បន្ទាយមានជ័យ ៖ កម្លាំងនគរបាលខេត្តបន្ទាយមានជ័យជាង៤០០នាក់ ដឹកនាំ ដោយលោកឧត្តមសេនីយ៍ទោ អាត់ ខែម បានចូលរួមច្រូតស្រូវជូនប្រជាកសិករ ដែលរងគ្រោះដោយទឹកជំនន់ជាង២,០០០ហិកតានៅឃុំរហាត់ទឹក ស្រុកមង្គលបូរីពេញមួយព្រឹកថ្ងៃទី០៧ ខែសីហាឆ្នាំ២០១៨។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានប្រាប់ថា ៖ក្រោយពេលទទួលព័ត៌មានពីការលំបាករបស់ប្រជាកសិករឃុំរហាត់ទឹក ដែលរងគ្រោះដោយស្រូវស្រាលប្រភេទស្រូវសែនក្រអូបលិចទឹកជាង២,០០០ហិកតា និងដោយមានការណែនាំពីឯកឧត្តមឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់ជាតិចុះជួយខេត្តបន្ទាយមានជ័យលោកបានដឹកនាំកម្លាំងនគរបាលខេត្ត.ស្រុក.ក្រុង និងកម្លាំងនគរបាលការពារព្រំដែនគោកព្រមទាំងការិយាល័យជំនាញចុះអន្តរាគមន៍ជួយច្រូតកាត់ និងប្រមូលផលជូនពួកគាត់ដោយចែកចេញជា៦ក្រុមជួយអន្តរាគមន៍ជួយប្រមូលផលច្រូតកាត់ស្រូវស្រាល ដែលលិចទឹកគឺច្រូតហើយដាក់ថង់វែងអូសមកដាក់តាមទីទួល ឬមាត់ប្រឡាយរួចបន្តដាក់គោយន្តជូនប្រជាកសិករដឹកទៅផ្ទះដើម្បីធ្វើការបោកបែន។
លោកបានបញ្ជាក់ថា ៖ កម្លាំងនគរបាលខេត្តបន្ទាយមានជ័យ ក្រៅពីការងារការពារសន្តិសុខនិងសណ្តាប់ធ្នាប់ជូនប្រជាពលរដ្ឋនិងសង្គម បានជួយអន្តរាគមន៍ជួយប្រជាពលរដ្ឋ ដែលរងគ្រោះដោយធម្មជាតិមាន គ្រោះទឹកជំនន់ និងខ្យល់កន្ត្រាក់ គ្រោះរាំងស្ងួត និងកសាងផ្ទះជូនប្រជាពលរដ្ឋក្នុងខេត្តបន្ទាយមានជ័យ។
ប្រជាកសិករបានថ្លែងអំណរគុណចំពោះលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងស្នងការរងនគរបាលខេត្ត និងកងកម្លាំងទាំងអស់ ដែលបានជួយប្រមូលផលស្រូវរបស់ពួកគាត់៕
Source: Kampuchea Thmey Daily
0 Comments