អតីតអគ្គលេខាធិការអង្គការសហប្រជាជាតិលោក Kofi Annan នឹងទទួលបុណ្យសព និងការបញ្ចុះសពថ្នាក់រដ្ឋក្នុងប្រទេសហ្គាណានៅថ្ងៃទី១៣ ខែកញ្ញា។ នេះបើតាមការឲ្យដឹងកាលពីថ្ងៃសុក្រពីប្រធានាធិបតីហ្គាណា ដែលបានហៅវាថាជា “ព្រឹត្តិការណ៍ដ៏ធំមួយសម្រាប់ប្រទេសរបស់យើង”។
ការប្រកាសនេះ ត្រូវបានធ្វើឡើងដោយលោកប្រធានាធិបតី Nana Akufo-Addo បន្ទាប់ពីជំនួបមួយជាមួយគ្រួសាររបស់លោក Annan នៅក្នុងរដ្ឋធានី Accra។
លោក Annan ដែលមានសញ្ជាតិហ្គាណានិងជាម្ចាស់ជ័យលាភីពានរង្វាន់ណូបែលសន្តិភាពបានទទួលមរណភាពកាលពីថ្ងៃសៅរ៍មុននៅអាយុ៨០ឆ្នាំបន្ទាប់ពីមាន “ជំងឺក្នុងរយៈពេលខ្លី”។
លោក Akofo-Addo បាននិយាយថា “លោក Annan គឺជាមនុស្សម្នាក់ក្នុងចំណោមមនុស្សដែលមានទេពកោសល្យបំផុតនៅជំនាន់នេះ។ គាត់ដូចជាបងប្រុសវ័យចំណាស់ម្នាក់”។
លោកបាននិយាយថា “វានឹងក្លាយជាព្រឹត្តិការណ៍ដ៏សំខាន់មួយសម្រាប់ប្រទេសរបស់យើង។ ខ្ញុំរំពឹងថា មេដឹកនាំជាច្រើននឹងមានវត្តមាន”។ លោកបានបន្ថែមថា លោក Annan នឹងត្រូវបញ្ចុះនៅទីបញ្ចុះសពយោធាថ្មីក្នុងទីក្រុង Accra។
កើតនៅ Kumasi ដែលជាទីក្រុងនៃតំបន់ Ashanti របស់ប្រទេសហ្គាណា, លោក Annan បានចំណាយពេលបួនទសវត្សរ៍ធ្វើការងាររបស់គាត់នៅអង្គការសហប្រជាជាតិនិងជាប្រធានដំបូងគេបង្អស់ដែលមកពីអនុតំបន់សាហារ៉ាអាហ្វ្រិក។
គាត់បានទទួលមរណភាពនៅក្នុងប្រទេសស្វីសជាកន្លែងដែលគាត់រស់នៅមិនឆ្ងាយប៉ុន្មានពីទីស្នាក់ការកណ្ដាលរបស់អង្គការសហប្រជាជាតិនៅទីក្រុងហ្សឺណែវ។ ក្រោយមរណភាពនោះ លោក Akufo-Addo បានប្រកាសការកាន់ទុក្ខមួយសប្តាហ៍សម្រាប់ “ជនរួមជាតិដ៏អស្ចារ្យម្នាក់របស់យើង”៕ AFP
Source: Kampuchea Thmey Daily
0 Comments