លោក ហ៊ុន ម៉ាណែត បាននាំយកអំណោយជូនប្រជាពលរដ្ឋជាង១៥០០គ្រួសារ ដែលរងគ្រោះដោយសារទឹកជំនន់នៅ ស្រុកកោះសូទិន

កំពង់ចាម ៖ លោក ហ៊ុន ម៉ាណែត រួមជាមួយអាជ្ញាធរខេត្ត ស្រុក ឃុំ ក្រុមការងារ និងសប្បុរសជន បាននាំយកអំណោយជូនប្រជាពលរដ្ឋជាង១៥០០គ្រួសារ ដែលរងគ្រោះដោយសារទឹកជំនន់នៅក្នុងឃុំកោះសូទិន និងឃុំកំពង់រាប ស្រុកកោះសូទិន ខេត្តកំពង់ចាម នៅព្រឹកថ្ងៃអាទិត្យ ទី២៦ ខែសីហា ឆ្នាំ២០១៨។

ថ្លែងទៅកាន់ប្រជាពលរដ្ឋ ក្នុងឱកាសនោះ លោក ហ៊ុន ម៉ាណែត ពាំនាំការផ្តាំផ្ញើការសាកសួរសុខទុក្ខ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋដែលរងគ្រោះដោយសារទឹកជំនន់ ដែលថ្នាក់ដឹកនាំតែងតែគិតយកចិត្តទុកដាក់ចំពោះសុខទុក្ខ ការលំបាកនិងជីវភាពរស់នៅរបស់ប្រជាពលរដ្ឋតាមរយៈឲ្យមន្ត្រី ក្រុមការងារ អាជ្ញាធរគ្រប់លំដាប់ថ្នាក់ចុះជួយប្រជាពលរដ្ឋគ្រប់ពេលវេលានិងគ្រប់ទីកន្លែង។

លោក ហ៊ុន ម៉ាណែត បានផ្តាំផ្ញើការថ្លែងអំណរគុណពីសំណាក់សម្ដេចតេជោ ហ៊ុន សែន ចំពោះប្រជាពលរដ្ឋដែលបានជឿទុកចិត្ត និងបោះឆ្នោតគាំទ្រសម្តេចតេជោដឹកនាំប្រទេស។ លោកក៏បានថ្លែងអំណរគុណដល់អាជ្ញាធរគ្រប់លំដាប់ថ្នាក់ កម្លាំងសមត្ថកិច្ច បុគ្គលិកសុខាភិបាល កាកបាទក្រហមកម្ពុជា ក្រុមហ៊ុនជីបម៉ុងគ្រុប និងបណ្តាសប្បុរសជនទាំងអស់ដែលបានចូលរួមចំណែកក្នុងការជួយដល់ប្រជាពលរដ្ឋដែលរងគ្រោះដោយសារទឹកជំនន់នៅស្រុកកោះសូទិន ក៏ដូចជានៅតាមបណ្តាខេត្តមួយចំនួនទៀត។

តាមរបាយការណ៍ស្រុកកោះសូទិន បានឱ្យដឹងថា ប្រជាពលរដ្ឋដែលរងគ្រោះដោយសារទឹកជំនន់ បានទទួលការយកចិត្តទុកដាក់ ពីថ្នាក់ដឹកនាំគ្រប់ស្ថាប័នរបស់រាជរដ្ឋាភិបាលដែលដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ថ្នាក់ដឹកនាំ និងក្រុមការងារចុះជួយស្រុកនិងសប្បុរសជនដទៃទៀតដោយនាំយកនូវអំណោយមានសំភារៈ គ្រឿងឧបភោគបរិភោគ ៨,៦០១ គ្រួសារ។ ហើយថ្ងៃនេះផងដែរ លោក ហ៊ុន ម៉ាណែត បានអញ្ជើញចែកអំណោយជូនដល់បងប្អូនប្រជាពលរដ្ឋចំនួន ១.០៣២ គ្រួសារបន្ថែមទៀតស្ថិតនៅក្នុងឃុំកោះសូទិននិងឃុំកំពង់រាប ស្រុកកោះសូទិន ខេត្តកំពង់ចាម ដែលរងគ្រោះដោយសារទឹកជំនន់ទន្លេមេគង្គ៕