ការភ័យខ្លាច​បាន​កើនឡើង​ ខណៈ​ទឹកជំនន់​ជម្លៀស​មនុស្ស​១៣០,០០០​នាក់​នៅ​មី​យ៉ាន់​ម៉ា

មានការ​ព្រួយបារម្ភ​កាន់តែខ្លាំង​កាលពី​ថ្ងៃ​ពុធ​ថា ទំនប់ទឹក​អាច​ធ្លាយ​ដោយសារតែ​ភ្លៀង​ធ្លាក់​នាពេល​ថ្មីៗ​នេះ​ នៅ​ភាគ​អាគ្នេយ៍​ប្រទេស​មី​យ៉ាន់​ម៉ា​ ដែលជា​កន្លែង​មនុស្ស​ជាង​១៣០,០០០​នាក់​ត្រូវ​បង្ខំចិត្ត​ចាក​ចេញពីផ្ទះ​សម្បែង​រប​ស់​ពួកគេ ​ហើយ​មាន​មនុស្ស​រាប់សិប​នាក់​ត្រូវ​បាន​សម្លាប់។

​តំបន់​ដី​កសិកម្ម​ដ៏​ធំ​មួយ​នៅ​ទូទាំង​ខេត្ត​ចំនួន​៤​ត្រូវ​លិច​នៅក្រោម​ទឹក​ភក់​ខណៈ​ក្រុម​ជួយសង្គ្រោះ​កំពុង​ព្យាយាម​ធ្វើដំណើរ​ទៅ​ភូមិ​ទាំងនោះ​ដោយ​ជិះទូក​ដើម្បី​ផ្តល់​ស្បៀងអាហារ​ដល់​អ្នក​ទាំងឡាយ​ណា​ដែល​មិនអាច​ឬ​បដិសេធ​ចាក​ចេញពីផ្ទះ​របស់​ពួកគេ​។​
​
នៅ​ទីប្រជុំជន Madauk ក្នុង​តំបន់ Bago, ទឹកជំនន់​ឡើង​ជិត​ផុត​ទំនប់​ហើយ​ខណៈដែល​អ្នកស្រុក​មាន​ភាពភ័យខ្លាច​ថា ភ្លៀង​ធ្លាក់​រដូវ​មូសុង​ថ្មី​អាច​បង្ក​ឲ្យ​មាន​គ្រោះមហន្តរាយ​។​
​
មេដឹកនាំ​ក្រុម​ជួយសង្គ្រោះ​លោក Hlaing Min Oo បាន​ប្រាប់ AFP ថា “​ប្រសិនបើ​ទំនប់​នេះ​មិនអាច​ទប់ទល់​នឹង​ទឹកជំនន់​ក្រោយ​បានទេ​នោះ ភូមិ​ជាច្រើន​ទៀត​នឹងមាន​គ្រោះថ្នាក់​ខ្ពស់​។ សម្រាប់​ពេលនេះ មានឱកាស​តិចតួច​បំផុត​ដែលថា​កម្រិត​ទឹកនឹង​ធ្លាក់ចុះ​”​។​
​
យោងតាម​ប្រព័ន្ធ​ផ្សព្វផ្សាយ​របស់​រដ្ឋ​បាន​ឲ្យ​ដឹងថា ការបញ្ជា​ជម្លៀស​នៅតែ​ដាក់​នៅ​ទូទាំង​ខេត្ត Bago, Karen, Mon និង Taninthari ខណៈ​ទំនប់​និង​អាង​ស្តុក​ទឹក​ចំនួន​៣៦​គឺ​បាន​ហៀរ​។​
​
លោក Phyu Lei Lei Tun នាយក​ក្រសួង​សុខុមាលភាព​សង្គម​បាន​និយាយថា “​ប្រជាជន​ជាង​១៣០,០០០​នាក់​មកពី​គ្រួសារ​ចំនួន​២៨,០០០​ត្រូវបាន​ជម្លៀសចេញ​”​។ លោក​បានលើកឡើង​បែបនេះ​ដោយ​ដកស្រង់​តួលេខ​ដែល​លោក​និយាយថា​មាន​ភាពត្រឹមត្រូវ​គិត​ត្រឹម​ល្ងាច​ថ្ងៃ​អង្គារ​។​
​
មនុស្ស​ជាច្រើន​មិនអាច​គេចខ្លួន​ទៅ​ជម្រក​បានទេ​ឬ​កំពុង​ជ្រើសរើស​ជម្រើស​បន្ត​ស្នាក់​នៅក្នុង​លំនៅដ្ឋាន​ដែល​លិច​ទឹក​របស់​ពួកគេ​ដោយ​សង្ឃឹមថា កម្រិត​ទឹកនឹង​ចាប់ផ្តើម​ស្រក​ទៅវិញ​។​
​
វត្ត​អា​រ៉ា​ម​មួយ​កំពុង​បម្រើ​ជា​ចំណុច​ប្រមូលផ្តុំ​សម្រាប់​ការ​បរិច្ចាគ​អង្ករ មី​និង​នំ​ប៊ី​ស​ស្គី​ត​នៅ​ក្នុងភូមិ Maubin ដែលមាន​ប្រជាជន​១០៨​គ្រួសារ​។​
​
ប្រទេស​មី​យ៉ាន់​ម៉ា​ទើបតែ​ចូលដល់​រដូវ​មូសុង​ប៉ុន្ដែ​វា​មិនមែន​រងគ្រោះ​តែម្នាក់ឯង​នោះទេ​។​
​ភ្លៀង​ធ្លាក់​ខ្លាំង​នៅ​ឆ្នាំនេះ​បាន​បោកបក់​ភាគច្រើន​នៃ​តំបន់​មេគង្គ​ដោយ​ទំនប់​មួយ​នៅក្នុង​ប្រទេស​ឡាវ​បាន​បាក់​កាលពី​សប្ដាហ៍​មុន​ដោយបាន​បំផ្លាញ​ភូមិ​ជាច្រើន​និង​បណ្តាល​ឲ្យ​មនុស្ស​ជាច្រើន​នាក់​បាត់​ខ្លួន​៕ AFP

​

Source: Kampuchea Thmey Daily