ពានរង្វាន់​លី​គ​ហ្វូ​ត​សាល​ជើងឯក​ឆ្នាំ​២០១៨ ប្រកួត​វគ្គ​ពាក់កណ្ដាល​ផ្តាច់ព្រ័ត្រ នៅ​ល្ងាច​ថ្ងៃ​សៅរ៍ នេះ

ពានរង្វាន់​បាល់ទាត់​លី​គ​ហ្វូ​ត​សាល​ឆ្នាំ​២០១៨ (National Futsal League 2018) ដែល​រៀបចំ​ដោយ​សហព័ន្ធ​កីឡាបាល់ទាត់​កម្ពុជា ត្រូវ​បន្ត​ប្រកួត​វគ្គ​ពាក់កណ្ដាល​ផ្តាច់ព្រ័ត្រ នៅ​ល្ងាច​ថ្ងៃ​សៅរ៍ ទី​១១ ខែសីហា ឆ្នាំ​២០១៨ នេះ​លើ​ទីលាន ដឹ​ប្លូ​ស្ព័ត (The Blue Sport) ម្តុំ​ទួលគោក ក្រោយ​បញ្ចប់​វគ្គ​សន្សំ​ពិន្ទុ​ចំនួន​១៨​សប្ដាហ៍​មក​។

តាម​ការបែងចែក​គូប្រកួត​នៅ​វគ្គ​៤​ក្រុម​ចុងក្រោយ តម្រូវ​ឲ្យ​ក្រុម​លេខ​២​ប៉ះ​ក្រុម​លេខ​៣ និង​ក្រុម​លេខ​១​ប៉ះ​ក្រុម​លេខ​៤ ដើម្បី​ឡើង​ទៅ​លេង​វគ្គ​ផ្តាច់ព្រ័ត្រ​ប្រជែង​យក​ជើងឯក​ប្រចាំ​រដូវ​កាល​។ ដូច្នេះ​វគ្គ​ខ្វែង​នេះ​ក្រុម​ស​.​ស​.​យ​.​ក កំចាយមារ ប៉ះ​ក្រុម Home Sport FC នៅ​ម៉ោង​៤​ល្ងាច​និង​ក្រុម Down Town Sport FC ប៉ះ​ក្រុម​ឱ​ម៉ា​ល់ នៅ​ម៉ោង​៦​ល្ងាច​។ ក្រុម​ចាញ់​ត្រូវ​ប៉ះគ្នា​ក្នុង​វគ្គ​ចំណាត់ថ្នាក់​លេខ​៣​និង​ក្រុម​ឈ្នះ​បន្ត​ប៉ះគ្នា​ក្នុង​វគ្គ​ផ្តាច់ព្រ័ត្រ​ដែរ​ធ្វើឡើង​នៅ​ថ្ងៃទី​១៨​ខែសីហា ឆ្នាំ​២០១៨ ខាងមុខ។



ងាក​មក​មើល​តារាង​ចំណាត់​ប្រចាំ​រដូវ​កាល​ក្រោយ​វគ្គ​សន្សំ​ពិន្ទុ​វិញ​ឃើញថា​ក្រុម Down Town Sport FC​ឈរ​លេខ​១ មាន​៤២​ពិន្ទុ តាម​ពីក្រោយ​ដោយ​ក្រុម ស​.​ស​.​យ​.​ក កំចាយមារ ឈរ​លេខ​២ មាន​៣៩​ពិន្ទុ ក្រុម Home Sport FC​ឈរ​លេខ​៣ មាន​៣៧​ពិន្ទុ ក្រុម​លេខ​៤ ឱ​ម៉ា​ល់ មាន​៣៦​ពិន្ទុ​។ ក្រុម​លេខ​៥ Fan Sport FC មាន​២៣​ពិន្ទុ ហើយ​ក្រុម​លេខ​៦ អាណាចក្រ​បៃតង មាន​២២​ពិន្ទុ​។ លេខ​៧ Panda FC មាន​២០​ពិន្ទុ ហើយ​លេខ​៨ ក្រុមយុវជន​៧​មករា មាន​មាន​២០​ពិន្ទុ​ដូចគ្នា តែ​ខុស​ត្រង់​គ្រាប់​បាល់​ចំណេញ ហើយ​ក្រុម​ឆន្ទៈ​កីឡា លេខ​៩ មាន​១៥​ពិន្ទុ និង​ក្រុម​B.A United លេខ​១០ មាន​៥​ពិន្ទុ​។



សូម​រំលឹក​ថា ​ការប្រកួត​លី​គ​ហ្វូ​ត​សាល​ជា​លើកដំបូង​នៅក្នុង​ស្រុក​នេះ​ធ្វើឡើង​ពីថ្ងៃ​ទី​០៣ ខែ មីនា រហូតដល់​ថ្ងៃទី​២៨ ខែ កក្កដា ឆ្នាំ ២០១៨ ខណៈ​ភាគច្រើន​ប្រកួត​នៅ​ថ្ងៃ​ចុង​សប្ដាហ៍ ដែល​មាន​ក្រុម​ជា​សមាជិក​ចំនួន​១០​ក្រុម​លើ​ទីលាន ដឹ​ប្លូ​ស្ព័ត (The Blue Sport) ម្តុំ​ទួលគោក​។ ការប្រកួត​មាន​រូបមន្ត​ជា​លក្ខណៈ​ប្រកួត​បែប​លី​គ តាម​ប្រព័ន្ធ​លី​គ​២​ជុំ (​វិលជុំ​សន្សំ​ពិន្ទុ​) ហើយ​ក្រុម​ដែលមាន​ពិន្ទុ​ច្រើនជាងគេ​ចំនួន​៤​ក្រុម (Top4) ត្រូវ​ឡើងទៅ​ប្រកួត​គ្នា​ដណ្តើម​ជើងឯក​ប្រចាំ​រដូវ​កាល​។ ក្រុម​ជើងឯក​នឹង​ទទួល​បាន​ពាន​រង្វាន់​១ មេដាយមាស​ម្នាក់​១​ និងប្រាក់​រង្វាន់​២០លាន​រៀល​ផងដែរ​៕

  

Source: Kampuchea Thmey Daily