ភ្នំពេញ ៖ ប៉ូលិសនិយាយថា បក្ខពួកក្រុមចោរគាស់ផ្ទះលួចទ្រព្យសម្បត្តិប្រជាជនត្រូវបានចាប់ខ្លួនម្នាក់ ឯម្នាក់ទៀតរត់គេចខ្លួនដោយលួចយកម៉ូតូរបស់ជនរងគ្រោះទៅបាត់អស់ចំនួន២គ្រឿងផងដែរ កាលពីវេលាម៉ោង៥ព្រឹកថ្ងៃទី២៣ ខែសីហា ឆ្នាំ ២០១៨ នៅភូមិពោងពាយ សង្កាត់ភ្នំពេញថ្មី ខណ្ឌសែនសុខ។
បក្ខពួកចោរគាស់ផ្ទះ ដែលចាប់ខ្លួនបានម្នាក់ខាងលើ ឈ្មោះ ម៉ៃ ហេងវឌ្ឍនា ហៅគុជ ភេទប្រុស អាយុ៣២ឆ្នាំ មានទីលំនៅភូមិរោងចក្រ សង្កាត់គោកឃ្លាង ខណ្ឌសែនសុខ មុខរបរមិនច្បាស់លាស់។
តាមចម្លើយសារភាពរបស់ជនជាប់ចោទខាងលើ បានបញ្ជាក់ថា ខ្លួនមានបក្ខពួកចំនួន២នាក់ឈ្មោះកាក់ និងឈ្មោះចិន ដែលបានរត់គេចគេចខ្លួន និង លួចយកម៉ូតូទៅបានចំនួន២គ្រឿង។
ជនរងគ្រោះ ជាម្ចាស់ម៉ូតូខាងលើ ១.ឈ្មោះ មុត មាស ភេទប្រុស អាយុ២៥ឆ្នាំ ជានិស្សិតរៀនភាសាជប៉ុន។ ២.ឈ្មោះ ឆោម ឆរ៉ា ភេទប្រុសអាយុ៣២ឆ្នាំ ជានិស្សិតរៀនភាសាជប៉ុនឆ្នាំទី២។ ៣.ឈ្មោះ ម៉ី ធី ភេទប្រុស អាយុ២៨ឆ្នាំ ជានិស្សិតរៀនភាសាជប៉ុន។ ៤. ឈ្មោះ ផាវ ស៊ីសុធារី ភេទស្រី អាយុ៣២ឆ្នាំ មុខរបរលក់ដូរ។
ប៉ូលិសបាននិយាយថា នៅមុនពេលកើតហេតុ ជនរងគ្រោះជានិស្សិតទាំង៤នាក់ខាងលើមានម៉ូតូម្នាក់១គ្រឿងៗបានមកជួលផ្ទះគេស្នាក់នៅរៀនសូត្រ ដោយដាក់ម៉ូតូនៅខាងក្រោមផ្ទះជាន់ផ្ទាល់ដីហើយនាំគ្នាទៅដេកលើផ្ទះ ដោយជាន់ក្រោមម្ចាស់ផ្ទះជាអ្នកមើលការខុសត្រូវ និងបានបិទទ្វារជាប្រចាំ។ នៅថ្ងៃកើតហេតុជនសង្ស័យជាចោរមានគ្នា៣នាក់បាននាំគ្នាយកឈើជ្រុងមកគាស់ទ្វារផ្ទះខាងលើរួចអូសយកម៉ូតូរបស់ជនរងគ្រោះទាំង៤គ្រឿងចេញមកក្រៅផ្ទះ ដោយឈ្មោះ កាក់ និងឈ្មោញចិន ជាអ្នកលួចជញ្ជូនយកបានម៉ូតូចំនួន២គ្រឿងទៅលាក់ទុកមុននៅសល់២គ្រឿងបក្ខពួកមិនទាន់មកយក ពេលនោះសមត្ថកិច្ចមូលដ្ឋានមកទាន់មានការសង្ស័យក៏សួរនាំ ទើបដឹងថាចោរក៏ចាប់ខ្លួនតែម្តង យកមកសួរនាំ៕
Source: Kampuchea Thmey Daily
0 Comments