ប្រជាពលរដ្ឋនៅសង្កាត់សាមគ្គីក្រុងស្ទឹងត្រែង ១៧៣គ្រួសារ ទទួលស្បៀងពីសហភាពសហព័ន្ធយុវជនកម្ពុជា

ស្ទឹងត្រែង ៖ បងប្អូនប្រជាពលរដ្ឋ១៧៣គ្រួសារនៅសង្កាត់សាមគ្គី ក្រុងស្ទឹងត្រែង រងផលប៉ះពាល់ពីទឹកជំនន់ទន្លេមេគង្គ បង្កអោយលិចផ្ទះសម្បែងផលដំណាំព្រមទាំងទ្រព្យសម្បត្តិ និងសត្វពាហនៈបានជម្លៀសទៅកាន់ទីទួលសុវត្ថិភាព, នៅរសៀលថ្ងៃទី០៧ ខែសីហា ឆ្នាំ២០១៨នេះ បានទទួលស្បៀងជាអង្ករ មី ទឹកត្រី ទឹកស៊ីអ៊ីវ ទឹកក្រូច និងថ្នាំពេទ្យមួយចំនួនផងដែរ។

លោកហ៊ុន ម៉ានី ប្រធានសហភាពសហព័ន្ធយុវជនកម្ពុជាមានប្រសាសន៍ថា ៖ នៅក្នុងស្ថានភាពទឹកជំនន់នេះ សម្តេចអគ្គមហាសេនាបតីតេជោហ៊ុនសែន ប្រមុខរាជរដ្ឋាភិបាលកម្ពុជា និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ប្រធានកាកបាទក្រហមកម្ពុជា តែងបាននឹករលឹកសួរសុខទុក្ខមកបងប្អូនប្រជាពលរដ្ឋយើងទាំងអស់គ្នា ទោះបីរងផលប៉ះពាល់ក្តី មិនរងផលប៉ះពាល់ក្តី។

លោកហ៊ុន ម៉ានី បានពាំនាំនូវសេចក្តីនឹករឭកនេះ មកជូនបងប្អូន ពីការយកចិត្តទុកដាក់ខ្ពស់ ចំពោះសុខទុក្ខរបស់ប្រជាពលរដ្ឋ ពីសំណាក់សម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែនប្រធាន កាកបាទក្រហមកម្ពុជា។ ជាមួយគ្នានេះលោកប្រធានសហភាពសហព័ន្ធយុវជនកម្ពុជា បានផ្ដាំផ្ញើដល់បងប្អូនប្រជាពលរដ្ឋ ត្រូវមើលថែកូនចៅហាមចុះលេងទឹក និង រក្សាសុខភាពឲ្យបានល្អ អនុវត្តតាមការណែនាំរបស់គ្រូពេទ្យ ដោយហូបស្អាត- ផឹកស្អាត- រស់នៅស្អាត។

លោកហ៊ុន ម៉ានី មានប្រសាសន៍បន្ថែមថា ៖ សំខាន់ជាងនេះទៀត បងប្អូនប្រជាពលរដ្ឋយើងទាំងអស់ នៅពេលទឹកស្រកទៅវិញ បើមានបញ្ហាប្រឈមណាមួយដូចជាមានជំងឺឈឺថ្កាត់ ត្រូវការពូជដំណាំ ត្រូវរាយការណ៍មកអាជ្ញាធរ ដែលនៅជិតដើម្បីយើងជួយគ្នាកុំឱ្យកើតគ្រោះថ្នាក់ក្នុងរដូវទឹកនេះ ហើយនាំគ្នាស្តារឡើងវិញនៅដំណាំដាំដុះដើម្បីជីវភាពរស់នៅ។

ក្នុងឱកាសផ្តល់ស្បៀងនេះ លោកស្រីយឿង ភារីអភិបាលរងក្រុងស្ទឹងត្រែងមានបានបញ្ជាក់ថា ៖ប្រជាពលរដ្ឋទាំង១៧៣គ្រួសារ មកនៅក្នុងក្រុងស្ទឹងត្រែងនេះ ពួកគាត់រងផលប៉ះពាល់ពីទឹកជំនន់មេគង្គគ្រួសារនីមួយៗមានជីវភាពលំបាក ហើយអំណោយនេះបានជួយដែលរំលឺកទុក្ខលំបាកបានទាន់ពេលវេលាក្នុងគ្រាដែលពួកគាត់កំពុងរស់នៅទីទួលសុវត្ថិភាពនោះ។

សូមបញ្ជាក់ថា ៖ ប្រជាពលរដ្ឋ១៧៣ គ្រួសារទទួលបានគ្រួសារ រួមមានៈ អង្ករ ២៥ គ.ក្រ- មី ១ កេសតូច- ត្រីខ ១០ កំប៉ុងទឹកក្រូចមួយកេះ -ទឹកត្រី ១យួរ- ទឹកស៊ីអ៊ីវ ១យួរ និងថ្នាំពេទ្យមួយកញ្ចប់៕