យក្មេងជោគជ័យម្នាក់។

តារាប្រុសរូបនេះនិយាយទៀតថា មុនបើកគម្រោងរួមគ្នាដែលមានតម្លៃជាង១០លានដុល្លារនៅឃុំព្រះនិព្វាន ស្រុកគងពិសី ខេត្តកំពង់ស្ពឺ ជិតផ្សារព្រៃទទឹងលើផ្លូវជាងលេខ៣ចម្ងាយពីរង្វង់មូលចោមចៅ១១គីឡូ ដើម្បីពុះជាឡូត៍នោះ លោកនិងលោក ឡេង ណាវ៉ាត្រា បានប្រើពេលក្នុងការស្វែងរកដីយ៉ាងលំបាកយ៉ាងខ្លាំង អញ្ចឹងហើយទើបលោកមានជំនឿយ៉ាងខ្លាំងថាដីឡូត៍ដែលពួកលោកដាក់ហ៊ុនរួមគ្នា ពិតជាមានការចាប់អារម្មណ៍ខ្ពស់ពីសំណាក់អតិថិជនដោយសារតែទីតាំងគឺទិញភ្លាមអាចសង់ផ្ទះនៅបាន ហើយបើនិយាយពីប្រព័ន្ធទឹកភ្លើងក៏បានដំឡើងអោយមានភាពងាយស្រួលដល់ការរស់នៅ។
លោក ខេមរៈ សិរីមន្ត បញ្ជាក់ថា ចំពោះដីឡូត៍ដែលលោកសម្រេចចិត្តបោះទុនជាមួយលោកឡេង ណាវ៉ាត្រា ជាលើកដំបូងនេះ លោកនឹងកំណត់ក្នុងតម្លៃចាប់ពី៥៨០០ដុល្លារឡើងទៅដោយអតិថិជនដែលទិញភ្លាមៗគឺបានសំបុត្រទៅលេងនិងស្នាក់នៅ២យប់នៅក្នុងប្រទេសសិង្ហបុរីតែម្ដង ក្នុងរយៈពេល១៥ថ្ងៃក្រោយការប្រកាស។

ជាមួយគ្នានេះដែរ លោកឧកញ៉ាវ័យក្មេង ឡេង ណាវ៉ាត្រា ក៏បានលើកឡើងថា ការចាប់ដៃគូជាមួយលោក ខេមរៈ សិរីមន្ត គឺមិនមានបញ្ហាជាមួយលោក ព្រាប សុវត្ថិ នោះទេ ដោយសារតែការវិនិយោគទាំង២ស្ថិតក្នុងគម្រោងផ្សេងគ្នា។

លោកថា គម្រោងបោះទុនរួមគ្នានេះ មិនមែនដោយសារតែលោកខ្វះដើមទុនក្នុងគម្រោងដីឡូត៍នៅផ្សារព្រៃទទឹងផ្លូវជាតិលេខ៣នោះទេ ប៉ុន្តែបណ្ដាលមកពីលោក ខេមរៈ សិរីមន្ត ក៏ជាតារាល្បីមួយរូប និងដោយសារតែលោកក៏មានឆន្ទៈក្នុងការធ្វើជំនួញផង ទើបលោកចូលហ៊ុន ដើម្បីអោយការធ្វើជំនួញដីឡូត៍របស់លោក នឹងកាន់តែមានទំនុកចិត្ត៕