បាត់ដំបង ៖ យុវជនម្នាក់ ដែលមានវ័យប្រមាណជាង ៣០ ឆ្នាំ និងទំនងជាមនុស្សបែកថ្នាំផងនោះ បានស្ទុះទាញកាំបិតពីផ្ទះប្រជាពលរដ្ឋ យកមកអារ.កសម្លាប់ខ្លួន រហូតឈាមហូរជោកប្រាណ ប៉ុន្តែត្រូវបានប្រជាពលរដ្ឋនាំគ្នាដឹកបញ្ជូនទៅកាន់មន្ទីរពេទ្យដើម្បីសង្គ្រោះ ខណៈដែលយុវជនរូបនេះកំពុងស្ថិតក្នុងដង្ហើមចង្រិត។
ហេតុការណ៍ដ៏រន្ធត់នេះ បានកើតឡើង ថ្ងៃទី ១៨ ខែសីហា ឆ្នាំ២០១៨ វេលាម៉ោង ៨និង ៤៥នាទី យប់ ដោយសារតែមានករណីធ្វើអត្តឃាតមួយបានកើតឡើង នៅចំណុច ភូមិច្រនៀង ឃុំគោកឃ្មុំ ស្រុកថ្មគោល ខេត្តបាត់ដំបង គឺមានជនមិនស្គាល់ អត្តសញ្ញាណម្នាក់ វ័យប្រមាណជាង ៣០ ឆ្នាំ បានប្រើប្រាស់កាំបិតកញ្ចែត អារ ក ខ្លួនបណ្ដាលអោយរយះនិងរងរបួសធ្ងន់។
បើតាមសាក្សីនៅទីនោះបាននិយាយថា នៅមុនពេលកើតហេតុគឺយុវជនខាងលើ បានជិះម៉ូតូមួយគ្រឿង មិនដឹងជាគោលបំណងទៅណាទេ គឺពេលមកដល់ត្រង់ចំណុចខាងលើគេបានផ្តួលម៉ូតូចោល ហើយលោតចេញពីម៉ូតូ រត់ចូលទៅក្នុងភូមិដោយបានឆក់យកកាំបិតពីផ្ទះប្រជាពលរដ្ឋ យកមក អារ កខ្លួនឯង បណ្តាលអោយរងរបួសជាទម្ងន់ និងដួលដេកក្នុងថ្លុកឈាម។
នៅពេលនោះដែរ ប្រជាពលរដ្ឋ រួមនឹងសមត្ថកិច្ច បាននាំគ្នាដឹកបញ្ជូនទៅកាន់មន្ទីរពេទ្យស្រុកថ្មគោល ដើម្បីសង្គ្រោះ ប៉ុន្តែនៅទីនោះ ជនរងគ្រោះដែលគេសង្ស័យថា ជាប្រភេទមនុស្សបែកថ្នាំ បានឆក់យកកន្ត្រៃរបស់គ្រូពេទ្យចាក់លើខ្លួនប្រាណខ្លួនឯងបន្ថែមទៀតបណ្តាលអោយរងរបួសបន្ថែម។
បច្ចុប្បន្ននៅមិនទាន់មានប្រភពណាមួយអះអាងថា គេជាអ្នករស់នៅភូមិណានោះទេ ដោយសារតែសមត្ថកិច្ចសួរនាំស្តាំ គេឆ្លើយទៅឆ្វេង៕
Source: Kampuchea Thmey Daily
0 Comments