ភ្នំពេញ ៖ លោកបណ្ឌិតសភាចារ្យ ហង់ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា កាលពីវេលាម៉ោង៧ព្រឹក ថ្ងៃទី២០ ខែសីហា ឆ្នាំ២០១៨ បានអញ្ជើញចូលរួមកាត់វិញ្ញាសាប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនៅវិទ្យាល័យព្រះស៊ីសុវត្ថិ។
ចូលរួមនៅក្នុងឱកាសនោះដែររួមមានលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោកឃួងស្រេងអភិបាលរាជធានីភ្នំពេញ និងលោកសេង ឃាង អនុប្រធានប្រឆាំងអំពើពុករលួយ។
ការប្រឡងសញ្ញាបត្រមធ្យមសិក្សាទុតិយភូមិឬបាក់ឌុបនៅឆ្នាំនេះ នឹងប្រព្រឹត្តិទៅនៅថ្ងៃទី២០សីហាឆ្នាំ២០១៨ ដោយមានបេក្ខជនចូលរួមប្រឡងចំនួន១១៧ ០៦១នាក់កើនឡើងជាងឆ្នាំមុន១៣៩៤៩នាក់ និងមាន១៩៥មណ្ឌលចែកជា៤៧១៦បន្ទប់នៅតាមរាជធានីខេត្តទូទាំងប្រទេស ។
ចំពោះលទ្ធផលនៃការប្រឡងវិញក្រសួងនឹងធ្វើការប្រកាសនៅតាមមណ្ឌលប្រឡងនីមួយៗនៅរសៀលថ្ងៃទី១១ខែកញ្ញាឆ្នាំ២០១៨សម្រាប់មណ្ឌលប្រឡងរាជធានីភ្នំពេញនិងខេត្តកណ្តាលនិងនៅថ្ងៃទី១២កញ្ញាឆ្នាំ២០១៨នៅតាមមណ្ឌលផ្សេងៗទៀត។
លោកបណ្ឌិតសភាចារ្យ ហង់ជួនណារ៉ុនបានមានប្រសាសន៍ថាការប្រឡងបាក់ឌុបនៅឆ្នាំនេះក្រសួងបានធ្វើការកែសម្រួលបន្ថែមមួយចំនួនទៅលើបទបញ្ញតិមួយចំនួនដើម្បីឲ្យការប្រឡងមានសុក្រឹត្យភាព យុត្តិធម៌និងអាចទទួលយកបានទាំងអស់គ្នា។
លោករដ្ឋមន្ត្រីបានបន្តថា នេះគឺជាឆ្នាំទី៥ហើយដែលក្រសួងបានធ្វើកែទំរង់ការប្រឡងបាក់ឌុបហើយនៅឆ្នាំនេះការប្រឡងបានដំណើរការបានល្អប្រសើរជាងឆ្នាំមុនៗដោយសារតែមានការគាំទ្រពីប្រមុខរាជរដ្ឋាភិបាល អាជ្ញាធរដែនដី លោកគ្រូអ្នកគ្រូ អាណាព្យាបាលនិងបេក្ខជនប្រឡង។
ជាក់ស្តែងនៅព្រឹកនេះមិនមានឃើញបេក្ខជនយកសំណៅឯកសារចូលនៅក្នុងមណ្ឌលប្រឡងទេដែលនេះបង្ហាញថាបេក្ខជនបានយល់ដឹងច្បាស់ពីបទបញ្ញតិដែលក្រសួងបានដាក់ចេញនិងម្យ៉ាងទៀតបេក្ខជនមានការជឿជាក់ទៅលើសមត្ថភាពរបស់ខ្លួនផងដែរ៕
Source: Kampuchea Thmey Daily
0 Comments