អូស្ត្រាលី​តាម​ស្វែងរក ​បន្ទាប់ពី​ទូក​នេសាទ​ខុសច្បាប់​ជាប់​កឿង​ក្នុង​ដែនទឹក​ដែល​ពោរពេញ​ដោយ​សត្វ​ក្រពើ

ជនបរទេស​រាប់​សិប​នាក់ ​ត្រូវ​បាន​គេ​ជឿ​ថា​ កំពុង​រត់​គេចខ្លួន​នៅ​ថ្ងៃ​ចន្ទ​ក្នុង​ព្រៃកោងកាង​អូស្ត្រាលី​បន្ទាប់ពី​ទូក​នេសាទ​ខុសច្បាប់​របស់​ពួកគេ​ជាប់​កឿង​ក្នុង​ដែនទឹក​ដែល​ពោរពេញ​ទៅ​ដោយ​សត្វ​ក្រពើ។

កងកម្លាំង​ព្រំដែន​អូស្ត្រាលី​បាន​និយាយថា ជនបរទេស​មួយចំនួន​ត្រូវបាន​កំណត់​ទីតាំង​ប៉ុន្តែ​មិនបាន​បង្ហាញ​ពី​ប្រទេស​ដើម​របស់​ពួកគេ​ឬថា​តើ​ពួកគេ​ជា​អ្នកនេសាទ​ឬ​ជា​អ្នកស្វែងរក​សិទ្ធិ​ជ្រកកោន​នោះទេ​។​

អ្នកស្រុក​បានឃើញ​មនុស្ស​រត់​ចូល​ក្នុងព្រៃ​បន្ទាប់ពី​ទូក​របស់​ពួកគេ​បាន​ជាប់​កឿង​នៅ​ជិត​ទន្លេ Daintree នៃ​ភាគ​ខាងជើង​រដ្ឋ Queensland កាលពី​ថ្ងៃអាទិត្យ​។​

របាយការណ៍​ប្រព័ន្ធ​ផ្សព្វ​ផ្សាយបាន​និយាយថា ពួកគេ​អាចមកពី​ប្រទេស​វៀតណាម​បើទោះបីជា​មន្ត្រី​សង្គ្រោះ​ម្នាក់​បាន​ប្រាប់​ទូរទស្សន៍ ABC ថា វា​គឺជា​ទូក​របស់​ឥណ្ឌូនេស៊ី​ក៏ដោយ​។​

ប្រធាន​ប៉ូលិស​រដ្ឋ Queensland លោក Mark Ryan បាន​ប្រាប់ ABC ថា រហូតមកដល់​ពេលនេះ មនុស្ស​ចំនួន​១៥​នាក់​ត្រូវបាន​ឃាត់ខ្លួន​។ កាសែត Courier Mail បាន​ឲ្យ​ដឹងថា មនុស្ស​រហូតដល់​ទៅ​២០​នាក់​ផ្សេងទៀត​នៅតែ​ស្ថិតក្នុង​តំបន់​នោះ​។​

ព្រៃកោងកាង Daintree ដែលមាន​ចម្ងាយ​១២០​គីឡូម៉ែត្រ​ភាគ​ខាងជើង​នៃ​ទីក្រុង​ទេសចរណ៍ Cairns ដ៏​ល្បីល្បាញ​គឺជា​កន្លែង​ពោរពេញ​ដោយ​សត្វ​ក្រពើ ពស់​និង​សត្វ​បក្សី cassowary ។​

លោក Peter Rinaudo អ្នកត្រួតត្រា​តំបន់​សេវា​សង្គ្រោះបន្ទាន់​រដ្ឋ​បាន​និយាយថា ក្រុមការងារ​របស់គាត់​កំពុង​ស្វែងរក​តាម​ព្រៃកោងកាង​និង​នៅក្បែរ​មាត់ទន្លេ​។​

អតីត​មេបញ្ជាការ​កងកម្លាំង​ព្រំដែន​លោក Roman Quaedvlieg បាន​បង្ហោះ Twitter នៅ​ថ្ងៃ​ចន្ទ​ថា ទូក​នេសាទ​របស់​វៀត​ណា​ម​បាន​នេសាទ​ដោយ​ខុសច្បាប់​នៅ​ជិត​ឆ្នេរ​ភាគ​ខាងជើង​នៃ​រដ្ឋ Queensland កាលពី​២​ឆ្នាំមុន​ដោយសារតែ​ស្តុក​ត្រី​នៃ​ប្រទេស​របស់ខ្លួន​បាន​ថយចុះ​។​

ប៉ុន្តែ​ប្រសិនបើ​ទូក​នោះ​ដឹក​អ្នកស្វែងរក​សិទ្ធិ​ជ្រកកោន​វិញ​នោះ វា​ជា​លើក​ទី​១​ហើយ​ក្នុង​រយៈពេល​៤​ឆ្នាំ​ដែល​ទូក​បែបនេះ​បាន​ទៅដល់​ឆ្នេរ​អូស្ត្រាលី​៕ AFP

​

Source: Kampuchea Thmey Daily