ការ​កាត់​ពន្ធ​របស់​ស​ហ​រដ្ឋ​អាមេរិក​ បាន​ជំរុញ​ឲ្យ​ក្រុមហ៊ុន​គេចពន្ធ​មួយចំនួន​គិត​ឡើងវិញ

មេធាវី​និង​អ្នកពិគ្រោះ​យោបល់​បាន​និយាយថា ក្រុមហ៊ុន​អាមេរិក​មួយចំនួន​ដែល​បាន​ផ្លាស់​ទៅ​តំបន់​សមុទ្រ​នៅក្នុង​រលក​នៃ​កិច្ចព្រមព្រៀង​ផ្លាស់ប្តូរ​មួយ​គឺ​កំពុងតែ​ពិចារណា​វិល​ត្រឡប់មក​សហរដ្ឋអាមេរិក​វិញ​នៅពេលនេះ​ខណៈ​អត្រាពន្ធ​ក្នុងស្រុក​មាន​កម្រិត​ទាប​ហើយ​ការយកពន្ធ​កាន់តែ​តានតឹង​ឡើង​នៅក្រៅ​ប្រទេស​។​

ទីប្រឹក្សា​ពន្ធដារ​បាន​និយាយថា អតិថិជន​មួយក្រុម​បាន​សាកសួរ​អំពី​ការផ្លាស់ប្តូរ​ទីតាំង​ក្រុមហ៊ុន​មក​ក្នុងប្រទេស​វិញ​ដែល​វា​អាចពាក់ព័ន្ធ​នឹង​ការទិញ​ក្រុមហ៊ុន​ដែលមាន​មូលដ្ឋាន​នៅ​សហរដ្ឋអាមេរិក​។ យ៉ាងណាក្តី គ្មាន​ក្រុមហ៊ុន​ជាក់លាក់​ណាមួយ​ត្រូវ​បានកំណត់​អត្តសញ្ញាណ​ទេ​។​

ទីប្រឹក្សា​បាន​និយាយថា ភាពមិនប្រាកដប្រជា​អំពី​គោលនយោបាយ​ពាណិជ្ជកម្ម​របស់​ប្រធានាធិបតី​អាមេរិក​លោក Donald Trump ក៏បាន​ជំរុញ​ឲ្យ​មានការ​សន្ទនា​ផងដែរ​។​

លោក Pam Olson អ្នកជំនាញ​ខាង​ពន្ធដារ​ដែលមាន​មូលដ្ឋាន​នៅ​ទីក្រុង​វ៉ាស៊ីនតោន​របស់​ក្រុមហ៊ុន PwC បាន​ថ្លែងថា “​ក្រុមហ៊ុន​ដែលរ​ត់ទៅ​ក្រៅប្រទេស​មាន​ហេតុផល​ដើម្បី​ពិនិត្យ​មើលថា​តើ​វា​នៅតែ​សម​ហេតុផល​សម្រាប់​ពួកគេ​ដែរ​ឬ​អត់​ក្នុង​ការធ្វើជា​ជនបរទេស​ជាពិសេស​អ្នក​ផលិត​ផលិតផល​នៅក្រៅ​សហរដ្ឋអាមេរិក​និង​លក់​វា​ទៅ​ឲ្យ​អាមេរិក​វិញ​”​។​

ការកើនឡើង​នៃ​លំហូរ​មក​ប្រទេស​វិញ​នេះ​នឹង​ផ្លាស់ប្តូរ​ទិសដៅ​ជាថ្មី​ម្តងទៀត​ចាប់តាំងពី​ទសវត្សរ៍​ឆ្នាំ​១៩៨០​មក​ដែល​ពេលនោះ ក្រុមហ៊ុន​អាមេរិក​បានធ្វើ​សមាហរណកម្ម​នៅក្រៅ​ប្រទេស​ដើម្បី​កាត់បន្ថយ​ការចំណាយ​លើ​ពន្ធ​។​

នៅក្នុង​ការផ្លាស់ប្តូរ​នោះ ក្រុមហ៊ុន​អាមេរិក​តែងតែ​ទិញ​ក្រុមហ៊ុន​បរទេស​តូច​មួយ​នៅក្នុង​ប្រទេស​ដែល​យកពន្ធ​ទាប​និង​បង្កើត​ទីស្នាក់ការ​របស់​ក្រុមហ៊ុន​នៅ​ទីនោះ​។​

វា​មានន័យថា ក្រុមហ៊ុន​មិនចាំបាច់​បង់ពន្ធ​អាមេរិក​ទៅលើ​ចំណូល​ក្រៅប្រទេស​ទេ​បើទោះបីជា​ការគ្រប់គ្រង​និង​ប្រតិបត្តិការ​របស់ខ្លួន​នៅតែមាន​នៅក្នុង​សហរដ្ឋអាមេរិក​ក៏ដោយ​។​

គួរ​បញ្ជាក់ថា ក្រុមហ៊ុន​អាមេរិក​ជាង​៦០​បានគេច​ទៅរក​កន្លែង​មាន​ពន្ធ​ទាប​រួមទាំង​ក្រុមហ៊ុន​ផលិត​ឧបករណ៍​វេជ្ជសាស្ត្រ Medtronic Plc (MDT.N) ផងដែរ​។ មាន​រលក​នៃ​កិច្ចព្រមព្រៀង​ក្នុង​ឆ្នាំ ២០១១-២០១៤​ប៉ុន្តែ​វា​បានបញ្ចប់​នៅ​ឆ្នាំ​២០១៥​បន្ទាប់ពី​ការបង្ក្រាប​ដោយ​បទបញ្ជា​ពី​សំណាក់​លោក​ប្រធានាធិបតី Barack Obama៕ REUTERS

​

Source: Kampuchea Thmey Daily