ភ្នំពេញ ៖ តាមសេចក្ដីជូនដំណឹងរបស់តុលាការកំពូលបានអោយដឹងថា នៅថ្ងៃទី០៨ ខែសីហា ឆ្នាំ២០១៨ខាងមុខ ក្រុមប្រឹក្សាជំនុំជម្រះរឿងក្ដីព្រហ្មទណ្ឌនៃតុលាការកំពូល នឹងបើកសវនាការសំណុំរឿងប្ដឹងសារទុក្ខរបស់គ្រូពេទ្យភូមិ យ៉ែម ជ្រិន ដែលបានបង្កការចម្លងមេរោគដល់អ្នកភូមិសង្កែប្រមាណ១២២នាក់។
ប្រភពព័ត៌មានពីតុលាការកំពូលបានអោយដឹងថា បណ្ដឹងសារទុក្ខរបស់ជនជាប់ចោទ យ៉ែម ជ្រិន បានធ្វើឡើងក្រោយពីសាលាឧទ្ធរណ៍បានសម្រេចតម្កល់សាលក្រមនៃសាលាដំបូងខេត្តបាត់ដំបងដែលផ្ដន្ទាទោសជនជាប់ចោទដាក់ពន្ធនាគាររយៈពេល២៥ឆ្នាំ។
តុលាការខេត្តបាត់ដំបង បានលើកយកសំណុំរឿងគ្រូពេទ្យចាក់ថ្នាំចម្លងមេរោគអេដស៍ទៅកាន់អ្នកឃុំរកា មកជំនុំជម្រះចំនួន២ថ្ងៃហើយ ចាប់តាំងពីថ្ងៃទី២០ ខែតុលា ឆ្នាំ២០១៥។
នៅក្នុងសវនាការដើមបណ្តឹង ដែលកំពុងផ្ទុកមេរោគអេដស៍ត្រូវបាន ចៅក្រមហៅឡើងសាកសួរម្តងម្នាក់ៗទៅលើដំណើរដើមទងនាំឲ្យពួកគេ កើតជំងឺអេដស៍នេះ។
លោកគ្រូពេទ្យប្រចាំភូមិយ៉ែម ជ្រិន ក៏ត្រូវបានចៅ ក្រមហៅឡើងបកស្រាយនិងការពារទៅលើការចោទប្រកាន់ពីដើមបណ្តឹងផងដែរ។
ជនជាប់ចោទបានសារភាពថា គាត់មិនមានច្បាប់អនុញ្ញាតអោយបើកការប្រកបរបរផ្នែកសុខភាពទេ ដោយគាត់គ្រាន់តែចេះចាក់ថ្នាំបន្តិចបន្តួចប៉ុណ្ណោះ ហើយដោយសារអាណិតអ្នកភូមិ គាត់ចេះតែព្យាបាល ដោយការចាក់ថ្នាំអ្នកភូមិពីភូមិមួយទៅភូមិមួយ ដោយប្រើម្ជុលរួមគ្នា ព្រោះមិនមានម្ជុលច្រើនទើបបណ្ដាលអោយមានសោកនាដកម្មធំធេងដូច្នេះ សូម្បីតែបងប្អូនរបស់គាត់ក៏បានឆ្លងរោគកាចសាហាវនេះដែរ។
លោកយ៉ែម ជ្រិន ត្រូវបានតំណាងអយ្យការអមសាលាដំបូងខេត្តបាត់ដំបង ចោទប្រកាន់ចំនួន ៣បទល្មើសរួម មាន ៖ ទី ១- បទ ឃាតកម្ម អំពើឃោឃៅ តាមមាត្រា ២០៥ នៃក្រមព្រហ្មទណ្ឌ។ ទី ២- ការប្រព្រឹត្តចម្លងមេរោគអេដស៍ទៅ អ្នកដទៃតាមមាត្រា១៨ និង មា ត្រា ៥០ នៃច្បាប់ស្តីពីការបង្ការ និងការប្រយុទ្ធទប់ស្កាត់ការរីករាលដាល មេរោគអេដស៍/ ជំងឺ អេដស៍ និងបទល្មើសទី ៣-បទធ្វើ អាជីវកម្មពេទ្យដោយគ្មានការ អនុញ្ញាត។
នៅថ្ងៃទី០៣ធ្នូ ឆ្នាំ២០១៥ សាលាដំបូងខេត្តបាត់ដំបង បានប្រកាសសាលក្រមសម្រេចផ្ដន្ទាទោសលោកយ៉ែម ជ្រិន ដាក់ពន្ធនាគារកំណត់២៥ឆ្នាំ និងពិន័យប្រាក់អោយបង់ចូលថវិការដ្ឋចំនួន៥លានរៀលតាមសេចក្ដីចោទប្រកាន់ទាំង៣ខាងលើ។
បន្ទាប់មក ជនជាប់ចោទ បានប្ដឹងឧទ្ធរណ៍ និងស្នើអោយសាលាឧទ្ធរណ៍បន្ធូរបន្ថយទោស។ នៅថ្ងៃទី ១៧ ខែសីហា ឆ្នាំ២០១៧ សាលាឧទ្ធរណ៍ បានសម្រេចតម្កល់ទោសលោកយ៉ែម ជ្រិន អោយនៅដដែល ទើបជនត្រូវចោទបានប្ដឹងសារទុក្ខឡើងតុលាការកំពូល ហើយតុលាកាតកំពូល និងលើកយករឿងក្ដីនេះមកជំនុំជម្រះនាថ្ងៃទី០៨ ខែសីហា ឆ្នាំ២០១៨ខាងមុខ៕
Source: Kampuchea Thmey Daily
0 Comments