ប្រធានាធិបតី​ហ្ស៊ី​ម​បា​វ៉េ​និយាយ​ការពារ​ការបោះឆ្នោត​ដោយ “​យុត្តិធម៌​” ខណៈ​គណបក្សប្រឆាំង​រិះគន់​យ៉ាងខ្លាំង

ប្រធានាធិបតី​ហ្ស៊ី​ម​បា​វ៉េ​លោក Emmerson Mnangagwa កាលពី​ថ្ងៃ​សុក្រ​ បាន​ច្រានចោល​ការចោទប្រកាន់​ ដែលថា ជ័យជំនះ​នៃ​ការបោះឆ្នោត​របស់គាត់​ត្រូវបាន​គ្របដណ្ដប់​ដោយ​ការ​ក្លែងបន្លំ​ ហើយ​លោក​បាន​សរសើរ​ការបោះ​ឆ្នោត​នេះ​ថា ​ជាការ​ចាប់ផ្តើម​ថ្មី​មួយ​សម្រាប់​ប្រទេស​បន្ទាប់ពី​ការគ្រប់គ្រង​របស់​លោក Robert Mugabe។

ខណៈដែល​មេដឹកនាំ​គណបក្សប្រឆាំង​លោក Nelson Chamisa បាន​រិះគន់​លទ្ធផល​ជា​ផ្លូវការ​ថា​ជាការ​អាម៉ាស់​មួយ​នោះ​, លោក Mnangagwa ដែលជា​អតីត​សម្ព័ន្ធមិត្ត​របស់លោក Mugabe បាន​និយាយ​ការពារ​ការបោះឆ្នោត​នេះហើយ​បាន​អំពាវនាវ​ឲ្យ​មាន​សាមគ្គីភាព។

លោក Mnangagwa បាន​ប្រាប់​អ្នកកាសែត​ថា “​ស្រប​ពេលដែល​ពិភពលោក​ទាំងមូល​កំពុង​សម្លឹងមើល​លើ​យើង​នោះ យើង​បានផ្តល់​ការបោះឆ្នោត​ដោយ​សេរី យុត្តិធម៌​និង​គួរ​ឲ្យ​ទុកចិត្ត​”​។​

លោក​បាន​បន្ថែមថា “​បើទោះបីជា​គ្មាន​ដំណើរការ​តាមបែប​ប្រជាធិបតេយ្យ​ណាមួយ​ល្អឥតខ្ចោះ​ក៏ដោយ ការបោះឆ្នោត​ក្រោយ​ការ​កាន់តំណែង​របស់លោក Mugabe ជា​លើកដំបូង​របស់​ប្រទេស​ហ្ស៊ី​ម​បា​វ៉េ​នេះ​គឺ​ខុសគ្នា​ដាច់​ពី​ការបោះឆ្នោត​ពោរពេញ​ដោយ​ការ​ក្លែងបន្លំ​ដែល​ត្រូវបាន​គេ​មើលឃើញ​ក្នុងអំឡុងពេល​៣៧​ឆ្នាំ​នៃ​ការ​កាន់អំណាច​របស់លោក Mugabe”​។​

លទ្ធផល​ចុងក្រោយ​បាន​បង្ហាញថា លោក Mnangagwa ទទួលបាន​៥០,៨​ភាគរយ​នៃ​ការបោះឆ្នោត​កាលពី​ថ្ងៃ​ចន្ទ​ទល់នឹង​៤៤,៩​ភាគរយ​របស់លោក Chamisa ដែល​ចំនួន​នេះ​មាន​០,៨​ភាគរយ​លើ​កម្រិត​ដែល​ចាំបាច់​ដើម្បី​ចៀសវាង​ការបោះឆ្នោត​ជុំ​ទី​ពីរ​។​

ប៉ុន្តែ​លោក Chamisa នៅតែ​ទទូចថា លោក​គឺជា​អ្នកឈ្នះ​ការបោះឆ្នោត​ដែល​លោក​បាន​ថ្កោលទោស​ថា​ជា “​ការ​ក្លែងបន្លំ ខុសច្បាប់​និង​មិន​ស្របច្បាប់​”​។ លោក​បាន​និយាយថា “​យើង​មិន​ទទួលយក​លទ្ធផល​ក្លែងក្លាយ​ទេ​”​។ លោក​បាន​ប្តេជ្ញា​ជំទាស់​លទ្ធផល​នេះ​តាមរយៈ​តុលាការ​។​

ការចោទប្រកាន់​របស់​គណបក្សប្រឆាំង​អំពី​ការប្រព្រឹត្ត​អំពើពុករលួយ​នេះ​បាន​បណ្តាល​ឲ្យ​មានការ​បង្ក្រាប​យ៉ាង​សាហាវ​ទៅលើ​បាតុករ​នៅក្នុង​ទីក្រុង Harare កាលពី​ថ្ងៃ​ពុធ​នៅពេលដែល​កងទ័ព​បាន​បើក​ការបាញ់ប្រហារ​ដោយបាន​សម្លាប់​មនុស្ស​ចំនួន​៦​នាក់​។​

លោក Mnangagwa ដែល​កំពុង​ស្វែងរក​ការបញ្ចប់​ភាព​ឯក​កោ​ជា​អន្តរជាតិ​របស់​ហ្ស៊ី​ម​បា​វ៉េ​និង​ទាក់ទាញ​ការវិនិយោគ​បរទេស​ដែល​ត្រូវការ​ជា​ចាំបាច់​បាន​និយាយថា គាត់​នឹង​បង្កើត​គណៈកម្មការ​ឯក​រាជ្យ​មួយ​ដើម្បី​ស៊ើបអង្កេត​លើ​ការ​បង្ហូរឈាម​នេះ​៕ AFP

​

Source: Kampuchea Thmey Daily