ក្រុមហ៊ុន Mattress Inc ដែលជាក្រុមហ៊ុនលក់ដុំពូកធំបំផុតនៅសហរដ្ឋអាមេរិកកំពុងពិចារណាដាក់ពាក្យសុំឲ្យប្រកាសក្ស័យធន ខណៈពេលខ្លួនកំពុងស្វែងរកមធ្យោបាយដើម្បីគេចចេញពីការជួលហាងដែលមានតម្លៃថ្លៃ និងបិទទីតាំងមួយចំនួនក្នុងចំណោមទីតាំងចំនួន៣,០០០កន្លែងរបស់ខ្លួនដែលកំពុងខាតបង់ប្រាក់។ នេះបើតាមការឲ្យដឹងពីប្រភពមួយដែលជិតស្និទ្ធិនឹងបញ្ហានេះ។
សំណើរបស់ក្រុមហ៊ុន Mattress Firm គឺជាឧទាហរណ៍ចុងក្រោយបំផុតនៃអ្នកលក់រាយដែលកំពុងប្រឈមនឹងបញ្ហាហិរញ្ញវត្ថុក្នុងគ្រាមានការប្រកួតប្រជែងពីក្រុមហ៊ុនពាណិជ្ជកម្មអេឡិចត្រូនិកដូចជា Amazon.com Inc (AMZN.O) ជាដើម។ ភាគហ៊ុនរបស់ក្រុមហ៊ុន Tempur Sealy International Inc (TPX.N) ដែលជាអ្នកប្រកួតប្រជែងរបស់ Mattress Firm បានកើនឡើង៥,២ភាគរយស្មើនឹង៥២.៦៤ដុល្លារ។
ក្រុមហ៊ុន Steinhoff International Holdings NV (SNHJ.J) ដែលជាដៃគូនៅអាហ្វ្រិកខាងត្បូងរបស់ Mattress Firm កំពុងធ្វើកិច្ចព្រមព្រៀងមួយដើម្បីរៀបចំរចនាសម្ព័ន្ធបំណុលរបស់ក្រុមហ៊ុនបុត្រសម្ព័ន្ធមួយចំនួនជាមួយម្ចាស់បំណុលរបស់ខ្លួនបន្ទាប់ពីមានរឿងអាស្រូវគណនេយ្យ។ ម្ចាស់បំណុលបានឯកភាពកាលពីខែមុនក្នុងការផ្អាកបំណុលរយៈពេលបីឆ្នាំ។
Steinhoff បានទិញហ៊ុនរបស់ Mattress Firm ក្នុងតម្លៃ៣.៨ពាន់លានដុល្លារនៅឆ្នាំ២០១៦។
ប្រភពចំនួនពីរបាននិយាយនៅសប្តាហ៍នេះថា ទាំងក្រុមហ៊ុន Mattress Firm និងក្រុមហ៊ុន Steinhoff ដែលមានទីស្នាក់ការធំនៅទីក្រុង Houston គឺកំពុងធ្វើការជាមួយក្រុមហ៊ុនពិគ្រោះយោបល់ AlixPartners LLP ។ ក្រុមហ៊ុន AlixPartners បានជួយក្រុមហ៊ុននានារៀបចំផែនការនិងអនុវត្តយុទ្ធសាស្ត្របង្វិលនិងជាញឹកញាប់បានផ្តល់មូលដ្ឋានគ្រិះសម្រាប់ការក្ស័យធន។
ប្រភពដែលសុំមិនបញ្ចេញឈ្មោះដោយសារតែផែនការនេះគឺជាលក្ខណៈឯកជនបានព្រមានថា ក្រុមហ៊ុន Mattress Firm មិនបានធ្វើសេចក្តីសម្រេចចុងក្រោយទេហើយផែនការរបស់ខ្លួនអាចផ្លាស់ប្តូរ។
តំណាងរបស់ក្រុមហ៊ុន Mattress Firm និង AlixPartners បានបដិសេធធ្វើអត្ថាធិប្បាយ។ Steinhoff ក៏មិនបានឆ្លើយតបនឹងសំណើសុំការបំភ្លឺផងដែរ៕ REUTERS
Source: Kampuchea Thmey Daily
0 Comments