បេក្ខជនឈ្នះ១០រូបពីការប្រកួតដាក់បាតដៃលើរថយន្តស៊ូបារុឆ្នាំ២០១៨ មានឱកាសចេញទៅប្រកួតនៅប្រទេសសិង្ហបុរីដើម្បីឈ្នះរង្វាន់ធំ

ភ្នំពេញ ៖ ក្រុមហ៊ុន ម៉ូធ័រ អ៊ីមេជ ខេមបូឌាដែលជាតំណាងចែកចាយផ្តាច់មុខរថយន្ត ស៊ូបារុ ប្រចាំព្រះរាជាណាចក្រកម្ពុជា កាលពីថ្ងៃទី២៦ ខែសីហា ឆ្នាំ២០១៨ បានរៀបចំកម្មវិធី ការប្រកួតដាក់បាតដៃលើរថយន្ត ស៊ូបារុ ជាលើកទី៨ នៅរាជធានីភ្នំពេញនាផ្សារទំនើបសុវណ្ណាចាប់ពីម៉ោង៩ព្រឹកដល់ម៉ោង៩យប់។

កម្មវិធីប្រកួតនេះគឺមានបេក្ខជនប្រមាណជាង៦០នាក់ បានមកចុះឈ្មោះចូលរួមប្រកួតក្នុងឆ្នាំនេះហើយបេក្ខជនចំនួន១០រូបដែលឈ្នះលើការប្រកួតត្រូវបានជ្រើសរើស និងទទួលបានការចំណាយទាំងការធ្វើដំណើរ និងការស្នាក់នៅក្នុងប្រទេសសិង្ហបុរី ដែលជាកន្លែងប្រកួតវគ្គផ្តាច់ព្រាត់ជាមួយនឹងបេក្ខជនដែលឈ្នះមកពីបណ្តាប្រទេសផ្សេងៗក្នុងអាស៊ានដើម្បីឈ្នះរង្វាន់ធំរថយន្ត Subaru XV ដ៏ថ្មីស្រឡាងមួយគ្រឿងមានតម្លៃ៥៨,០០០ដុល្លារ។

បើតាមការឲ្យដឹងពីអ្នករៀបចំកម្មវិធីបានបញ្ជាក់ថា ការប្រកួតដាក់បាតដៃលើរថយន្តគឺជាការប្រកួតដ៏លំបាក និងទាមទារឲ្យមានភាពអំណត់អត់ធ្មត់ ដែលបេក្ខជនទាំងអស់តម្រូវឲ្យដាក់បាតដៃស្តាំលើរូបបាតដៃដែលបិទរួចជាស្រេចនៅលើរថយន្ត រួមទាំងលក្ខខណ្ឌ និងបទបញ្ញត្តិផ្សេងៗ ដែលប្រើវគ្គផ្តាច់ព្រ័ត្រ។ ជាធម្មតាបេក្ខជនដែលចូលរួមប្រកួតត្រូវឈរដាក់ដៃស្តាំរបស់ខ្លួននៅលើរថយន្តដែលបានកំណត់តាមរយៈពេល។

ប្រភពដដែលបាននិយាយទៀតថា បេក្ខជននឹងត្រូវអនុញ្ញាតឲ្យសម្រាក១០នាទីរាល់រយៈពេល ៦ម៉ោងម្តងដើម្បីញុំាទឹក និងប្រើប្រាស់បន្ទប់ទឹក។ ទន្ទឹមនឹងនោះ នៅក្នុងពេលប្រកួតយើងអាចមានជាហ្គេមផ្សេងៗសម្រាប់លេងកំសាន្តផងដែរ ហើយបេក្ខជននឹងត្រូវចាកចេញពីការប្រកួតភ្លាមៗ ប្រសិនបើមានការធ្វើខុសលក្ខខណ្ឌណាមួយ។

ជាក់ស្តែងការប្រកួតឆ្នាំនេះ ក៏មានលក្ខណៈស្វិតស្វាញមិនចាញ់ពីឆ្នាំមុនដែរ ប៉ុន្តែអ្វីដែលពិសេសលើសពីឆ្នាំមុនៗនោះ គឺ បេក្ខជនមួយរូបដែលឈរបានយូរចុងក្រោយគេបង្អស់ប្រចាំប្រទេសកម្ពុជា នៅក្នុងប្រទេសសិង្ហបុរី នឹងមានឱកាសឈ្នះទឹកប្រាក់ចំនួន ១ពាន់ដុល្លារសិង្ហបុរី ពីក្រុមហ៊ុនផ្ទាល់។
សូមបញ្ជាក់ថា នៅប្រទេសសិង្ហបុរី បេក្ខជនដែលចូលរួមប្រកួតអាចមានឱកាសឈ្នះរង្វាន់ជាសាច់ប្រាក់ច្រើនផ្សេងទៀត ដូចជារង្វាន់ប្រចាំប្រទេស(សម្រាប់បេក្ខជនណាដែលឈរបានយូរជាងគេប្រចាំប្រទេសរបស់ខ្លួន) រង្វាន់ប្រចាំអាស៊ាន (បេក្ខជនដែលឈរបានយូរជាងគេប្រចាំតំបន់ដោយមិនរាប់បញ្ចូលប្រទេសសិង្ហបុរី) និងរង្វាន់ក្រុមសម្រាប់ប្រទេសណាដែលឈរបានយូរជាងគេ (យកពេលវេលាដែលបេក្ខជនម្នាក់ៗឈរបូកបញ្ចូលគ្នាដើម្បីបានពេលវេលាជាក្រុម)។ កម្មវិធីនេះទទួលបានការឧបត្ថម្ភដោយ Bon Tea, Hito, Revive Mountain Dew និង S-Cool៕