ភ្នំពេញ ៖ ក្រសួងអប់រំយុវជន និងកីឡា កាលពីថ្ងៃទី២៥ ខែសីហា ឆ្នាំ២០១៨ បានបើកកិច្ចប្រជុំ បច្ចេកទេសដល់ប្រធាន អនុប្រធានតាមមណ្ឌលកំណែទាំង១០ដើម្បីត្រៀមរៀបចំដំណើរការកំណែនៃការប្រឡងសញ្ញាបត្រមធ្យមសិក្សាទុតិយភូមិចំណេះទូទៅ និងបំពេញវិជ្ជា សម័យប្រឡង ៖ ២០ សីហា ២០១៨ ដែលនឹងចាប់ផ្ដើមនៅថ្ងៃអាទិត្យនេះ។
កិច្ចប្រជុំនេះបានប្រព្រឹត្តទៅក្រោមអធិបតីភាពលោកបណ្ឌិតសភាចារ្យណាតប៊ុនរឿនរដ្ឋលេខាធិការក្រសួងអប់រំយុវជននិងកីឡា។
ក្នុងឱកាសនោះដែរ ប្រធាន អនុប្រធានមណ្ឌលកំណែ បានធ្វើការណែនាំលើការងារបច្ចេកទេសក្នុងការធ្វើអត្រាកំណែ ការបែងចែកក្រុមកំណែជាក្រុមតូចៗ ដែលមានចំនួនសមាជិកច្បាស់លាស់ ការប្រគល់ឯកសារ ប័ណ្ណសម្គាល់ ការណែនាំនូវការបម្រាមក្នុងការយកចូលនូវកាបូប ទូរស័ព្ទដៃ និងសម្ភារៈផ្សេង ៗចូលក្នុងមណ្ឌលកំណែជាដាច់ខាត។
ជាមួយគ្នានេះដែរលោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាកាលពីថ្ងៃសុក្រទី២៤ ខែសីហា ឆ្នាំ២០១៨បាន អញ្ជើញចុះពិនិត្យសកម្មភាព ពិនិត្យ ផ្ទៀងផ្ទាត់ ចុះអក្សរសម្ងាត់ និងកាត់ក្បាលសន្លឹកកិច្ចការបេក្ខជនប្រឡងសញ្ញាបត្រមធ្យមសិក្សាទុតិយភូមិនៅវិទ្យាល័យជាស៊ីមសន្ធរម៉ុកដែលមាន មុខវិជ្ជា សីលធម៌-ពលរដ្ឋវិជ្ជា។
ការប្រឡងសញ្ញាបត្រមធ្យមសិក្សាទុតិយភូមិឬបាក់ឌុបនៅឆ្នាំនេះមានរយៈពេលពីរថ្ងៃគឺថ្ងៃទី២០និង២១ខែសីហា ដែលទើបបញ្ចប់ទៅកាលពីពេលថ្មីៗនេះ មានបេក្ខជនចូលរួមប្រឡងចំនួន១១៥ ២៦៨ នាក់និងមាន១៩៥មណ្ឌលចែកជា៤៧១៦បន្ទប់នៅតាមរាជធានីខេត្តទូទាំងប្រទេសដោយមានអ្នកសង្កេតការណ៍មកពីអង្គភាពប្រឆាំងអំពើពុករលួយប្រមាណជាង៥ពាន់នាក់។ ក្នុងចំណោមបេក្ខជនចូលរួមប្រឡងចំនួន១១ ៥២៦៨នាក់ស្រី ៥៨ ១៥៨ នាក់ក្នុងនោះមានបេក្ខជនអវត្តមានចំនួន១៨៩៩នាក់ស្រី៧៤៤នាក់ស្មើនឹង១.៦៥ភាគរយ។
លោករស់សាលីន អ្នកនាំពាក្យក្រសួងអប់រំយុវជននិងកីឡាបានអះអាងថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនៅឆ្នាំនេះបានប្រព្រឹត្តិទៅ ដោយរលូន និងមានលក្ខណៈល្អប្រសើរជាងបណ្តាឆ្នាំមុនៗទៅទៀតដោយសារតែមានការសហការបានយ៉ាងល្អពីគ្រប់ភាគីពាក់ព័ន្ធទាំងអស់រួមមានក្រសួងអប់រំ អ្នកសង្កេតការណ៍ អង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា និងអាជ្ញាធរមានសមត្ថកិច្ចពាក់ព័ន្ធពិសេសបេក្ខជនប្រឡងបានបំពេញភារកិច្ចនិងគោរពតាមបទបញ្ញាតិរបស់ក្រសួងបានល្អ។
ជាមួយគ្នានេះដែរនៅតាមមណ្ឌលប្រឡងនីមួយៗ បានដំណើរការដោយភាពស្ងប់ស្ងាត់ និងមានរបៀបរៀប រយល្អដោយពុំមានឃើញនាំមកជាមួយនៅសំណៅឯកសារ ឬឧបករណ៍ហាមឃាត់ឡើយចូលនៅក្នុងមណ្ឌលប្រឡងឡើយ ដែលទាំងនេះដោយមានការយកចិត្តទុកដាក់ និងទំនួលខុសត្រូវខ្ពស់ពីគណៈកម្មការមេប្រយោគគ្រប់លំដាប់ថ្នាក់ដែលបានខិតខំបំពេញកិច្ចការងាររបស់ខ្លួនបានល្អប្រសើរ។
លោក រស់ សាលីនបានបញ្ជាក់ថា ភាពជោគជ័យនៃដំណើរការប្រឡងបាក់ឌុបនេះគឺស្តែងចេញពីលទ្ធផលការធ្វើកំណែទម្រង់គ្រប់រូបភាពរបស់ក្រសួងទៅលើការប្រឡងបាក់ឌុបទាំងការគ្រប់គ្រងសាលា ការបណ្តុះបណ្តាលគ្រូ ការងារអធិការកិច្ច ការរៀននិងការបង្រៀនជាដើម។
ទន្ទឹមនឹងភាពជោគជ័យនេះក៏មានបេក្ខជននិងបុគ្គលិកអប់រំមួយចំនួនមានបញ្ហាសុខភាព ប្រព្រឹត្តិផ្ទុយពីបទបញ្ញត្តិក្រសួង។
នៅក្នុងរយៈពេលពីរថ្ងៃនៃការប្រឡងបាក់ឌុបឆ្នាំនេះមានបេក្ខជនមានបញ្ហាសុខភាពមានចំនួន៦៤ករណីដូចជាវិលមុខ ខ្យល់គរ ខ្សោយកម្លាំងដោយសារការទទួលទានអាហារនិងសម្រាកមិនបានគ្រប់គ្រាន់ប៉ុន្តែអាចដំណើរការប្រឡងបន្តទៀតបាន បន្ទាប់ពីទទួលបានការសង្គ្រោះបឋមក្នុងនោះមានបេក្ខជន៥នាក់មិនអាចបន្តការប្រឡងបានដោយសារស្ថានភាពសុខភាពធ្ងន់ធ្ងរ។ មានបេក្ខជនមានកំហុសឆ្គងចំនួន៧ករណីក្នុងនោះមាន៥នាក់យកទូរស័ព្ទដៃចូលនិង២នាក់ទៀតយកឯកសារចូល។ ចំណែកគណៈមេប្រយោគមានកំហុសឆ្គងដោយមានទុកជាប់ខ្លួន និងប្រើទូរស័ព្ទដៃនៅក្នុងមណ្ឌលប្រឡងចំនួន៥ករណី។
គួរបញ្ជាក់ថា ចំពោះលទ្ធផល ប្រឡង នឹងត្រូវប្រកាសនៅតាមមណ្ឌលប្រឡងក្នុងរាជធានីភ្នំពេញ និងខេត្តកណ្ដាល នារសៀលថ្ងៃទី១១ ខែកញ្ញា ឆ្នាំ២០១៨ និងនៅតាមមណ្ឌលប្រឡងក្នុងខេត្តផ្សេងទៀត នាថ្ងៃទី១២ ខែកញ្ញា ឆ្នាំ២០១៨ ព្រមទាំងផ្សព្វផ្សាយតាមបណ្ដាញទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡា faceboo k.com/ moey s.gov.kh៕
Source: Kampuchea Thmey Daily
0 Comments