កូរ៉េខាងជើងគ្រោងដោះលែងអ្នកទោសជនជាតិជប៉ុន
អ្នកទេសចរជនជាតិជប៉ុនម្នាក់ដែលត្រូវបានឃុំខ្លួននៅក្នុងប្រទេសកូរ៉េខាងជើង នឹងត្រូវបានដោះលែង “តាមគោលការណ៍មនុស្សធម៌”។ នេះបើតាមសេចក្តីរាយការណ៍របស់ប្រព័ន្ធផ្សព្វផ្សាយរដ្ឋរបស់ក្រុងព្យុងយ៉ាង ខណៈក្រុងតូក្យូកំពុងស្វែងរកកិច្ចប្រជុំកំពូលមួយជាមួយកូរ៉េខាងជើងចំពេលមានការវិវឌ្ឍផ្នែកការទូតនៅលើឧបទ្វីបនេះ។
ទីភ្នាក់ងារព័ត៌មាន KCNA បានរាយការណ៍ថា “លោក Tomoyuki Sugimoto ដែលបានទៅលេងប្រទេសកូរ៉េខាងជើងក្នុងនាមជាភ្ញៀវទេសចរជប៉ុនមួយរូបកាលពីពេលថ្មីៗនេះគឺត្រូវបានស្ថិតក្រោមការគ្រប់គ្រងដោយស្ថាប័នពាក់ព័ន្ធមួយដើម្បីសាកសួរអំពីឧក្រិដ្ឋកម្មរបស់គាត់ប្រឆាំងនឹងច្បាប់របស់កូរ៉េខាងជើង”។
លោក Sugimoto មិនត្រូវបានគេស្គាល់ទូលំទូលាយទេប៉ុន្តែរបាយការណ៍ប្រព័ន្ធផ្សព្វផ្សាយរបស់ជប៉ុនបាននិយាយថា គាត់គឺជាអ្នកកាត់.តវីដេអូម្នាក់ដែលបានមកទស្សនាប្រទេសកូរ៉េខាងជើងក្នុងដំណើរទេសចរណ៍មួយដែលរៀបចំដោយទីភ្នាក់ងារទេសចរណ៍បរទេស។
សេចក្តីរាយការណ៍បានឲ្យដឹងថា គាត់ប្រហែលជាត្រូវគេសង្ស័យថាបានថតវីដេអូនៃកន្លែងយោធាមួយនៅក្នុងទីក្រុងកំពង់ផែ Nampo ភាគខាងលិច។
ទោះបីជាយ៉ាងណាក៏ដោយ វាមិនច្បាស់ទេថាតើលោក Sugimoto ត្រូវបានចោទប្រកាន់ពីបទឧក្រិដ្ឋណាមួយដែរឬអត់ហើយរបាយការណ៍របស់ KCNA កាលពីល្ងាចថ្ងៃអាទិត្យមិនបានផ្តល់ព័ត៌មានលម្អិតស្តីពីពេលវេលាដែលគាត់នឹងត្រូវបានដោះលែងនោះទេ។
សេចក្តីរាយការណ៍បានឲ្យដឹងថា “ស្ថាប័នពាក់ព័ន្ធរបស់កូរ៉េខាងជើងបានសម្រេចចិត្តអត់ឱនឲ្យគាត់ហើយបណ្តេញគាត់ចេញពីប្រទេសកូរ៉េខាងជើងលើគោលការណ៍មនុស្សធម៌”។
ទន្ទឹមនោះ ក្រសួងការបរទេសជប៉ុនបានបដិសេធធ្វើអត្ថាធិប្បាយជាមួយ AFP ។
គួរបញ្ជាក់ថា ប្រទេសកូរ៉េខាងជើងមានប្រវត្តិយូរមកហើយក្នុងការចាប់ខ្លួនជនបរទេសលើការចោទប្រកាន់ចារកម្មហើយបន្ទាប់មកប្រើពួកគេជាកូនអុកការទូត។
របបប្រដាប់អាវុធនុយក្លេអ៊ែរមួយនេះបានដោះលែងអ្នកទោសអាមេរិកចំនួន៣នាក់កាលពីខែឧសភានៅក្នុងកាយវិការសុច្ឆន្ទៈមួយមុនជំនួបកំពូលរវាងមេដឹកនាំកូរ៉េខាងជើងលោកគីមជុងអ៊ុននិងប្រធានាធិបតីអាមេរិកលោកដូណាល់ត្រាំនៅប្រទេសសិង្ហបុរី៕ AFP
Source: Kampuchea Thmey Daily
0 Comments