ក្រុមប្រឹក្សាសន្តិសុខអង្គការសហប្រជាជាតិ បានត្រៀមខ្លួនរួចជាស្រេចដើម្បីគាំទ្រសំណើរបស់សហរដ្ឋអាមេរិក ដែលមានបំណងដកចេញនូវឧបសគ្គមួយចំនួនលើប្រទេសកូរ៉េខាងជើងក្នុងការប៉ុនប៉ងផ្តល់ជំនួយមនុស្សធម៌។ នេះបើយោងតាមឯកសារដែលទទួលបានដោយ AFP។
យោងតាមមន្ត្រីអង្គការសហប្រជាជាតិ ដែលបានរាយការណ៍ពីការធ្លាក់ចុះនៃផលិតកម្មស្បៀងអាហារកាលពីឆ្នាំមុនបានឲ្យដឹងថា វិបត្តិមនុស្សធម៌របស់ប្រទេសកូរ៉េខាងជើង បានធ្វើឲ្យប្រជាជនប្រហែល១០លាននាក់ស្មើនឹងជិតពាក់កណ្តាលនៃចំនួនប្រជាជនត្រូវខ្វះអាហារូបត្ថម្ភ។
សេចក្តីសម្រេចរបស់អង្គការសហប្រជាជាតិបានបញ្ជាក់ថា ការដាក់ទណ្ឌកម្មមិនគួរប៉ះពាល់ដល់ជំនួយមនុស្សធម៌នោះទេប៉ុន្តែអង្គការជួយសង្គ្រោះនានាបានអះអាងថា វិធានការផ្នែកពាណិជ្ជកម្មនិងធនាគារតឹងរ៉ឹងកំពុងបង្កើតជាឧបសគ្គនិងកាត់បន្ថយលំហូរនៃការផ្គត់ផ្គង់ចាំបាច់។
យោងតាមឯកសារដែលត្រូវបានមើលឃើញដោយ AFP បានបង្ហាញថា សំណើមួយរបស់អាមេរិកដែលបានដាក់ចេញកាលពីខែមុនគឺនឹងផ្តល់ការណែនាំច្បាស់លាស់ដល់អង្គការជំនួយនិងរដ្ឋាភិបាលដើម្បីដាក់ពាក្យសុំការលើកលែងទណ្ឌកម្មរបស់ UN លើប្រទេសកូរ៉េខាងជើង។
បន្ទាប់ពីការចរចាអស់រយៈពេលជាច្រើនសប្តាហ៍ គណកម្មាធិការដាក់ទណ្ឌកម្មរបស់ UN ត្រូវបានគេរំពឹងថានឹងផ្តល់ការអនុម័តចុងក្រោយចំពោះគោលការណ៍ណែនាំថ្មីនៅថ្ងៃចន្ទនេះ។
យោងតាមឯកសារបានឲ្យដឹងថា នៅពេលអនុម័ត, សេចក្តីជូនដំណឹងមួយនឹងត្រូវបញ្ជូនទៅរដ្ឋជាសមាជិកចំនួន១៩៣របស់អង្គការសហប្រជាជាតិដោយគណៈកម្មាធិការនេះដើម្បីផ្តល់ការពន្យល់ច្បាស់លាស់អំពីយន្តការលើកលែងមនុស្សធម៌របស់ខ្លួនដែលនឹងធ្វើឲ្យប្រសើរឡើងនូវការផ្តល់ជំនួយមនុស្សធម៌ដល់ប្រទេសកូរ៉េខាងជើង។
គួរបញ្ជាក់ថា សំណើរនេះបានកើតឡើងខណៈដែលសហរដ្ឋអាមេរិកកំពុងអំពាវនាវឲ្យមានការដាក់សម្ពាធអតិបរិមាប្រឆាំងនឹងកូរ៉េខាងជើងដើម្បីបង្ខំឲ្យលោកគីមជុងអ៊ុនធ្វើតាមការសន្យារបស់លោកក្នុងការរំសាយអាវុធនុយក្លេអ៊ែរនៅលើឧបទ្វីបកូរ៉េ។
បន្ទាប់ពីរុស្ស៊ីនិងចិនបានជំរុញឲ្យក្រុមប្រឹក្សាកាត់បន្ថយទណ្ឌកម្ម, ឯកអគ្គរដ្ឋទូតអាមេរិកលោកស្រី Nikki Haley បាននិយាយថា UN មិនគួរធ្វើរឿងអ្វីឡើយរហូតដល់កូរ៉េខាងជើងចាត់វិធានការដើម្បីរុះរើកម្មវិធីនុយក្លេអ៊ែរនិងមីស៊ីលរបស់ខ្លួន។
កាលពីឆ្នាំមុន ក្រុមប្រឹក្សាសន្តិសុខបានអនុម័តទណ្ឌកម្មចំនួន៣សំណុំដែលផ្តោតលើសេដ្ឋកិច្ចរបស់កូរ៉េខាងជើងដើម្បីឆ្លើយតបទៅនឹងការសាកល្បងនុយក្លេអ៊ែរលើកទី៦របស់ទីក្រុងព្យុងយ៉ាងនិងការបាញ់មីស៊ីលជាបន្តបន្ទាប់៕ AFP
Source: Kampuchea Thmey Daily
0 Comments