ភ្នំពេញ ៖ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ត្រូវបានព្រះមហាក្សត្រនៃព្រះរាជាណាចក្រកម្ពុជា ព្រះករុណា ព្រះបាទ សម្ដេច ព្រះមរបនាថ នរោត្តម សីហមុនី ត្រាស់បង្គាប់លើកលែងទោស និងបានដោះលែងឲ្យមានសេរីភាពហើយ នៅថ្ងៃទី២៥ ខែសីហា ឆ្នាំ២០១៨ តាមសំណើរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នេះបើយោងតាមព្រះរាជក្រឹត្យ។
លោក អ៊ុំ សំអាន ត្រូវបានសមត្ថកិច្ចចាប់ខ្លួនកាលពីយប់រំលងអធ្រាត្រ ថ្ងៃ១១ ខែមេសា ឆ្នាំ២០១៦ នៅខេត្តសៀមរាប ហើយនៅថ្ងៃទី១០ ខែតុលា ឆ្នាំ២០១៦ ត្រូវបានសាលាដំបូងរាជធានីភ្នំពេញ សម្រេចផ្ដន្ទាទោសដាក់ពន្ធនាគារ២ឆ្នាំ៦ខែ និងពិន័យជាប្រាក់៤លានរៀល ក្រោមការចោទប្រកាន់ពីរបទល្មើស គឺបទញុះញង់ឲ្យប្រព្រឹត្តបទឧក្រិដ្ឋជាអាទិ៍ បង្កភាពវឹកវរធ្ងន់ធ្ងរដល់សន្តិសុខសង្គម និង បទញុះញង់ឲ្យមានការរើសអើង តាមមាត្រា៤៩៥ និង៤៩៦ នៃក្រមព្រហ្មទណ្ឌ ដែលប្រព្រឹត្តនៅចំណុចរាជធានីភ្នំពេញ ព្រះរាជាណាចក្រកម្ពុជា កាលពីអំឡុងឆ្នាំ២០១៥ រហូតដល់ថ្ងៃទី១០ ខែមេសា ឆ្នាំ២០១៦។
តាមព្រះរាជក្រឹត្យ ចុះថ្ងៃទី២៥ ខែសីហា ឆ្នាំ២០១៨ របស់ព្រះមហាក្សត្រ មាត្រា១ បញ្ជាក់ថា ត្រូវបានលើកលែងទោសឲ្យទណ្ឌិតឈ្មោះ អ៊ុំ សំអាន ភេទប្រុស អាយុ៤០ឆ្នាំ ដែលត្រូវបានតុលាការសម្រេចផ្តន្ទាទោសដាក់ពន្ធនាគារ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ (បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម) និងបទញុះញង់ឲ្យមានការរើសអើងតាមអំណាចសាលដីកាលេខ៥៤ ចុះថ្ងៃទី០៩ ខែ០២ ឆ្នាំ២០១៨ របស់តុលាការកំពូល។
ក្រោយពីមានព្រះរាជក្រឹត្យនេះ សាលាដំបូងរាជធានីភ្នំពេញ បានចេញដីកាបង្គាប់ឲ្យប្រធានមណ្ឌលកែប្រែទី១ “ម១” ដោះលែងលោក អ៊ុំ សំអាន ផងដែរ ដែលដីកានោះ បានបញ្ជាក់ថា “តាមអំណាចព្រះរាជក្រឹត្យខាងលើ ឈ្មោះ អ៊ុំ សំអាន កើតថ្ងៃទី២៧ ខែកក្កដា ឆ្នាំ១៩៧៦ ត្រូវបានលើកលែងទោស” គប្បីធ្វើការដោះលែងឲ្យមានសេរីភាពវិញ ប្រសិនបើឈ្មោះនេះ មិនត្រូវបានឃុំខ្លួនពីបទល្មើសផ្សេង។
ភ្លាមៗបន្ទាប់ពីទទួលបានព្រះរាជក្រឹត្យលើកលែងទោសពីព្រះមហាក្សត្រ និងដីកាបង្គាប់ឲ្យដោះលែងឲ្យដោះលែងនោះ លោក អ៊ុំ សំអាន ក៏ត្រូវបានចេញពីពន្ធនាគារផងដែរ នៅរសៀលថ្ងៃដដែលនេះ។
សូមបញ្ជាក់ថា ក្រោយពីការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨នេះ អ្នកជាប់ទោសមួយចំនួនត្រូវបានលើកលែងទោស និងដោះលែងឲ្យមានសេរីភាពឡើងវិញ ក្នុងនោះរួមមាន លោក គឹម សុខ អ្នកភាគនយោបាយ និងសង្គម ត្រូវបានតុលាការដោះលែង កាលពីថ្ងៃទី១៧ ខែសីហា ឆ្នាំ២០១៨ បន្ទាប់ពីអនុវត្តទោសបានគ្រប់ចំនួន១៨ខែ។ សកម្មជនដីធ្លី នៅសហគមន៍បឹងកក់ អ្នកស្រី ទេព វន្នី ត្រូវបានដោះលែងចេញពីពន្ធនាគារ “ម២” កាលពី៩យប់ថ្ងៃទី២០ ខែសីហា ឆ្នាំ២០១៨ បន្ទាប់ពីព្រះមហាក្សត្រ តាមសំណើរបស់សម្តេចតេជោ ហ៊ុន សែន។
អតីតអ្នកយកព័ត៌មានរបស់វិទ្យុអាស៊ីសេរីទាំង២រូប គឺលោក អ៊ួន ឈិន និងលោក យាង សុធារិន ហៅ យាង សុជាមេត្តា ត្រូវបានសាលាដំបូងរាជធានីភ្នំពេញ ចេញដីកាដោះលែងឲ្យនៅក្រៅឃុំជាបណ្ដោះអាសន្ន កាលពីថ្ងៃទី២១ ខែសីហា ឆ្នាំ២០១៨។ លោក សួន សេរីរដ្ឋា អតីតប្រធានគណបក្សអំណាចខ្មែរ ត្រូវបានដោះលែង កាលពីយប់ ថ្ងៃ២៣ ខែសីហា ឆ្នាំ២០១៨ បន្ទាប់ពីសាលាដំបូងរាជធានីភ្នំពេញបានចេញដីកាដោះលែង តាមព្រះរាជក្រឹត្យលើកលែងទោសរបស់ព្រះមហាក្សត្រ។
ទាក់ទងបញ្ហានេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍ នៅក្នុងពិធីជួបសំណេះសំណាលជាមួយ កម្មករ និយោជិត ប្រមាណជិត២ ម៉ឺននាក់ នៅក្នុងខេត្តកណ្តាល កាលពីព្រឹកថ្ងៃទី២៣ ខែសីហា ថា សម្តេចមានបំណងនឹងទូលថ្វាយទៅព្រះមហាក្សត្រ ដើម្បីធ្វើការលើកលែងទោសមនុស្សចំនួន១២នាក់ទៀត ដោយសម្តេចបានចាត់ទុកថា ការស្នើលើកលែងទោសនេះ គឺជាការសណ្តោសប្រណីរបស់សម្តេចមិនមែនជា សម្ពាធបរទេសនៅទេ៕
Source: Kampuchea Thmey Daily
0 Comments