របាយការណ៍នានាបានឲ្យដឹងកាលពីថ្ងៃព្រហស្បតិ៍ថា ជនសង្ស័យជាចារកម្មរុស្ស៊ីម្នាក់ បានធ្វើការនៅស្ថានទូតអាមេរិកក្នុងទីក្រុងមូស្គូអស់រយៈពេលជាងមួយទសវត្សរ៍មុនពេលត្រូវបានបណ្តេញចេញយ៉ាងស្ងៀមស្ងាត់កាលពីឆ្នាំមុន។
យោងតាមប្រភពព័ត៌មាន ដែលដកស្រង់ដោយកាសែត Guardian និងទូរទស្សន៍ CNN បានឲ្យដឹងថា នារីជនជាតិរុស្ស៊ីម្នាក់ត្រូវបានជួលដោយសេវាសម្ងាត់ហើយបានស្ថិតនៅក្រោមការសង្ស័យបន្ទាប់ពីការបោសសម្អាតសន្តិសុខតាមទម្លាប់មួយដែលធ្វើឡើងដោយក្រសួងការបរទេស។
ការស៊ើបអង្កេតបានរកឃើញថា នាងមានការប្រជុំដែលមិនមានការអនុញ្ញាតជាទៀងទាត់ជាមួយទីភ្នាក់ងារចារកម្មរុស្ស៊ីដ៏សំខាន់គឺ FSB។
មន្ត្រីម្នាក់បានប្រាប់ទូរទស្សន៍ CNN ថា “យើងគិតថា នាងកំពុងនិយាយជាមួយ FSB ប៉ុន្តែនាងបានផ្តល់ព័ត៌មានឲ្យពួកគេច្រើនជាងនាងមាន”។
របាយការណ៍បានឲ្យដឹងថា ស្ត្រីរូបនេះបានចូលទៅកាន់ប្រព័ន្ធអ៊ីនធឺណេតនិងអ៊ីម៉ែលរបស់សេវាសម្ងាត់ដែលបានផ្តល់ឲ្យនាងនូវទិន្នន័យដ៏មានសក្តានុពលរួមទាំងកាលវិភាគរបស់លោកប្រធានាធិបតីនិងអនុប្រធានាធិបតីអាមេរិកផងដែរ។ ប្រភពដដែលបានប្រាប់ទូរទស្សន៍ CNN ថា “ប៉ុន្តែនាងមិនមានលទ្ធភាពទទួលព័ត៌មានសម្ងាត់ខ្ពស់នោះទេ”។
ស្របពេលជាមួយគ្នានោះដែរ កាសែត Guardian បានរាយការណ៍ថា សេវាសម្ងាត់បានប៉ុនប៉ងទប់ស្កាត់ភាពអាម៉ាសដោយអនុញ្ញាតឲ្យនាងទៅនៅពេលដែលរុស្ស៊ីបញ្ជាឲ្យដកបុគ្គលិកចំនួន៧៥០នាក់ចេញពីស្ថានទូតអាមេរិកអំឡុងពេលមានជម្លោះការទូតមួយក្រោយការចោទប្រកាន់ពីការជ្រៀតជ្រែករបស់ក្រុងមូស្គូក្នុងការបោះឆ្នោតប្រធានាធិបតីអាមេរិកឆ្នាំ២០១៦។
ប្រភពមួយបានប្រាប់កាសែតអង់គ្លេសនេះថា “សេវាសម្ងាត់បានព្យាយាមលាក់ការរំលោភបំពាននេះដោយបណ្តេញនាងចេញ”។
ទំនាក់ទំនងរវាងសហរដ្ឋអាមេរិកនិងប្រទេសរុស្ស៊ីបានល្អក់កករជាខ្លាំងចាប់តាំងពីការជាប់ឆ្នោតរបស់លោក Donald Trump ថ្វីបើគាត់មានទំនាក់ទំនងផ្ទាល់ខ្លួនកក់ក្តៅជាមួយលោកប្រធានាធិបតី Vladimir Putin ក៏ដោយ។
គូសត្រូវសម័យសង្គ្រាមត្រជាក់ទាំងពីរនេះក៏បែងចែកគ្នាយ៉ាងជ្រៅផងដែរលើបញ្ហានានាដូចជាជម្លោះនៅក្នុងប្រទេសស៊ីរី ការកាត់យកឧបទ្វីប Crimea ពីប្រទេសអ៊ុយក្រែននិងកិច្ចព្រមព្រៀងនុយក្លេអ៊ែរអ៊ីរ៉ង់ជាដើម៕
Source: Kampuchea Thmey Daily
0 Comments