ភ្នំពេញ ៖ មន្ត្រីជាន់ខ្ពស់ក្រសួងសុខាភិបាលបានឲ្យដឹងថា ក្រសួងសុខាភិបាលគ្រោងនឹងអនុវត្តប្រព័ន្ធព័ត៌មានវិទ្យាទំនើបដើម្បីគ្រប់គ្រងទិន្នន័យរបស់អ្នកជំងឺនៅតាមមណ្ឌលសុខភាពសំដៅឈានឆ្ពោះទៅសម្រេចបាននូវការព្យាបាលអ្នកជំងឺប្រកបដោយប្រសិទ្ធភាពខ្ពស់។
លោកស្រីវេជ្ជបណ្ឌិតឱ វណ្ណឌីន អគ្គនាយកបច្ចេកទេសសុខាភិបាលបានមានប្រសាសន៍កាលពីថ្ងៃទី២៣ ខែសីហា ឆ្នាំ២០១៨ ថា ក្រសួងសុខាភិបាល គ្រោងនឹងអនុវត្តប្រព័ន្ធព័ត៌មានវិទ្យាដោយប្រើប្រាស់កុំព្យូទ័រសម្រាប់កត់ត្រាព័ត៌មានអ្នកជំងឺនិងឯកសាររដ្ឋបាលផ្សេងៗនៅតាមមណ្ឌលសុខភាពខណៈបច្ចុប្បន្ននេះការកត់ត្រាទិន្នន័យអ្នកជំងឺនិងឯកសារផ្សេងៗគឺសរសេរដោយដៃប៉ុណ្ណោះ។
លោកស្រីវេជ្ជបណ្ឌិត ឱ វណ្ណឌីនបានបន្តថា «ការកត់ត្រាតាមរយៈប្រព័ន្ធកុំព្យូទ័រនេះពិតជាមានសារៈសំខាន់ណាស់ក្នុងការពង្រឹងការគ្រប់គ្រ ងនិងរក្សាទិន្នន័យអ្នកជំងឺបានត្រឹមត្រូវនិងសុក្រឹតព្រោះថា ប្រព័ន្ធនេះអាចជួយឲ្យគ្រូពេទ្យដឹងពីប្រវត្តិអ្នកជំងឺនិងកំណត់រោគវិនិច្ឆ័យជំងឺបានច្បាស់លាស់ ដើម្បីឲ្យការព្យាបាលមានប្រសិទ្ធភាពខ្ពស់»។
ជាមួយគ្នានេះដែរ លោកស្រីវេជ្ជបណ្ឌិតបានបន្ថែមថា ប្រព័ន្ធនេះក៏នឹងជួយធ្វើឲ្យបុគ្គលិកនៅតាមមណ្ឌលសុខភាពនីមួយៗងាយស្រួលផងដែរក្នុងការបញ្ជូនស្ថិតិអ្នកជំងឺនិងរបាយការណ៍ផ្សេងៗតាមរយៈអនឡាញពីមណ្ឌលសុខភាពទៅកាន់ស្រុកប្រតិបត្តិបានលឿននិងឆាប់រហ័ស ផ្ទុយពីការកត់ត្រាដោយដៃដែលបុគ្គលិកត្រូវចំណាយពេលវេលាយូរក្នុងការសរសេរបាយការណ៍ហើយត្រូវមានបុគ្គលិកសម្រាប់បញ្ជូនឯកសារទាំងនោះទៀតផង។
លោកស្រីវេជ្ជបណ្ឌិតបានឲ្យដឹងទៀតថា គម្រោងប្រើប្រាស់ប្រព័ន្ធបច្ចេកវិទ្យានេះក្រសួងសុខាភិបាលនឹងធ្វើការសហការជាមួយអង្គការសុខភាពពិភពលោកដើម្បីអនុវត្តសាកល្បងដោយជ្រើសរើសមណ្ឌលសុខភាពនៅខេត្តចំនួន៣ គឺខេត្តកំពង់ធំ ខេត្តកំពត និងខេត្តកំពង់ស្ពឺ។
លោក វេជ្ជបណ្ឌិត សាម សុផាន់ ប្រធានអង្គការគណៈកម្មាធិការសុខភាពកម្ពុជាបានថ្លែងឲ្យដឹងថា តាមរយៈគម្រោងអនុវត្តប្រព័ន្ធបច្ចេកវិទ្យានេះនឹងជួយជំរុញឲ្យការងារផ្តល់សេវាជួនដល់អ្នកជំងឺនៅតាមមូលដ្ឋានកាន់តែល្អប្រសើរថែមទៀត។
យ៉ាងណាក៏ដោយលោកវេជ្ជបណ្ឌិតបានស្នើដល់ក្រសួងសុខាភិបាលធ្វើយ៉ាងណាខិតខំពង្រីកប្រព័ន្ធបច្ចេកវិទ្យាសម្រាប់កត់ត្រាព័ត៌មានអ្នកជំងឺនិងឯកសាររដ្ឋបាលផ្សេងៗទៀតនេះឲ្យបានគ្របដណ្តប់គ្រប់មណ្ឌលសុខភាពនៅទូទាំងប្រទេស។
គួរបញ្ជាក់ថា តាមរបាយការណ៍របស់ក្រសួងសុខាភិបាលបានឲ្យដឹងថា នៅកម្ពុជាមានមន្ទីរពេទ្យថ្នាក់ជាតិចំនួន៣៣ មន្ទីរពេទ្យបង្អែកចំនួន៧៨ មន្ទីរពេទ្យស្រុកប្រតិបត្តិចំនួន៩៨ មណ្ឌលសុខភាពជិត១ពាន់១រយនិងប៉ុស្តិ៍សុខភាពចំនួន៩៦៕
Source: Kampuchea Thmey Daily
0 Comments