គ្រូ​ព្រះខ័ន​រាជ​ស្វាយរៀង យក​ជំនួប​ជាមួយ​បឹងកេត ដើម្បី​សុំទោស​ដល់​អ្នកគាំទ្រ

​ក្រុមព្រះ​ខ័ន​រាជ​ស្វាយរៀង ត្រូវ​ទទួល​ក្រុម​បឹងកេត លើ​ទីលាន​កីឡដ្ឋាន​ស្វាយរៀង នៅ​ល្ងាច​ថ្ងៃអាទិត្យ ទី​២៦ ខែសីហា ឆ្នាំ​២០១៨ ក្នុង​សប្ដាហ៍​ទី​១៩ នៃ​ពានរង្វាន់​លី​គ​កំពូល​កម្ពុជា (Metfone Cambodian League 2018) ខណៈ​ការប្រកួត​នេះ​មាន​ផ្សាយ​ផ្ទាល់​តាម​ប៉ុស្តិ៍ BTV News ផងដែរ​។

ការប្រកួត​នេះ​ ត្រូវ​បាន​ក្លិប​ព្រះខ័ន​រាជ​ស្វាយរៀង ប្រកាស​ជា​សាធារណៈ​ថា​មិន​លក់​សំបុត្រ​នោះទេ ពោល​គឺ​បើក​ឱ្យ​អ្នកគាំទ្រ​ចូល​ទស្សនា​ដោយ​សេរី​។



លោក​Conor Nestor ដែលជា​គ្រូបង្វឹក​របស់​ក្រុមព្រះ​ខ័ន​រាជ​ស្វាយរៀង បាន​លើក​ឡើង​មុន​ការប្រកួត​មកដល់​ថា «​ថ្ងៃអាទិត្យ​នេះ​គឺជា ឱកាស​ក្នុង​ការ​បង្ហាញ​ទម្រង់​លេង​ដើម្បី​សូមទោស​ដល់​អ្នកគាំទ្រ​។ ខ្ញុំ​ជឿ​ថា ​វា​នឹង​ក្លាយជា​ការប្រកួត​ដ៏​តានតឹង​ពេល​ជួប​ជាមួយ​ក្រុម​បឹងកេត ដែល​ជា​ក្រុម​មួយ​ធ្វើបាន​យ៉ាង​ល្អ​នា​រយៈពេល​៣​ឆ្នាំ​ចុង​ក្រោយនេះ​»​។

គ្រូបង្វឹក​វ័យ​៣៣​ឆ្នាំ​ខាងលើ​បាន​បន្ត​ថា «​យើង​នឹង​ធ្វើ​ព្យាយាម​គ្រប់​វិធី និង​ឈ្នះ​ការប្រកួត ប៉ុន្តែ​ទស្សនៈ​របស់​យើង​គឺ​មិនមែន​បញ្ឈប់​ក្រុម​ដទៃ​ធ្វើ​រឿង​អ្វីមួយ​នោះ​ឡើយ​។ រដូវ​កាល​នេះ​យើង​សោកស្តាយ​យ៉ាង​ខ្លាំង​សម្រាប់​កីឡាករ ប៉ុន្តែ​ថ្ងៃអាទិត្យ​នេះ​មិនមែន​សម្រាប់​រឿង​អតីត គឺ​សម្រាប់​ថ្ងៃ​អនាគត​។ យើង​នឹង​តាម​មើល​ថា ​បើសិន​កីឡាករ​វ័យក្មេង​របស់​យើង​អាច​លេង​នៅ​ស្ថានភាព​បែបនេះ​។ បើសិនជា​ចម្លើយ​«​បាន​»​នោះ​គឺជា​សញ្ញា​ល្អ​សម្រាប់​ថ្ងៃ​អនាគត និង​ត្រលប់​ទៅរក​អ្វីដែល​ក្លិប​បានធ្វើ​»​។



​ក្រុមព្រះ​ខ័ន​រាជ​ស្វាយរៀង ទើបតែ​ផ្លាស់​ប្តូរ​គ្រូបង្វឹក​កាលពីដើម​រដូវ​កាល ដោយ​ចុះកិច្ចសន្យា​១​រដូវ​កាល​ជាមួយ​លោក Conor Nestor កាន់​អាជ្ញាប័ណ្ណ​គ្រូបង្វឹក​កម្រិត UEFA A License ជំនួស​លោក សំ វ៉ាន់​ដេ​ត ដែល​ជា​គ្រូ​ចាស់​គ្រោង​នឹង​បន្ត​រៀន​វគ្គ​គ្រូបង្វឹក AFC “A” License​។ ក្រុម​នេះ​បាន​បញ្ចប់​រដូវ​កាល​ឆ្នាំ​២០១៧ របស់​ខ្លួន​កន្លងទៅ ដោយ​ឈរ​ចំណាត់ថ្នាក់​លេខ​៣ ប្រចាំ​ពានរង្វាន់​លី​គ​កំពូល​កម្ពុជា Metfone Cambodian League 2017 ដែលមាន​សមាជិក​១២​ក្រុម ហើយ​នៅក្នុង​ពានរង្វាន់​សម្តេចតេជោ​ វិញ​បាន​បញ្ចប់​រដូវ​កាល​របស់ខ្លួន​ដោយ​គ្រង​តំណែង​ជើងឯក​តែម្តង៕

 

Source: Kampuchea Thmey Daily